പോക്കറ്റ് കീറാതെ പ്രോട്ടീൻ കഴിക്കാം, സീസൺ കഴിഞ്ഞാലും ചക്കക്കുരു സൂക്ഷിച്ചു വയ്ക്കാം, ചക്കക്കുരു വെച്ച് ഈ റെസിപ്പികൾ പരീക്ഷിച്ചിട്ടുണ്ടോ?

ചക്ക സീസൺ ആയതോടെ മിക്കവീടുകളിലും ചക്കവെച്ചുള്ള പല വിഭവങ്ങളാണ് അടുക്കളയിൽ തയ്യാറാകുന്നത്. പച്ചയ്ക്കും പഴുപ്പിച്ചും കഴിക്കാവുന്ന ചക്കയ്ക്ക് നിരവധി പോഷക​ഗുണങ്ങളുണ്ട്. ചക്ക പോലെ തന്നെ ചക്കക്കുരുവിനും ആരാധകർ ഏറെയാണ്. ചക്ക സീസൺ കഴിഞ്ഞാലും ഉണക്കി സൂക്ഷിക്കുന്ന ചക്കക്കുരു കൊണ്ട് മെഴുക്കുപുരട്ടിയും തോരനും മാങ്ങാക്കറിയുമൊക്കെ ഉണ്ടാക്കാം. കറിക്കുള്ള ചേരുവ എന്നതിലുപരി പോഷകങ്ങളുടെ കലവറ കൂടിയാണ് ചക്കക്കുരു എന്ന് നിങ്ങൾക്ക് അറിയാമോ?

വലിയ വില കൊടുത്തു വാങ്ങുന്ന ബദാമിനെ പോലെ പ്രോട്ടീൻ സമ്പുഷ്ടമാണ് ചക്കക്കുരു. വിലകൂടിയ പ്രോട്ടീൻ ബാറുകളും പാക്കറ്റ് ലഘുഭക്ഷണങ്ങളും വിപണി കീഴടക്കുന്ന ഈ ആധുനിക കാലത്ത്, തികച്ചും പ്രകൃതിദത്തവും പോക്കറ്റ് കാലിയാക്കാത്തതുമായ ഒരു മികച്ച ബദലാണ് ചക്കക്കുരു. വിറ്റാമിൻ ബി1, ബി2, നാരുകൾ, പ്രോട്ടീൻ, ശരീരത്തിന് ഗുണം ചെയ്യുന്ന സ്റ്റാർച്ച് എന്നിവയാൽ സമ്പന്നമാണ് ചക്കക്കുരു.

പ്രോട്ടീന്റെ കലവറ

ചക്കക്കുരുവിന്റെ ഏറ്റവും വലിയ സവിശേഷത അതിലടങ്ങിയിരിക്കുന്ന ഉയർന്ന പ്രോട്ടീന്റെ അളവാണ്. ഒരു തവണ കഴിക്കുന്നതിലൂടെ ശരീരത്തിന് ഏകദേശം ഏഴ് മുതൽ എട്ട് ഗ്രാം വരെ പ്രോട്ടീൻ ലഭിക്കുന്നു. പേശികളുടെ വളർച്ചയ്ക്കും, കോശങ്ങളുടെ കേടുപാടുകൾ തീർക്കുന്നതിനും ശരീരത്തിന് ആവശ്യമായ ഊർജം ഉൽപാദിപ്പിക്കുന്നതിനും ഇത് പ്രധാനമാണ്.

ദഹനം

ചക്കക്കുരുവിൽ ധാരാളമായി അടങ്ങിയിരിക്കുന്ന ഡയറ്ററി ഫൈബർ ദഹനപ്രക്രിയ സുഗമമാക്കാൻ സഹായിക്കുന്നു. ഇത് കുടലിന്റെ ആരോഗ്യം മെച്ചപ്പെടുത്തുകയും മലബന്ധം തടയുകയും ചെയ്യും. കൂടാതെ, നാരുകൾ അടങ്ങിയ ഭക്ഷണം കഴിക്കുന്നത് വഴി ദീർഘനേരം വയറു നിറഞ്ഞതായി തോന്നുകയും അമിതമായി ഭക്ഷണം കഴിക്കുന്നത് ഒഴിവാക്കാനും സാധിക്കും.

റെസിസ്റ്റന്റ് സ്റ്റാർച്ച്

ചക്കക്കുരുവിൽ കാണപ്പെടുന്ന പ്രതിരോധശേഷിയുള്ള സ്റ്റാർച്ച് സാധാരണ സ്റ്റാർച്ച് പോലെ ഇത് ചെറുകുടലിൽ വച്ച് എളുപ്പത്തിൽ ദഹിക്കില്ല. പകരം, ഇത് വൻകുടലിലെത്തി ശരീരത്തിന് ഗുണം ചെയ്യുന്ന നല്ല ബാക്ടീരിയകളുടെ ഭക്ഷണമായി മാറുന്നു. ഇത് രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയാനും മെറ്റബോളിസം മെച്ചപ്പെടുത്താനും സഹായിക്കുമെന്ന് പഠനങ്ങൾ വ്യക്തമാക്കുന്നു.

ഹൃദയാരോഗ്യം സംരക്ഷിക്കുന്നു

ഇതിലടങ്ങിയിരിക്കുന്ന പൊട്ടാസ്യവും മഗ്നീഷ്യം പോലുള്ള അവശ്യ ഘടകങ്ങൾ രക്തസമ്മർദം കൃത്യമായ അളവിൽ നിലനിർത്താൻ സഹായിക്കുന്നു. കൂടാതെ, ചക്കക്കുരുവിലെ നാരുകൾ ശരീരത്തിലെ ‘ലോ ഡെൻസിറ്റി ലിപ്പോപ്രോട്ടീൻ’ അഥവാ ചീത്ത കൊളസ്ട്രോളിന്റെ അളവ് കുറയ്ക്കുകയും ഹൃദയത്തിന്റെ ആരോഗ്യം സംരക്ഷിക്കുകയും ചെയ്യുന്നു.

രോഗപ്രതിരോധ ശേഷിയും വിളർച്ചയ്ക്കുള്ള പരിഹാരവും

ആന്റിഓക്‌സിഡന്റുകൾ, സിങ്ക്, വിറ്റാമിൻ സി എന്നിവയാൽ സമ്പന്നമായ ചക്കക്കുരു ശരീരത്തെ ഓക്‌സിഡേറ്റീവ് സമ്മർദത്തിൽ നിന്ന് സംരക്ഷിക്കുകയും രോഗപ്രതിരോധ ശേഷി വർധിപ്പിക്കുകയും ചെയ്യുന്നു. കൂടാതെ, ഇതിലടങ്ങിയിരിക്കുന്ന ഇരുമ്പിന്റെ അംശം ശരീരത്തിൽ ചുവന്ന രക്താണുക്കളുടെ എണ്ണം വർധിപ്പിച്ച് വിളർച്ച തടയാൻ സഹായിക്കും.

ചക്കക്കുരു കഴിക്കുമ്പോൾ ശ്രദ്ധിക്കേണ്ട കാര്യങ്ങൾ

പച്ചയ്ക്ക് കഴിക്കരുത് : പച്ചക്കുരുവിൽ ടാനിൻ, ട്രിപ്സിൻ ഇൻഹിബിറ്ററുകൾ തുടങ്ങിയ ആന്റിന്യൂട്രിയന്റുകൾ അടങ്ങിയിട്ടുണ്ട്. ഇവ ശരീരത്തിൽ പോഷകങ്ങൾ ആഗിരണം ചെയ്യുന്നത് തടസ്സപ്പെടുത്തുകയും ദഹനക്കേടുണ്ടാക്കുകയും ചെയ്യും.

മരുന്നുകൾ കഴിക്കുന്നവർ ശ്രദ്ധിക്കുക: ചക്കക്കുരുവിന് രക്തം കട്ടപിടിക്കുന്നത് സാവധാനത്തിലാക്കാനുള്ള പ്രവണതയുണ്ട്. അതിനാൽ രക്തം കട്ടിയാകാതിരിക്കാനുള്ള മരുന്നുകളോ (ബ്ലഡ് തിന്നർ) മറ്റ് വേദനാസംഹാരികളോ കഴിക്കുന്നവർ ചക്കക്കുരു അമിതമായി കഴിക്കുന്നത് ഒഴിവാക്കണം.

പ്രമേഹരോഗികൾ അളവ് നിയന്ത്രിക്കണം: ഇതിൽ കാർബോഹൈഡ്രേറ്റും സ്റ്റാർച്ചും ഉയർന്ന അളവിൽ അടങ്ങിയിട്ടുള്ളതിനാൽ പ്രമേഹബാധിതർ ഇത് കഴിക്കുന്ന അളവിൽ കൃത്യമായ നിയന്ത്രണം ഉണ്ടായിരിക്കണം.

ചക്കക്കുരു ദീർഘകാലം സൂക്ഷിക്കാം

• ചക്കക്കുരുവിന്റെ പുറത്തെ വെള്ളത്തോടു കൂടി വെയിലിൽ നന്നായി ഉണക്കിയ ശേഷം വായു കടക്കാത്ത കുപ്പികളിലോ കണ്ടെയ്നറുകളിലോ ഇട്ട് സൂക്ഷിക്കാവുന്നതാണ്.

• ചക്കക്കുരുവിന്റെ പുറംതൊലി നീക്കം ചെയ്ത ശേഷം എയർടൈറ്റ് ആയ പ്ലാസ്റ്റിക് കവറുകളിലാക്കി ഫ്രിഡ്ജിലും ചക്കക്കുരു സൂക്ഷിക്കാം.

ചില ചക്കക്കുരു റെസിപ്പികൾ

ചക്കക്കുരു വേവിച്ചത്

ഒരു പാത്രം വെള്ളത്തിൽ ചക്കക്കുരു ഇട്ട് 20 മുതൽ 30 മിനിറ്റ് വരെ നന്നായി തിളപ്പിച്ച് വേവിക്കുക. തണുത്തു കഴിഞ്ഞാൽ അതിന്റെ വെളുത്ത പുറംതോട് എളുപ്പത്തിൽ കളയാനാകും. ഇത് വെറുതെയോ അല്പം ഉപ്പ് ചേർത്തോ കഴിക്കാം.

ചക്കക്കുരു മെഴുക്കുപുരട്ടി

ചോറിനൊപ്പം കഴിക്കാൻ ഏറ്റവും മികച്ചതും എളുപ്പവുമായ വിഭവമാണിത്.

ചക്കക്കുരുവിന്റെ തൊലി കളഞ്ഞ് നീളത്തിൽ അരിയുക.ഇത് അല്പം വെള്ളവും മഞ്ഞൾപ്പൊടിയും ഉപ്പും ചേർത്ത് വേവിക്കുക. ഒരു പാനിൽ എണ്ണ ചൂടാക്കി കറിവേപ്പില, വെളുത്തുള്ളി, പച്ചമുളക് എന്നിവ വഴറ്റുക. ഇതിലേക്ക് സവാള ചേർത്ത് നന്നായി ബ്രൗൺ നിറമാകുന്നതുവരെ വഴറ്റുക. ഇതിലേക്ക് മുളകുപൊടി ചേർത്ത് പച്ചമണം മാറുന്നതുവരെ ഇളക്കുക.വേവിച്ചു വെച്ച ചക്കക്കുരു ഇതിലേക്ക് ചേർത്ത് നന്നായി യോജിപ്പിക്കുക. വെള്ളം വറ്റി മൊരിഞ്ഞു വരുന്നതുവരെ ചെറുതീയിൽ വഴറ്റിയെടുക്കാവുന്നതാണ്.

ചക്കക്കുരു മാങ്ങാക്കറി

ചക്കക്കുരുവും മാങ്ങയും അല്പം ഉപ്പും മഞ്ഞൾപ്പൊടിയും ചേർത്ത് വേവിക്കുക.തേങ്ങ, ചെറിയ ഉള്ളി, ജീരകം, അല്പം മുളകുപൊടി എന്നിവ കുറച്ചു വെള്ളം ചേർത്ത് നല്ല പേസ്റ്റായി അരച്ചെടുക്കുക. വെന്ത ചക്കക്കുരു-മാങ്ങാ കൂട്ടിലേക്ക് അരപ്പ് ചേർത്ത് തിളപ്പിക്കുക. തിളച്ച ശേഷം കടുക്, വറ്റൽമുളക്, കറിവേപ്പില എന്നിവ വെളിച്ചെണ്ണയിൽ താളിച്ച് കറിയിൽ ഒഴിക്കുക.

ചക്കക്കുരു ഫ്രൈ

ചക്കക്കുരു അല്പം ഉപ്പും മഞ്ഞൾപ്പൊടിയും ചേർത്ത് വേവിച്ചെടുക്കുക (കൂടുതൽ വെന്തുടഞ്ഞു പോകരുത്). ഇതിലേക്ക് മുളകുപൊടി, മല്ലിപ്പൊടി, ഗരം മസാല, ഇഞ്ചി-വെളുത്തുള്ളി പേസ്റ്റ്, കോൺഫ്ലോർ, നാരങ്ങാനീര്, ഉപ്പ് എന്നിവ ചേർത്ത് നന്നായി പുരട്ടി 10 മിനിറ്റ് വയ്ക്കുക. ഒരു പാനിൽ എണ്ണ ഒഴിച്ച്, മസാല പുരട്ടിയ ചക്കക്കുരു മൊരിഞ്ഞു വരുന്നതുവരെ വറുത്തെടുക്കുക. ഒവൻ ഉള്ളവർക്ക് 205 ഡിഗ്രി സെൽഷ്യസിൽ ഒരു ബേക്കിങ് ഷീറ്റിൽ വച്ച് ഏകദേശം 20 മിനിറ്റ് വറുത്തെടുക്കാം.