ഡയറ്റിൽ കോംപ്രമൈസ് വേണ്ട, ഫിറ്റ്നസ് ഫ്രീക്കുകൾക്ക് പ്രത്യേക ക്രിസ്മസ് കേക്ക്, റെസിപ്പി

ക്രിസ്മസിന് കേക്ക് ഇല്ലാതെ എന്ത് ആഘോഷം. സാധാരണ ക്രിസ്മസ് കേക്കുകൾ പഞ്ചസാരയും ബട്ടറും ധാരാളം അടങ്ങിയിട്ടുണ്ടാവും. ഇത് ആരോ​ഗ്യത്തിന് അത്ര സുരക്ഷിതമായിരിക്കില്ലെന്ന് പറയേണ്ടതില്ലല്ലോ. അതുകൊണ്ട് തന്നെ കുറ്റബോധമില്ലാതെ കേക്ക് ആസ്വദിക്കാൻ ഇപ്പോൾ ഫിറ്റ്നസ് കേക്കുകളാണ് ട്രെൻഡ്.

ജിമ്മിൽ പോകുന്നവർക്കും ഡയറ്റ് ശ്രദ്ധിക്കുന്നവർക്കുമെല്ലാം സന്തോഷത്തെ ക്രിസ്മസിന് കേക്ക് കഴിക്കാൻ ഇതാ കുറച്ച് ഫിറ്റ്നസ് കേക്ക് റെസിപ്പികൾ

പ്രോട്ടീൻ പ്ലം കേക്ക്

പ്ലം കേക്കുകളുടെ രുചിയിൽ ആരോ​ഗ്യകരമായ ചേരുവകൾ ചേർത്തുണ്ടാക്കുന്നതാണ് പ്രോട്ടീൻ പ്ലം കേക്കുകൾ.

ചേരുവകൾ

• ​ഗോതമ്പ് പൊടി- ഒരു കപ്പ്

• വാനില/ബദാം ഫ്ലേവറുള്ള പ്രോട്ടീൻ പൗഡർ- അര കപ്പ്

• കട്ടി കുറഞ്ഞ തേങ്ങാപ്പാൽ-അര കപ്പ്

• ശർക്കര പാനി/ ബ്രൗൺ ഷു​ഗർ-രണ്ട് ടേബിൾ സ്പൂൺ

• മുട്ടയുടെ വെള്ള- രണ്ട് മുട്ടയുടെ വെള്ള

• ഈന്തപ്പഴം, ഉണക്കമുന്തിരി, അണ്ടിപ്പരിപ്പ്- മിതമായ അളവിൽ

• ബേക്കിംഗ് പൗഡ- ആവശ്യത്തിന്

• ഉപ്പ്-ആവശ്യത്തിന്

തയ്യാറാക്കേണ്ട വിധം

ഒരു കപ്പ് ഗോതമ്പ് പൊടിയിൽ അര കപ്പ് വാനില/ബദാം ഫ്ലേവറുള്ള പ്രോട്ടീൻ പൗഡർ തേങ്ങാപ്പാൽ ഉപയോഗിച്ച് മാവ് കുഴച്ചെടുക്കാം. മധുരത്തിനായി രണ്ട് ടേബിൾ സ്പൂൺ ശർക്കര പാനി അല്ലെങ്കിൽ ബ്രൗൺ ഷുഗർ ഉപയോഗിക്കുക. രണ്ട് മുട്ടയുടെ വെള്ള ചേർക്കുന്നത് കൊഴുപ്പ് കുറയ്ക്കാൻ സഹായിക്കും. പിന്നീട് ഈന്തപ്പഴം, ഉണക്കമുന്തിരി, അണ്ടിപ്പരിപ്പ് എന്നിവ ചെറിയ അളവിൽ ചേർക്കുക. ആവശ്യത്തിന് ബേക്കിംഗ് പൗഡറും ഉപ്പും ചേർത്ത് ബേക്ക് ചെയ്തെടുക്കാം.

റാ​ഗി ചോക്ലേറ്റ് ലാവാ കേക്ക്

ചേരുവ

• റാഗി പൊടി-മുക്കാൽ കപ്പ്

• കൊക്കോ പൗഡർ-കാൽ കപ്പ്

• ഒലിവ് ഓയിൽ-രണ്ട് ടേബിൾ സ്പൂൺ

• ഈന്തപ്പഴത്തിന്റെ പൾപ്പ്/മേപ്പിൾ സിറപ്പ്-മധുരത്തിന് ആവശ്യത്തിന്

• ബദാം പാൽ-അര കപ്പ്

• ഷുഗർ-ഫ്രീ ഡാർക്ക് ചോക്ലേറ്റ് ചിപ്‌സ്-രണ്ട് ടേബിൾ സ്പൂൺ

തയ്യാറാക്കേണ്ട വിധം

റാഗി പൊടിയിൽ കാൽ കപ്പ് കൊക്കോ പൗഡർ ചേർത്ത് മിക്സ് ചെയ്യുക. രണ്ട് ടേബിൾ സ്പൂൺ ഒലിവ് ഓയിൽ അല്ലെങ്കിൽ ബദാം ബട്ടർ ചേർക്കാം ഈ മിക്സിലേക്ക് ചേർത്ത് നന്നായി യോജിപ്പിക്കാം. മധുരത്തിനായി ഈന്തപ്പഴത്തിന്റെ പൾപ്പോ അല്ലെങ്കിൽ മേപ്പിൾ സിറപ്പോ ഉപയോഗിക്കുന്നതാണ് നല്ലത്. അര കപ്പ് ബദാം പാൽ കൂടി ചേർത്ത് മാവ് തയ്യാറാക്കിയ ശേഷം, കേക്കിന്റെ ഉള്ളിലെ ലാവാ ഫില്ലിംഗിനായി രണ്ട് ടേബിൾ സ്പൂൺ ഷുഗർ-ഫ്രീ ഡാർക്ക് ചോക്ലേറ്റ് ചിപ്‌സ് ഉൾപ്പെടുത്തുക. ശേഷം ഇത് ബേക്ക് ചെയ്തെടുക്കാം.

ഓട്‌സ് ആൻഡ് ഫ്രൂട്ട്സ് മഗ് കേക്ക്

ചേരുവ

• ഓട്‌സ് പൊടി-നാല് ടേബിൾ സ്പൂൺ

• മുട്ട-ഒന്ന്

• ഗ്രീക്ക് യോഗർട്ട്-രണ്ട് ടേബിൾ സ്പൂൺ

• തേൻ അല്ലെങ്കിൽ സ്റ്റീവിയ- ആവശ്യത്തിന്

• ബേക്കിംഗ് പൗഡർ- അര ടീസ്പൂൺ

തയ്യാറാക്കേണ്ട വിധം

വളരെ പെട്ടെന്ന് തയ്യാറാക്കിയെടുക്കാവുന്ന ഒരു ഹെൽത്തി ഓപ്ഷനാണ് മഗ് കേക്ക്. ഓട്‌സ് പൊടിയാണ് പ്രധാനമായി വേണ്ടത്. ഒരു മുട്ടയും രണ്ട് ടേബിൾ സ്പൂൺ ഗ്രീക്ക് യോഗർട്ടും ചേർക്കുന്നത് പ്രോട്ടീൻ അളവ് കൂട്ടാൻ സഹായിക്കും. മധുരത്തിനായി ആവശ്യത്തിന് തേൻ അല്ലെങ്കിൽ സ്റ്റീവിയ ഉപയോഗിക്കുക. അര ടീസ്പൂൺ ബേക്കിംഗ് പൗഡർ ചേർത്ത് നന്നായി ഇളക്കിയ ശേഷം, ഒരു കപ്പിൽ മൈക്രോവേവിൽ വെച്ച് പെട്ടെന്ന് ബേക്ക് ചെയ്യാം. കേക്കിന്റെ മുകളിൽ സ്ട്രോബെറി, കിവി, ബ്ലൂബെറി തുടങ്ങിയ പഴങ്ങൾ ഉപയോഗിച്ച് അലങ്കരിക്കുന്നത് രുചിക്ക് നല്ലതാണ്.