കായിക താരങ്ങൾക്ക് മാത്രമല്ല, സാധാരണക്കാർക്കും ഉണ്ടാകാം; സ്പോർ‌ട്സ് ഇഞ്ച്വറി പലതരം

കളിക്കളത്തിൽ വീഴുന്ന ഓരോ കായികതാരത്തിനും ഉയർത്തെഴുന്നേൽക്കാൻ ഒരു കൈത്താങ്ങ് അത്യാവശ്യമാണ്. പരിക്കുകൾ ഒരു കായികതാരത്തിന്റെ കരിയറിന് തന്നെ അവാസനം കുറിക്കാറുണ്ട്. എന്നാൽ, ഈ വെല്ലുവിളികളെ ശാസ്ത്രീയമായി നേരിടാൻ ഇന്ന് സ്‌പോർട്‌സ് മെഡിസിൻ എന്ന ആധുനിക ചികിത്സാശാഖ സജീവമാണ്. കായികാധ്വാനം മൂലമുണ്ടാകുന്ന പരിക്കുകളെ ചികിത്സിക്കുകയും അവയെ ഫലപ്രദമായി തടയുകയും ചെയ്യുന്ന ഒരു വിദഗ്ദ്ധ മേഖലയാണിത്. കേവലം അത്‌ലീറ്റുകൾക്ക് മാത്രമല്ല, കായിക പ്രവർത്തനങ്ങളിൽ ഏർപ്പെടുന്ന ഏതൊരാൾക്കും പ്രയോജനകരമായ ഈ ശാസ്ത്രം, പരിക്കുകളെ പൂർണ്ണമായും ഭേദപ്പെടുത്തി പഴയതിലും കരുത്തോടെ ജീവിതത്തിലേക്ക് മടങ്ങിയെത്താൻ വഴിയൊരുക്കുന്നു.

സ്പോർട്സ് പരിക്കുകൾ

പരസ്പരം കൂട്ടിയിടിക്കുകയോ വീഴുകയോ ചെയ്യുമ്പോൾ മാത്രമല്ല പരിക്കുകൾ സംഭവിക്കുന്നത്. അതിന് പിന്നിൽ നിരവധി കാരണങ്ങളുണ്ട്. ക്രിക്കറ്റ് ഇതിഹാസം സച്ചിൻ ടെൻഡുൽക്കറെ ബാധിച്ച ടെന്നിസ് എൽബോ എന്ന അസുഖം എടുക്കാം. ടെന്നിസ് കളിക്കാർ മുതൽ അടുക്കളപ്പണി ചെയ്യുന്നവർക്ക് വരെ ഈ അസുഖം ഉണ്ടാം. പ്രത്യേകിച്ചും അടുക്കളപ്പണി ചെയ്യുന്നവരിലാണ് ഇത് കൂടുതലായി കണ്ടുവരുന്നത്. കൈത്തണ്ടയിലെ പേശികളുടെ ബലക്കുറവാണ് ടെന്നിസ് എൽബോയ്ക്ക് പ്രധാന കാരണം. കളിക്കളത്തിൽ ചുമൽ, കൈമുട്ട് എന്നിവ ശരിയായ രീതിയിൽ ഉപയോഗിക്കാത്തതും ഇതിന് കാരണമാകാം.

മരുന്നുകളും ചെറിയ വ്യായാമങ്ങളും ഉപയോഗിച്ച് ടെന്നിസ് എൽബോയെ എളുപ്പത്തിൽ മാറ്റാം. എന്നാൽ ഈ അസുഖം വീണ്ടും വരാൻ സാധ്യതയുണ്ട്. ഇവിടെയാണ് സ്പോർട്സ് മെഡിസിൻ വിദഗ്ദ്ധരുടെ പ്രാധാന്യം. സ്പോർട്സ് മെഡിസിൻ വിദഗ്ദ്ധർ ടെന്നിസ് എൽബോയുടെ അടിസ്ഥാന കാരണം കണ്ടെത്തി, രോഗം വീണ്ടും ഉണ്ടാകാതിരിക്കാൻ പാകത്തിലുള്ള ചികിത്സ നൽകും. ആരോഗ്യരംഗത്തെ വിദഗ്ദ്ധരുടെ സംയുക്ത ശ്രമമാണ് ഈ രോഗത്തെ പൂർണ്ണമായി മറികടക്കാൻ സഹായിക്കുന്നത്.

തോൾപിരിശൽ (Shoulder dislocation)

തോൾ സന്ധി മനുഷ്യശരീരത്തിലെ ഏറ്റവും ചലനശേഷിയുള്ള സന്ധിയാണ്. എന്നാൽ ഈ ചലനശേഷി കാരണം തന്നെ പരിക്കേൽക്കാനുള്ള സാധ്യതയും കൂടുതലാണ്. കായികതാരങ്ങൾക്കിടയിൽ തോൾപിരിശൽ ഒരു സർവ്വസാധാരണ പ്രശ്നമാണ്. തോൾ സന്ധിയിലെ അസ്ഥികൾ തമ്മിലുള്ള ബന്ധം താൽക്കാലികമായോ സ്ഥിരമായോ വിച്ഛേദിക്കപ്പെടുന്ന അവസ്ഥയാണ് തോൾപിരിശൽ. പെട്ടെന്നുള്ള ആഘാതം, അമിതമായ ചലനം, അല്ലെങ്കിൽ തുടർച്ചയായ ചലനങ്ങൾ എന്നിവ ഇതിന് കാരണമാകാം.

ലക്ഷണങ്ങൾ

• തോളിൽ അതിശക്തമായ വേദന

• തോൾ സന്ധിയിൽ അസ്ഥിരത അനുഭവപ്പെടുക

• തോൾ സന്ധിയുടെ ആകൃതിയിൽ പ്രകടമായ മാറ്റം

• തോൾ ചലനത്തിൽ പരിമിതി അനുഭവപ്പെടുക

കീഹോൾ സർജറി: തോൾപിരിശലിനുള്ള മികച്ച ചികിത്സ

കീഹോൾ സർജറി അഥവാ ആർത്രോസ്കോപ്പിക് സർജറി തോൾപിരിശലിന് ഏറ്റവും ഫലപ്രദവും അപകട സാധ്യത കുറഞ്ഞതുമായ ചികിത്സയാണ്. ചെറിയ മുറിവുകളിലൂടെ ചെറിയ കാമറയും ഉപകരണങ്ങളും ഉപയോഗിച്ച് സർജൻ തോൾ സന്ധിയെ പരിശോധിക്കുകയും ചികിത്സിക്കുകയും ചെയ്യുന്നു.

കീഹോൾ സർജറിയുടെ ​ഗുണങ്ങൾ:

• ചെറിയ മുറിവുകൾ

• കുറഞ്ഞ രക്തനഷ്ടം

• വേഗത്തിലുള്ള രോഗമുക്തി

• കുറഞ്ഞ വേദന

• മികച്ച ഫലം

മുട്ട്: നടക്കുക, ഓടുക, ചാടുക തുടങ്ങിയ എല്ലാ പ്രവർത്തനങ്ങൾക്കും അടിസ്ഥാനമാകുന്ന സന്ധിയാണ് മുട്ട്. എന്നാൽ ഈ സന്ധിക്ക് പലപ്പോഴും പരിക്കേൽക്കാറുണ്ട്. മുട്ടിനുള്ളിൽ പലതരം ലിഗമെന്റുകൾ ഉണ്ട്. ഇവ നമ്മുടെ മുട്ടിനെ ഒരു കോട്ട പോലെ സംരക്ഷിക്കുന്നു.

മുട്ടിന്റെ സംരക്ഷകർ:

• കൊളാറ്ററൽ ലിഗമെന്റുകൾ: മുട്ടിന്റെ ഇരുവശത്തായി സ്ഥിതി ചെയ്യുന്ന ഈ ലിഗമെന്റുകൾ മുട്ട് വശങ്ങളിലേക്ക് തെറ്റുന്നത് തടയുന്നു.

• ക്രൂശിയറ്റ് ലിഗമെന്റുകൾ: മുട്ടിനുള്ളിൽ കുരിശിന്റെ ആകൃതിയിൽ സ്ഥിതി ചെയ്യുന്ന ഈ ലിഗമെന്റുകൾ മുട്ടിന്റെ എല്ലുകൾ മുന്നോട്ടോ പിന്നോട്ടോ നീങ്ങുന്നത് തടയുന്നു.

• മെനിസ്കസ്: ഒരു കുഷൻ പോലെ പ്രവർത്തിക്കുന്ന മെനിസ്കസ് മുട്ടിലെ എല്ലുകൾ തമ്മിലുള്ള ഉരസൽ കുറയ്ക്കുന്നു.

• എംപിഎഫ്എൽ ലിഗമെന്റ്: കാൽമുട്ടിലെ ചിരട്ടയെ തുടയെല്ലിനോട് ചേർത്തു നിർത്തുന്ന ഈ ലിഗമെന്റ് പൊട്ടുന്നത് ചിരട്ട തെറ്റുവാൻ കാരണമാകും.

റോട്ടേറ്റർ കഫ്: തോളിന്റെ ആരോഗ്യത്തിന് അനിവാര്യം

തോൾ സന്ധിയെ ചുറ്റിപ്പറ്റി സ്ഥിതി ചെയ്യുന്ന പേശികളുടെ ഒരു കൂട്ടമാണ് റോട്ടേറ്റർ കഫ്. ഈ പേശികൾ തോളിന്റെ ചലനത്തെ സഹായിക്കുകയും സ്ഥിരത നൽകുകയും ചെയ്യുന്നു. റോട്ടേറ്റർ കഫ് കീറിപ്പോകൽ എന്നത് ഈ പേശികളിലൊന്നിന്റെ ടെൻഡൻ പൊട്ടുന്ന അവസ്ഥയാണ് ഇത് പെട്ടെന്നുള്ള അപകടത്തിലൂടെയോ അല്ലെങ്കിൽ കാലക്രമേണ ഉണ്ടാകുന്ന അമിത ഉപയോഗം മൂലമോ സംഭവിക്കാം. ഈ അവസ്ഥ തോളിലെ വേദന, ബലക്ഷയം, ചലനശേഷിയിലെ കുറവ് എന്നിവയ്ക്ക് കാരണമാകുന്നു. ചികിത്സയിൽ വിശ്രമം, ഐസ് പായ്ക്ക്, ഫിസിയോതെറാപ്പി, ചിലപ്പോൾ സർജറി എന്നിവ ഉൾപ്പെടാം.

പരിക്കുകൾ ഒഴിവാക്കാൻ ശ്രദ്ധിക്കേണ്ട കാര്യങ്ങൾ:

• ചിട്ടയായ വ്യായാമം: പേശികൾക്ക് ശക്തിയും ശരീരത്തിന് സമതുലിതാവസ്ഥയും വർധിപ്പിക്കുന്ന വ്യായാമങ്ങൾ കൃത്യമായി ചെയ്യുക.

• വാം-അപ്പ് നിർബന്ധമാക്കുക: എല്ലാ വ്യായാമങ്ങൾക്കും കായിക വിനോദങ്ങൾക്കും മുമ്പ് ശരീരത്തെ സജ്ജമാക്കാൻ വാം-അപ്പ് ചെയ്യുന്നത് പരിക്കുകൾ ഒഴിവാക്കാൻ സഹായിക്കും.

• കൂൾ ഡൗൺ ശീലമാക്കാം: വ്യായാമത്തിന് ശേഷം കൂൾ ഡൗൺ ചെയ്യുന്നത് പേശികളെ അയവുള്ളതാക്കാനും വീണ്ടെടുപ്പിനും സഹായിക്കുന്നു.

• ശരിയായ ഷൂസുകൾ: കായിക വിനോദങ്ങൾക്കായി ശരിയായ ഷൂസുകൾ തിരഞ്ഞെടുത്ത് ഉപയോഗിക്കുന്നത് പരിക്കുകൾ തടയും.

• ശരീരഭാരം നിയന്ത്രിക്കുക: അമിതവണ്ണം മുട്ടുകളിൽ അധിക സമ്മർദ്ദം ചെലുത്തും, അതിനാൽ ശരീരഭാരം നിയന്ത്രിക്കുന്നത് പ്രധാനമാണ്.

ഇന്ത്യയിൽ അനേകം കായിക താരങ്ങൾ അപ്രതീക്ഷിതമായി പരിക്കേറ്റ് തങ്ങളുടെ കരിയർ അവസാനിപ്പിക്കേണ്ടി വന്നിട്ടുണ്ട്. കായികരംഗം വളരെ വേഗത്തിൽ വളർന്നുകൊണ്ടിരിക്കുന്ന ഇക്കാലത്ത്, സ്പോർട്സ് മെഡിസിൻ കായികരംഗത്തിന്റെ അവിഭാജ്യ ഘടകമായി മാറേണ്ടത് അത്യാവശ്യമാണ്. പരിക്കിന്റെ ലക്ഷണങ്ങൾ അനുഭവപ്പെട്ടാൽ ഒരു ഓർത്തോപീഡിക് സർജനെ സമീപിക്കാൻ മടിക്കരുത്. നേരത്തെയുള്ള ചികിത്സ വേഗത്തിലുള്ള രോഗമുക്തിക്കും സന്ധിയുടെ ആരോഗ്യത്തിനും വളരെയധികം സഹായകമാകും.

തയ്യാറാക്കിയത്: ഡോ. പ്രിൻസ് ഷാനവാസ് ഖാൻ, സീനിയർ കൺസൾട്ടൻ്റ്, ഓർത്തോപീഡിക് വിഭാഗം, അപ്പോളോ അഡ്‌ലക്സ് ആശുപത്രി അങ്കമാലി