എച്ച്3എൻ2: ചുമയും മൂക്കൊലിപ്പുമെല്ലാം ലക്ഷണങ്ങൾ, പകർച്ചപനിക്ക് സമാനമായ അവസ്ഥ

‌‌
എച്ച്3എൻ2 വൈറസ് ബാധ മൂലം രാജ്യത്ത് രണ്ടു പേർ മരിച്ച സാഹചര്യത്തിൽ കൂടുതൽ നിരീക്ഷണവും മുൻകരുതൽ നടപടികളും ആവശ്യമാണെന്ന് വിദ​ഗ്ധർ. കൂടുതൽ പേർ രോ​ഗബാധിതരായെന്ന റിപ്പോർട്ടുകൾ കോവിഡ് പോലെ മറ്റൊരു മഹാമാരിയിലേക്കാണോ നീങ്ങുന്നതെന്ന ആശങ്ക പരത്തിയിട്ടുണ്ട്. എന്നാൽ അത്തരത്തിൽ പേടിക്കാനുള്ള സാഹചര്യം നിലവിൽ ഇല്ലെന്നും കോവിഡ് കാലത്ത് പാലിച്ചുപോന്ന പ്രതിരോധശീലങ്ങൾ തുടർന്നാൽ മതിയെന്നുമാണ് വിദ​ഗ്ധരുടെ നിർദേശം. 

സാധാരണ പകർച്ചപനിക്ക് സമാനമായ ലക്ഷണങ്ങളാണ് എച്ച്3എൻ2 ബാധിതരിലും കണ്ടുവരുന്നത്. പനിയും ചുമ, മൂക്കൊലിപ്പ് തുടങ്ങിയ ശ്വാസകോശ സംബന്ധമായ ലക്ഷണങ്ങളുമാണ് പ്രധാനം. കൂടാതെ ശരീരവേദന, ഓക്കാനം, ഛർദ്ദി, വയറിളക്കം തുടങ്ങിയ ലക്ഷണങ്ങളും ഉണ്ടാകാറുണ്ട്. 

ലോക്ക്ഡൗണും പതിവായ മാസ്ക് ഉപയോ​ഗവും വൈറസുകളുടെ തീവ്രഇനങ്ങളെ പ്രതിരോധിക്കാൻ സഹായിച്ചിട്ടുണ്ട്. പക്ഷെ പതിവായി ഉണ്ടാകാറുള്ള സീസണൽ വൈറസുകളുമായുള്ള സമ്പർക്കം ഇല്ലാതാക്കാനും ഇത് കാരണമായി. അതുകൊണ്ട് ഇവയ്ക്കെതിരെ ശരീരം ആർജ്ജിച്ച രോ​ഗപ്രതിരോധശേഷി കുറഞ്ഞത് ഇപ്പോൾ ഇത്തരം രോ​ഗങ്ങൾ വ്യാപകമാകാൻ ഒരു പരിധിവരെ കാരണമാണെന്ന് വിദ​ഗ്ധർ പറയുന്നു. 

ജനുവരി രണ്ടിനും മാർച്ച് അഞ്ചിനും ഇടയിൽ രാജ്യത്ത് 451 എച്ച്3എൻ2 കേസുകളാണ് റിപ്പോർട്ട് ചെയ്തത്. സാധാരണ പകർച്ചവ്യാധികളുമായി താരതമ്യം ചെയ്യുമ്പോൾ എച്ച്3എൻ2 ബാധ മൂലം മരണം സംഭവിക്കാനുള്ള സാധ്യത കൂടുതലാണ്. മറ്റുവർഷങ്ങളിൽ ഈ സമയത്തെ അവസ്ഥ പരി​ഗണിക്കുമ്പോൾ നിലവിൽ രോ​ഗവ്യാപനം മൂന്ന് മടങ്ങോളം കൂടുതലുമാണ്. അതുകൊണ്ട് രോ​ഗനിരീക്ഷണം അടിയന്തര നടപടിയായി സ്വീകരിക്കണമെന്നും ആരോ​ഗ്യവിദ​ഗ്ധർ നിർദേശിച്ചു. രോ​ഗബാധിതരായ ആളുകളെ നിരീക്ഷിക്കുന്നുണ്ടെന്നും ഈ മാസം അവസാനത്തോടെ കേസുകളുടെ എണ്ണം കുറയുമെന്നാണ് പ്രതീക്ഷയെന്നും കേന്ദ്ര ആരോ​ഗ്യമന്ത്രാലയം അറിയിച്ചു. 

ഈ വാര്‍ത്ത കൂടി വായിക്കൂ 

മലിന വായു സ്ത്രീകളില്‍ അസ്ഥിക്ഷയം വേഗത്തിലാക്കും; നട്ടെല്ലിന്റെ ആരോഗ്യത്തെ ഗുരുതരമായി ബാധിക്കും 

സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ