ദിവസത്തിൽ രണ്ടുതവണ മുഖം കഴുകണോ?

രാവിലെ എഴുന്നേറ്റാൽ മുഖം കഴുകണം. രാത്രി ഉറങ്ങുന്നതിന് മുമ്പും മുഖം വൃത്തിയാക്കണം. ഇതാണ് സാധാരണയായി നമ്മൾ പിന്തുടരുന്ന ഒരു സ്കിൻ കെയർ റുട്ടീൻ. എന്നാൽ ദിവസത്തിൽ രണ്ടുതവണ മുഖം കഴുകേണ്ട ആവശ്യമുണ്ടോ? പലതവണ മുഖം കഴുകുന്നത് ചർമം കൂടുതൽ തെളിയാൻ സഹായിക്കുമെന്നാണ് പലരും കരുതുന്നത്.

എന്നാൽ അമിതമായി മുഖം കഴുകുന്നത് ചർമത്തിലെ സ്വാഭാവിക എണ്ണമയം നീക്കം ചെയ്യുകയും വരൾച്ചയും ചൊറിച്ചിലും അസ്വസ്ഥതയും ഉണ്ടാക്കുകയും ചെയ്യാം.

എന്തിനാണ് മുഖം കഴുകുന്നത്?

പകൽ സമയത്ത് മുഖത്ത് പൊടിയും അഴുക്കും അധിക എണ്ണയും അടിഞ്ഞുകൂടാം. കൂടാതെ മുഖത്തിടുന്ന സൺസ്ക്രീൻ, മേക്കപ്പ് തുടങ്ങിയ കാര്യങ്ങളും ചർമത്തിൽ അവശേഷിക്കാം. ഇതൊക്കെ നീക്കം ചെയ്യണമെങ്കിൽ മുഖം വൃത്തിയാക്കേണ്ടത് പ്രധാനമാണ്. രാത്രി കിടക്കുന്നതിന് മുൻപ് പ്രത്യേകിച്ചും.

എന്നാൽ ദിവസത്തിൽ രണ്ടുതവണ കഴുകണോ?

മിക്ക ആളുകൾക്കും രാവിലെയും രാത്രിയും മുഖം കഴുകുന്നത് അനുയോജ്യമാണ്. അമേരിക്കൻ അക്കാദമി ഓഫ് ഡെർമറ്റോളജി ദിവസത്തിൽ രണ്ടുതവണയും അമിതമായി വിയർക്കുന്ന സമയത്തിന് ശേഷവും മുഖം കഴുകാൻ ശുപാർശ ചെയ്യുന്നുണ്ട്. പ്രത്യേകിച്ച് എണ്ണമയമുള്ളതോ മുഖക്കുരുവിന് സാധ്യതയുള്ളതോ ആയ ചർമത്തിൽ ഇത് കൂടുതൽ പ്രയോജനകരമാണ്.

എന്നാൽ ചർമം വരണ്ടതോ വളരെ സെൻസിറ്റീവായതോ ആണെങ്കിൽ രണ്ടുതവണ ക്ലെൻസർ ഉപയോഗിക്കുന്നത് ചിലർക്ക് അസ്വസ്ഥതയുണ്ടാക്കാം. അത്തരക്കാർക്ക് രാവിലെ വെറും വെള്ളത്തിൽ മുഖം കഴുകുകയും രാത്രി മാത്രം മൃദുവായ ക്ലെൻസർ ഉപയോഗിക്കുകയും ചെയ്യുന്നത് പരിഗണിക്കാം.

എണ്ണമയമുള്ള ചർമമുള്ളവർ

ചർമം എണ്ണമയമുള്ളതാണെങ്കിൽ ദിവസത്തിൽ രണ്ട് തവണ മുഖം കഴുകുന്നത് ഗുണകരമാണ്. എന്നാൽ എണ്ണമയമുള്ള ചർമമാണെന്ന് കരുതി ശക്തമായ സോപ്പോ ക്ലെൻസറോ ഉപയോഗിച്ച് മുഖം വീണ്ടും വീണ്ടും കഴുകുന്നത് നല്ലതല്ല. ചർമത്തിലെ സ്വാഭാവിക എണ്ണ അമിതമായി നീക്കം ചെയ്യുന്നത് വരൾച്ചയും ഇറിറ്റേഷനും ഉണ്ടാക്കാം. എണ്ണമയമുള്ള ചർമത്തിനും മൃദുവായ, നോൺ-കോമഡോജെനിക് ക്ലെൻസറുകൾ തിരഞ്ഞെടുക്കുന്നതാണ് നല്ലത്.

മുഖക്കുരുവുള്ളവർ എത്ര തവണ കഴുകണം?

മുഖക്കുരുവുള്ളവർക്ക് മുഖം വൃത്തിയായി സൂക്ഷിക്കുന്നത് പ്രധാനമാണ്. സാധാരണയായി രാവിലെയും രാത്രിയും മുഖം കഴുകുന്നത് നല്ലതാണ്. എന്നാൽ മുഖക്കുരു മാറുമെന്ന പ്രതീക്ഷയിൽ ദിവസം പലതവണ മുഖം കഴുകുന്നത് തിരിച്ചടിയാകാം. അമിതമായി കഴുകുന്നത് ചർമത്തിൽ ഇറിറ്റേഷൻ ഉണ്ടാക്കി മുഖക്കുരു കൂടുതൽ വഷളാക്കാൻ സാധ്യതയുണ്ട്.

വരണ്ട ചർമമാണെങ്കിൽ?

വരണ്ട ചർമമുള്ളവർ മുഖം കഴുകുമ്പോൾ ചർമം വലിഞ്ഞു പിടിക്കുന്നതു പോലെയോ ചൊറിയുന്നതു പോലെയോ തോന്നിയാൽ ക്ലെൻസറും മുഖം കഴുകുന്ന രീതിയും പരിശോധിക്കണം. വളരെ വരണ്ടതോ സെൻസിറ്റീവായതോ ആയ ചർമത്തിന് രാവിലെ ക്ലെൻസറിന് പകരം വെള്ളം മാത്രം ഉപയോഗിക്കുകയും രാത്രി മൃദുവായ ക്ലെൻസർ ഉപയോഗിക്കുകയും ചെയ്യുന്നത് ചിലർക്ക് കൂടുതൽ അനുയോജ്യമായേക്കാം. കഴുകിയതിന് ശേഷം മോയ്സ്ചറൈസർ ഉപയോഗിക്കുന്നതും പ്രധാനമാണ്.

സെൻസിറ്റീവ് ചർമമുള്ളവർ ശ്രദ്ധിക്കണം

മുഖം കഴുകുമ്പോൾ ചർമത്തിൽ കഠിനമായി ഉരയ്ക്കുന്നത് ഒഴിവാക്കണം. വാഷ്ക്ലോത്ത്, കഠിനമായ സ്ക്രബ്ബർ തുടങ്ങിയവ ഉപയോഗിച്ച് ശക്തമായി ഉരയ്ക്കുന്നത് ചർമത്തെ കൂടുതൽ പ്രകോപിപ്പിക്കാം. ഡെർമറ്റോളജിസ്റ്റുകളുടെ നിർദേശം അനുസരിച്ച് മൃദുവായ, ആൽക്കഹോൾ ഇല്ലാത്ത ക്ലെൻസർ ഉപയോഗിച്ച് വിരൽത്തുമ്പുകൾ കൊണ്ട് സാവധാനം മുഖം കഴുകുന്നതാണ് നല്ലത്. ഇളംചൂടുള്ള വെള്ളം ഉപയോഗിക്കുകയും കഴുകിയശേഷം മൃദുവായ ടവൽ ഉപയോഗിച്ച് തട്ടിത്തുടയ്ക്കുകയും ചെയ്യാം.

ചൂടുവെള്ളത്തിൽ മുഖം കഴുകുന്നത് നല്ലതാണോ?

മുഖം കഴുകാൻ വളരെ ചൂടുവെള്ളം ഉപയോഗിക്കുന്നത് നല്ലതല്ല. ഇളംചൂടുള്ള വെള്ളം ഉപയോഗിക്കുന്നതാണ് പൊതുവെ ശുപാർശ ചെയ്യുന്നത്. വളരെ ചൂടുവെള്ളവും ശക്തമായ ക്ലെൻസറുകളും ഒരുമിച്ച് ഉപയോഗിക്കുന്നത് ചർമത്തിലെ സ്വാഭാവിക ഈർപ്പം കുറയ്ക്കുകയും വരൾച്ചയും അസ്വസ്ഥതയും വർധിപ്പിക്കുകയും ചെയ്യാം.

മുഖം കഴുകുമ്പോൾ സോപ്പ് ഉപയോഗിക്കാമോ?

കൈയിലോ ശരീരത്തിലോ ഉപയോഗിക്കുന്ന സാധാരണ സോപ്പ് മുഖത്തിന് ഉപയോഗിക്കുന്നത് ഒഴിവാക്കുന്നതാണ് നല്ലത്. മുഖത്തെ ചർമത്തിന് അനുയോജ്യമായ മൃദുവായ ക്ലെൻസർ തിരഞ്ഞെടുക്കുന്നതാണ് നല്ലത്. പ്രത്യേകിച്ച് സെൻസിറ്റീവ് ചർമമുള്ളവർ സുഗന്ധം കൂടുതലുള്ളതോ ചർമത്തെ വരണ്ടതാക്കുന്നതോ ആയ ഉൽപന്നങ്ങൾ ഒഴിവാക്കുന്നത് പരിഗണിക്കാം.

മോയ്സ്ചറൈസർ പുരട്ടേണ്ടത് എപ്പോൾ?

വരണ്ട ചർമമുള്ളവർ മുഖം കഴുകിയ ശേഷം മോയ്സ്ചറൈസർ ഉപയോഗിക്കണം. മുഖം കഴുകിയതിന് ശേഷം ചർമത്തിൽ ഈർപ്പം നിലനിർത്താൻ ഇത് സഹായിക്കും. എണ്ണമയമുള്ള ചർമമുള്ളവർക്കും മോയ്സ്ചറൈസർ ആവശ്യമില്ലെന്ന ധാരണ ശരിയല്ല. സ്വന്തം ചർമത്തിന് അനുയോജ്യമായ, നോൺ-കോമഡോജെനിക് മോയ്സ്ചറൈസർ തിരഞ്ഞെടുക്കാം.

മേക്കപ്പ് ഉപയോഗിക്കുന്നവർ ശ്രദ്ധിക്കേണ്ടത്

മേക്കപ്പ് ഉപയോഗിക്കുന്നവർ രാത്രി ഉറങ്ങുന്നതിന് മുമ്പ് അത് നീക്കം ചെയ്യണം. പ്രത്യേകിച്ച് വാട്ടർപ്രൂഫ് മേക്കപ്പ് ഉപയോഗിച്ചിട്ടുണ്ടെങ്കിൽ സാധാരണ മുഖം കഴുകുന്നതിന് പുറമേ മേക്കപ്പ് റിമൂവ് ചെയ്യാനുള്ള ഉൽപന്നം ആവശ്യമായി വരാം.

എന്നാൽ മേക്കപ്പ് ഉപയോഗിക്കാത്തവർക്ക് ദിവസവും ഡബിൾ ക്ലെൻസിങ് നിർബന്ധമല്ല. സാധാരണയായി ഒരു മൃദുവായ ക്ലെൻസർ ഉപയോഗിച്ച് നന്നായി മുഖം കഴുകുന്നത് മതിയാകും. അമിതമായ ക്ലെൻസിങ് ചർമത്തെ വരണ്ടതാക്കാനും ഇറിറ്റേഷൻ ഉണ്ടാക്കാനും സാധ്യതയുണ്ട്.