ന്യൂഡല്‍ഹി: പുതുവര്‍ഷപ്പുലരിയില്‍ ഡല്‍ഹിയില്‍ യുവതിയെ കാറിടിച്ച് വലിച്ചിഴച്ച് കൊലപ്പെടുത്തിയ സംഭവത്തില്‍ യുവതി കാറിനടിയില്‍ കുടുങ്ങിയത് അറിയാമായിരുന്നെന്ന് അറസ്റ്റിലായ പ്രതികള്‍. ഭയന്നാണ് കാര്‍ നിര്‍ത്താതിരുന്നതെന്നും പ്രതികള്‍ പൊലീസിനോട് പറഞ്ഞതായാണ് റിപ്പോര്‍ട്ടുകള്‍.
ജനുവരി ഒന്നിന് 20കാരിയായ അഞ്ജലി തന്റെ സ്‌കൂട്ടറില്‍ സുഹൃത്തിനൊപ്പം വീട്ടിലേക്ക് മടങ്ങുമ്പോള്‍ പുലര്‍ച്ചെ രണ്ട് മണിയോടെ ഒരു കാര്‍ ഇടിക്കുകയായിരുന്നു. യുവതിയുടെ കാല്‍ കാറിന്റെ മുന്‍ ചക്രത്തില്‍ കുടുങ്ങി. അവളെ കാര്‍ വലിച്ചിഴച്ചു. സ്‌കൂട്ടറില്‍ ഒപ്പം യാത്ര ചെയ്ത സുഹൃത്ത് മറുവശത്തേക്ക് തെറിച്ച് വീണ് പരിക്കേല്‍ക്കുകയും ചെയ്തു. അഞ്ജലിയുടെ മൃതദേഹം കാഞ്ചന്‍വാല മേഖലയില്‍ നഗ്‌നമായ നിലയില്‍ കണ്ടെത്തുകയായിരുന്നു. തുടര്‍ന്നുള്ള അന്വേഷണത്തിലാണ് 13 കിലോമീറ്ററോളം കാറിനടിയില്‍ കുരുങ്ങിയ ശേഷമാണ് മൃതദേഹം സ്ഥലത്തെത്തിയതെന്ന് വ്യക്തമായത്.
സ്ത്രീ കാറിനടിയില്‍ കുടുങ്ങിയെന്ന് അറിയാമായിരുന്നെന്നും, എന്നാല്‍, വാഹനം നിര്‍ത്തി സ്ത്രീയെ പുറത്തെടുക്കാന്‍ ശ്രമിച്ചാല്‍ തങ്ങളുടെ മേല്‍ കൊലക്കുറ്റം ചുമത്തപ്പെടുമെന്നത് ഭയന്നാണ് നിര്‍ത്താതെ ഓടിച്ചുപോയതെന്നുമാണ് പ്രതികളുടെ പുതിയ മൊഴി. അപകടത്തെ തുടര്‍ന്ന് പ്രതികള്‍ വല്ലാതെ ഭയപ്പെട്ടിരുന്നു. അതുകൊണ്ട് മൃതദേഹം തെറിച്ചുപോകുന്നത് വരെ വണ്ടി നിര്‍ത്താതെ ഓടിക്കാന്‍ തീരുമാനിക്കുകയായിരുന്നു. കൂടാതെ കാര്‍ ഓടിച്ചിരുന്ന അമിത് ഖന്നയ്ക്ക് ലൈസന്‍സ് ഇല്ലാത്തതും പ്രതികളെ ആശങ്കാകുലരാക്കിയതായി പൊലീസ് പറഞ്ഞു.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
