തടി കുറയുന്നതിനൊപ്പം സ്തനാർബുദ സാധ്യതയും കുറയും; ജിഎൽപി-1 മരുന്നുകൾ ബ്രസ്റ്റ് കാൻസർ സാധ്യത 30 ശതമാനം വരെ കുറച്ചുവെന്ന് പഠനം

അമിതവണ്ണം കുറയ്ക്കാൻ മരുന്നു ഉപയോ​ഗിക്കുന്നവരുടെ എണ്ണം ഇന്ന് വർധിച്ചുവരികയാണ്. സെലിബ്രിറ്റികൾ ഉൾപ്പെടെയുള്ള ആളുകൾ ഒസെംപിക്, വെ​ഗോവി തുടങ്ങിയ മരുന്നുകൾ ഉപയോ​ഗിക്കുന്നതിനെ കുറിച്ച് പങ്കുവെച്ചിട്ടുണ്ട്. അമിതവണ്ണം കുറയ്ക്കുന്നതിനും ടൈപ്പ് 2 ഡയബറ്റിസിൽ നിന്നും സംരക്ഷിക്കുന്ന ഈ മരുന്നുകൾ സ്തനാർബുദത്തെയും പ്രതിരോധിക്കുമെന്നാണ് പെൻസിൽവാനിയ സർവകലാശാല ​ഗവേഷകർ നടത്തിയ പഠനത്തിൽ വിശദീകരിക്കുന്നു.

ഒസെംപിക്, വെഗോവി, മൗൻജാരോ, സെപ്‌ബൗണ്ട് തുടങ്ങിയ GLP-1 മരുന്നുകൾ കഴിക്കുന്ന സ്ത്രീകളിൽ സ്തനാർബുദം ഉണ്ടാകാനുള്ള സാധ്യത ഗണ്യമായി കുറവാണെന്ന് പഠനം ചൂണ്ടിക്കാണിക്കുന്നു. 2026 ലെ അമേരിക്കൻ സൊസൈറ്റി ഓഫ് ക്ലിനിക്കൽ ഓങ്കോളജിയുടെ (ASCO) വാർഷിക യോഗത്തിൽ ഈ കണ്ടെത്തലുകൾ ​ഗവേഷകർ അവതരിപ്പിക്കുകയും ജെസിഒ ഓങ്കോളജി പ്രാക്ടീസിൽ പ്രസിദ്ധീകരിക്കുകയും ചെയ്തിരുന്നു.

45നും 80നും ഇടയിൽ പ്രായമായ സ്ത്രീകളിൽ നടത്തിയ പഠനത്തിൽ GLP-1 മരുന്നുകൾ ഉപയോ​ഗിക്കാത്ത സ്ത്രീകളെ അപേക്ഷിച്ച് GLP-1 മരുന്നുകൾ ഉപയോ​ഗിച്ചവരിൽ സ്തനാർബുദം വരാനുള്ള സാധ്യത 30 ശതമാനം കുറവാണെന്ന് കണ്ടെത്തി. അമിതവണ്ണം സ്തനാർബദ സാധ്യത കൂട്ടുന്ന ഒരു പ്രധാന ഘടകമാണ്. മരുന്നുകളുടെ സഹായത്തോടെ ശരീരഭാരം കുറയുന്നതാകാം കാൻസർ സാധ്യത കുറയ്ക്കുന്നതെന്നാണ് ​ഗവേഷകർ വിലയിരുത്തുന്നത്. ആർത്തവ വിരാമത്തോടെ ഈ സാധ്യത കൂടുകയും ചെയ്യുന്നു.

കൂടാതെ ഇത്തരം മരുന്നുകൾ ശരീരത്തിലെ വീക്കം കുറയ്ക്കുകയും ചെയ്യുന്നു. ഇതും കാൻസർ സാധ്യത കുറയ്ക്കുന്നുണ്ടെന്ന് ​ഗവേഷകർ പറയുന്നു. GLP-1 മരുന്നുകൾക്ക് ഇൻസുലിൻ സംവേദനക്ഷമത മെച്ചപ്പെടുത്താനും ഇൻസുലിൻ പ്രതിരോധം കുറയ്ക്കാനും കഴിയും. ഇതിനൊപ്പം മെറ്റബോളിക് തകരാറുകളും സ്തനാർബുദ സാധ്യത വർധിപ്പിക്കുന്നവയാണ്. അതേസമയം GLP-1 മരുന്നുകൾ നേരിട്ട് സ്തനാർബുദ അപകടസാധ്യത കുറയ്ക്കുമോ എന്നും കാൻസർ പ്രതിരോധത്തിനായി അവ ശുപാർശ ചെയ്യാൻ കഴിയുമോ എന്നും നിർണയിക്കാൻ നിരവധി ക്ലിനിക്കൽ ട്രയലുകൾ അനിവാര്യമാണെന്നും ഗവേഷകർ കൂട്ടിച്ചേർക്കുന്നുണ്ട്.

വിശപ്പ് കുറച്ചുകൊണ്ടാണ് GLP-1 മരുന്നുകൾ ശരീരഭാരം കുറയ്ക്കാൻ സഹായിക്കുന്നത്. വയറുനിറഞ്ഞുവെന്ന തോന്നലുണ്ടാക്കുന്ന ഹോർമോണിനെ അനുകരിക്കുകയാണ് ഇവ ചെയ്യുന്നത്. അതോടൊപ്പം ഇവ ഇൻസുലിൻ നിർമാണത്തിന്റെ തോത് കൂട്ടുന്നുമുണ്ട്. അതുകൊണ്ടാണ് പ്രമേഹത്തിന്‌ ഈ മരുന്ന് ഉപയുക്തമാകുന്നത്.