മുടിയിഴകൾ ആരോ​ഗ്യത്തോടെ വളരട്ടെ, ചെമ്പരത്തി എണ്ണയോടുള്ള പ്രിയം കൂടുന്നു

മുടിയുടെ ആരോ​ഗ്യത്തിന് മികച്ചതാണ് ചെമ്പരത്തി. തലമുടിയും സ്കാൽപ്പും വൃത്തിയാക്കുന്നതിന് ചെമ്പരത്തി താളി ഉപയോ​ഗിച്ച് ആഴ്ചയിൽ രണ്ട് തവണയെങ്കിലും കഴുകുന്നത് നല്ലതാണ്. എന്നാൽ താളി മാത്രമല്ല, ചെമ്പരത്തി പൂ ഇട്ട് കാച്ചിയ എണ്ണയും മുടിയുടെ ആരോ​ഗ്യത്തിന് മികച്ചതാണ്.

മുടി വളരാനുള്ളത് ഇതിലുണ്ട്

മുടിയുടെ ആരോഗ്യകരമായ വളർച്ചയ്ക്കു സഹായിക്കുന്ന വിറ്റാമിൻ എയും സിയും, അമിനോ ആസിഡുകൾ, ആന്റിഓക്സിഡന്റുകൾ എന്നിവ ചെമ്പരത്തി എണ്ണയിൽ അടങ്ങിയിട്ടുണ്ട്. ഇത് മുടി വളരാനും താരനെ അകറ്റാനും അകാലനരയ്ക്കും ഫലപ്രദമാണ്. മുടിക്ക് നല്ല കണ്ടീഷനിങ് കിട്ടുന്നതിനും മിനുസമുള്ളതാക്കുന്നതിനും ചെമ്പരത്തിയിട്ട് കാച്ചിയ എണ്ണ നല്ലതാണ്.

കൂടാതെ ഇത് മുടിയുടെ വേരിൽ നിന്ന് തന്നെ അതിനെ ശക്തിപ്പെടുത്തി മുടി പൊട്ടിപോകുന്നത് തടയുന്നു. മുടിയിഴകൾ തമ്മിൽ പിണഞ്ഞ് പൊട്ടിപ്പോകുന്നതും മുടിയുടെ അഗ്രം പിളരുന്നതും തടയാനും സഹായിക്കും.

ചെമ്പരത്തി എണ്ണ ഉപയോ​ഗിക്കുമ്പോൾ

ചെമ്പരത്തി എണ്ണ ഉപയോ​ഗിക്കുന്നതിന് മുൻപ് ഡബിൾ ബോയിൽ ചെയ്യുന്നത് നല്ലതാണ്. കുളിക്കുന്നതിന് 30-40 മിനിറ്റുകൾക്ക് മുൻപ് ചെറുചൂടോടെ എണ്ണ സ്കാൽപ്പിലും തലമുടിയിലും പുരട്ടി മസാജ് ചെയ്യാവുന്നതാണ്. ശേഷം വീര്യം കുറഞ്ഞ ഷാംപൂ ഉപയോ​ഗിച്ച് തലമുടി കഴുകിയെടുക്കാം. കുളി കഴിഞ്ഞ് സിറം പോലെയും ചെമ്പരത്തി എണ്ണ പുരട്ടാവുന്നതാണ്. നനഞ്ഞ മുടിയിലേക്ക് രണ്ട്-രണ്ട് തുള്ളി മാത്രമെടുത്ത് പുരട്ടുക. ഇത് മുടിക്ക് തിളക്കം നൽകും.