ഇത്ര വലിയ തുകയാണോ പ്രിയ പ്രതിഫലം ചോദിക്കുന്നതെന്ന് സംവിധായകന്‍; ആരാണ് പിന്നിലെന്ന് അറിയില്ല: പ്രിയ വാര്യര്‍

കരിയറിലുടനീളം തെറ്റിദ്ധരിക്കപ്പെട്ടിട്ടുണ്ടെന്ന് നടി പ്രിയ പ്രകാശ് വാര്യര്‍ (Priya Prakash Varrier ). തനിക്ക് ജാഡയാണെന്നും വലിയ തുക പ്രതിഫലമായി വാങ്ങുന്നുവെന്നുമെല്ലാം തെറ്റിദ്ധാരണ നിലനില്‍ക്കുന്നുണ്ടെന്നാണ് താരം പറയുന്നത്. അതിന്റെ പേരില്‍ തനിക്ക് അവസരങ്ങള്‍ നഷ്ടമായിട്ടുണ്ടെന്നും പ്രിയ വാര്യര്‍ പറയുന്നു. വനിതയ്ക്ക് നല്‍കിയ അഭിമുഖത്തിലാണ് പ്രിയ മനസ് തുറന്നത്.

''ആദ്യ സിനിമ മുതല്‍ എന്നെക്കുറിച്ച് ഒരുപാട് തെറ്റിധാരണകളുണ്ട്. ആരാണ് ഇതിനൊക്കെ പിന്നിലെന്ന് അറിയില്ല. പലതും കേട്ടതായിപ്പോലും ഭാവിക്കാറില്ല.പക്ഷെ ചിലതു നമ്മുടെ കരിയറിനെ ഇല്ലാതെയാക്കുന്നു. പൊതുവേ കേട്ടു വരുന്ന കമന്റാണ് ഭയങ്കര ജാഡയാണ് എന്നുള്ളത്. എന്തുകൊണ്ടാണ് അങ്ങനെ പറയുന്നതെന്ന് എനിക്കറിയില്ല. ആരോടും ഇടിച്ചു കയറി സംസാരിക്കുന്ന ആളല്ല ഞാന്‍. ഒരുപക്ഷെ അതാകാം. വളരെ വലിയ തുകയാണ് പ്രതിഫലമായി വാങ്ങുക എന്നൊരു കഥ കുറച്ചധികം നാളായിട്ടുണ്ടത്രേ. പക്ഷെ ഈയ്യടുത്താണ് അറിയുന്നത്.'' താരം പറയുന്നു.

എന്തുകൊണ്ടാണ് ആളുകള്‍ തന്നെക്കുറിച്ച് അങ്ങനെ പറയുന്നതെന്ന് അറിയില്ലെന്നും പ്രിയ വാര്യര്‍ പറയുന്നു. ഒരിക്കലൊരു സംവിധായകനുമായി സംസാരിച്ചപ്പോഴാണ് തന്റെ പ്രതിഫലത്തെക്കുറിച്ച് സിനിമ മേഖലയില്‍ നിലനില്‍ക്കുന്ന തെറ്റിദ്ധാരണ മനസിലായതെന്നും പ്രിയ വാര്യര്‍ പറയുന്നുണ്ട്.

സീനുകൾ വെട്ടിക്കുറയ്ക്കേണ്ടതില്ല, ആമിറിന്റെ സിതാരേ സമീൻ പർ ജൂൺ 20ന് റിലീസ് ചെയ്യും

''കുറച്ച് നാള്‍ മുമ്പ് ഒരു പ്രശസ്ത സംവിധായകനെ എയര്‍പോര്‍ട്ടില്‍ വച്ച് കണ്ടു. സംസാരിച്ചിരിക്കുന്നതിനിടയില്‍ അദ്ദേഹം ചോദിച്ചു. പ്രിയ ഇത്ര വലിയ തുകയാണല്ലേ പ്രതിഫലമായി ചോദിക്കുന്നത് എന്ന്. എനിക്കെന്ത് പറയമെന്നറിയില്ലായിരുന്നു. കാര്യം തിരക്കിയപ്പോഴാണ് അദ്ദേഹം പറയുന്നത് അദ്ദേഹത്തിന്റെ ഒരു സിനിമയിലേക്ക് എന്നെ കാസ്റ്റ് ചെയ്യുന്നതിനെക്കുറിച്ച് മറ്റൊരാളുമായി സംസാരിച്ചപ്പോള്‍ അദ്ദേഹം പറഞ്ഞത്ര പ്രിയയുടെ പ്രതിഫലം വളരെ കൂടുതലാണെന്ന്'' എന്നും പ്രിയ വാര്യര്‍ പറയുന്നു.

ദിലീപ് ചിത്രത്തിന് ഒടിടിയിലെങ്കിലും രക്ഷപ്പെടാനാകുമോ? ഈ ആഴ്ചയിലെ പുത്തൻ റിലീസുകൾ

എന്തിനാകും അയാളങ്ങളനെ പറഞ്ഞിട്ടുണ്ടാവുക. അതുകൊണ്ട് അയാള്‍ക്ക് എന്ത് നേട്ടമുണ്ടായിട്ടുണ്ടാകുമെന്നും താരം ചോദിക്കുന്നുണ്ട്. ആരോ കൊളുത്തി വിടുന്ന നിസാരമായൊരു കമന്റിലൂടെ എത്രയോ മനുഷ്യര്‍ക്ക് അവരുടെ അവസരങ്ങള്‍ നഷ്ടപ്പെട്ടിട്ടുണ്ടാകുമെന്നും പ്രിയ വാര്യര്‍ ആശങ്കപ്പെടുന്നുണ്ട്.

അജിത്ത് നായകനായ ഗുഡ് ബാഡ് അഗ്ലിയിലാണ് പ്രിയ വാര്യരെ ഒടുവിലായി സ്‌ക്രീനില്‍ കണ്ടത്. ചിത്രത്തിലെ തൊട്ട് തൊട്ട് പേസും എന്ന പാട്ടിലെ പ്രിയയുടെ പ്രകടനം വൈറലായി മാറിയിരുന്നു. ഹിന്ദി ചിത്രങ്ങളായ ത്രീ മങ്കീസ്, ലവ് ഹാക്കേഴ്‌സ് എന്നിവയാണ് പ്രിയയുടേതായി അണിയറയില്‍ തയ്യാറെടുക്കുന്ന സിനിമകള്‍.