​'ഗോവയിൽ നിന്ന് മദ്യം വാങ്ങിയത് ഞാൻ‌ തന്നെ, പക്ഷേ...'; വൈറൽ‌ വിഡിയോയെക്കുറിച്ച് അല്ലു അർജുൻ

പുഷ്പ 2 വിന്റെ വരവിനായി കാത്തിരിക്കുകയാണ് തെന്നിന്ത്യൻ സിനിമാ പ്രേക്ഷകർ. ക്രിസ്മസ് റിലീസായി ഡിസംബർ 5 നാണ് ചിത്രം തിയറ്ററുകളിലെത്തുക. പുഷ്പയുടെ പ്രൊമോഷൻ പരിപാടികളും അല്ലു അർജുൻ തുടങ്ങിക്കഴിഞ്ഞു. അടുത്തിടെ നടൻ നന്ദമൂരി ബാലകൃഷ്ണയുടെ അൺസ്റ്റോപ്പബിൾ വിത്ത് എൻബികെ സീസൺ 4 എന്ന ടോക്ക് ഷോയിലും അല്ലു അർജുൻ എത്തിയിരുന്നു. ഷോയുടെ പ്രൊമോ വിഡിയോയാണിപ്പോൾ അല്ലു ആരാധകർക്കിടയിലും സോഷ്യൽ മീഡിയയിലും വൈറലാകുന്നത്.

ഏഴ് വർഷം മുൻപ് വൈറലായി മാറിയ തൻ്റെയൊരു വിഡിയോയെക്കുറിച്ചും അല്ലു അർജുൻ ഷോയിൽ സംസാരിക്കുന്നുണ്ട്. ഗോവയിലെ ഒരു വൈൻ ഷോപ്പിൽ നിന്നും മദ്യം വാങ്ങുന്ന അല്ലു അർജുന്റെ വിഡിയോ 2017 ൽ പുറത്തുവന്നിരുന്നു. ഇതിന് പിന്നാലെ താരത്തെ അനുകൂലിച്ചും വിമർശിച്ചുമൊക്കെ നിരവധി പേർ രം​ഗത്തെത്തുകയും ചെയ്തു. ഈ വിഡിയോയെക്കുറിച്ചാണ് അല്ലുവിനോട് ബാല്ലയ്യ ചോദിച്ചത്. ആ വിഡ‍ിയോയിൽ ഉള്ളത് താൻ തന്നെയാണെന്നും മദ്യം വാങ്ങുകയായിരുന്നുവെന്നും അല്ലു അർജുൻ സമ്മതിച്ചിരിക്കുകയാണിപ്പോൾ.

മദ്യം വാങ്ങിയത് തന്റെയൊരു സുഹൃത്തിന് വേണ്ടിയായിരുന്നുവെന്നും അല്ലു വ്യക്തമാക്കി. താൻ പറഞ്ഞ സുഹൃത്ത് ചാറ്റ് ഷോയിൽ വരുമെന്നും അല്ലു അർജുൻ കൂട്ടിച്ചേർത്തു. എന്നാൽ അല്ലുവിന്റെ ആ സുഹൃത്ത് ആരാണെന്നറിയാനുള്ള ആകാംക്ഷയിലാണിപ്പോൾ ആരാധകർ. സൂപ്പർ താരങ്ങളാരെങ്കിലും ആയിരിക്കുമോ ആ സുഹൃത്ത് എന്നാണ് സോഷ്യൽ മീഡിയ ചോദിക്കുന്നത്.

'പ്രശാന്തിനെ ക്രൂശിച്ചു, മാധ്യമ പ്രവർത്തകർ കരിവാരി തേയ്ക്കാൻ ശ്രമിച്ചു; 21 വർഷങ്ങൾക്ക് മുൻപ് എനിക്കും ജോലി രാജി വയ്ക്കേണ്ടി വന്നു'

അല്ലു അർജുനൊപ്പം അമ്മ നിർമലയും ടോക്ക് ഷോയിലെത്തുന്നുണ്ട്. ഇന്ന് വൈകുന്നേരമാണ് വിഡിയോ പുറത്തുവരിക. സുകുമാർ സംവിധാനം ചെയ്യുന്ന പുഷ്പ 2 വിൽ അല്ലു അർജുനൊപ്പം ഫഹദ് ഫാസിലും പ്രധാന വേഷത്തിലെത്തുന്നുണ്ട്. രശ്മിക മന്ദാനയാണ് നായിക.