'99 പ്രശ്‌നങ്ങൾ, എന്റെ ഒരു പരിഹാരം'; ചേർത്തു പിടിച്ച് കവിളിൽ കടിക്കുന്ന സുരേഷ് ​ഗോപി; വിമർശകർക്ക് മറുപടിയുമായി മാധവ്

കോഴിക്കോട് മാധ്യമ പ്രവർത്തകയോട് അപമര്യാദയായി പെരുമാറിയെന്ന പരാതിയിൽ നടൻ സുരേഷ് ​ഗോപിക്കെതിരെ സമൂഹമാധ്യമങ്ങളിലടക്കം വലിയ പ്രതിഷേധമാണ് ഉയരുന്നത്. അതിനിടെയാണ് സുരേഷ് ​ഗോപിയുടെ മകൻ മാധവ് സുരേഷ് ഇൻസ്റ്റ​ഗ്രാമിൽ പോസ്റ്റ് ചെയ്‌ത ചിത്രം ചർച്ചയാകുന്നത്.

തന്നെ ചേർത്തു പിടിച്ച് അച്ഛൻ സ്നേഹത്തോടെ കവിളിൽ കടിക്കുന്ന ചിത്രമാണ് മാധവ് പോസ്റ്റ് ചെയ്‌തത്. '99 പ്രശ്‌നങ്ങൾ,  എന്റെ ഒരു പരിഹാരം'- എന്ന് ക്യാപ്‌ഷനോടെയാണ് മാധവ് ചിത്രം പങ്കുവെച്ചിരിക്കുന്നത്. ദൈവത്തിന്റെ കോടതിയിൽ നിങ്ങളിൽ ചിലർക്ക് ബാക്കിയുണ്ടെന്നും മാധവ് ചിത്രത്തിനൊപ്പം കുറിച്ചു. 

സുരേഷ് ​ഗോപിക്കെതിരെ ഉയരുന്ന ആരോപണങ്ങളിലുള്ള കുടുംബത്തിന്റെ പ്രതികരണമാണ് ഇതെന്നായിരുന്നു സോഷ്യൽലോകത്തിന്റെ പ്രതികരണം. വിഷയത്തിൽ ബാബു രാജ്, പൊന്നമ്മ ബാബു, മേജർ രവി, ജ്യോതികൃഷ്‌ണ, ബീന ആന്റണി, സാധിക വേണു​ഗോപാൽ തുടങ്ങിയവർ സുരേഷ് ​ഗോപിയെ പിന്തുണച്ച് രം​ഗത്തെത്തിയിരുന്നു. 

സുരേഷ് ​ഗോപിയുടെ നാലു മക്കളിൽ ഏറ്റവും ഇളയ മകനാണ് മാധവ്. 'വരനെ ആവശ്യമുണ്ട്' എന്ന ചിത്രത്തിലൂടെ സിനിമയിൽ അരങ്ങേറ്റം കുറിച്ച മാധവ് വിൻസെന്റ് സെൽവ സംവിധാനം ചെയ്യുന്ന കുമ്മാട്ടിക്കളിയിൽ നായകനായായാണ് എത്തുന്നത്. അടുത്ത വർഷം സിനിമ തിയറ്ററുകളിൽ എത്തു.  

അതേസമയം സുരേഷ് ​ഗോപിക്കെതിരെ നൽകിയ പരാതിയിൽ മാധ്യമപ്രവർത്തക നടക്കാവ് പൊലീസ് സ്റ്റേഷനിലെത്തി പൊലീസിന് മൊഴി നൽകി. ഒരു മണിക്കൂർ നീണ്ടുനിന്ന മൊഴിയെടുപ്പിൽ സുരേഷ് ഗോപിക്കെതിരായ പരാതിയിലെ കാര്യങ്ങൾ പരാതിക്കാരി ആവർത്തിച്ചു. സംഭവം നടന്ന കോഴിക്കോട്ടെ സ്വകാര്യ ഹോട്ടലിൽ എത്തി പൊലീസ് മഹസർ തയ്യാറാക്കി.

ഈ വാര്‍ത്ത കൂടി വായിക്കൂ 

'തൊട്ടാല്‍ വാടാത്തതിനെ ആരും തൊടില്ല'; ചര്‍ച്ചയായി രഞ്ജുഷയുടെ അവസാന പോസ്റ്റുകള്‍

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ