തേൻ പഴകുമോ? ക്രിസ്റ്റലായാൽ ഒഴിവാക്കരുത്, ദീർഘകാലം കേടാകാതിരിക്കാൻ ചില ടിപ്സ്

ഈജിപ്റ്റിലെ ഫറവോമാരുടെ ശവകുടീരങ്ങളിൽ വർഷങ്ങളോളം കേടുവരാത്ത തരത്തിൽ സൂക്ഷിച്ചിരിക്കുന്ന തേൻ ഭരണികൾ കണ്ടെടുത്തിട്ടുണ്ട്. എന്നാൽ കടയിൽ നിന്ന് വാങ്ങുന്ന തേൻ കുപ്പികൾക്ക് മുകളിൽ കൃത്യമായി എക്സ്പറി ഡേറ്റ് രേഖപ്പെടുത്തിയിട്ടുണ്ടാവും. ശരിക്കും തേനിന് എക്സ്പയറി ഡേറ്റ് ഉണ്ടോ? തേൻ ഫ്രിഡ്ജിൽ സൂക്ഷിക്കേണ്ടതുണ്ടോ? അങ്ങനെ പല മിത്തുകളും നമ്മുടെ നാട്ടിൽ തേനുമായി ബന്ധപ്പെട്ട് ഉണ്ടാകാറുണ്ട്.

ആരോഗ്യഗുണങ്ങൾ നിറഞ്ഞ പ്രകൃതിദത്ത മധുരമാണ് തേന്. ഭക്ഷണത്തിലൊരു ചേരുവയായും ഔഷധങ്ങളിലും തേൻ വ്യാപകമായി ഉപയോ​ഗിക്കുന്നു. ശുദ്ധമായ തേന് സാധാരണയായി വളരെക്കാലം കേടാകാതെ നിലനിൽക്കാൻ കഴിയും. അതിന്റെ കുറഞ്ഞ ജലാംശം, ഉയർന്ന പഞ്ചസാര അളവ്, സ്വാഭാവിക ആസിഡിറ്റി എന്നിവ കാരണം ബാക്ടീരിയകൾക്കും ഫംഗസുകൾക്കും വളരാൻ പ്രയാസമാണ്.

വാണിജ്യമായി വിൽക്കുന്ന തേൻ കുപ്പികളിൽ എക്സ്പയറി ഡേറ്റ് അല്ലെങ്കിൽ 'ബെസ്റ്റ് ബിഫോർ' തീയതി രേഖപ്പെടുത്തിയിട്ടുണ്ടാകും. ഇത് പ്രധാനമായും ഗുണനിലവാരത്തെ സൂചിപ്പിക്കുന്നതാണ്. ശരിയായ രീതിയിൽ സൂക്ഷിച്ചാൽ തേൻ വർഷങ്ങളോളം ഉപയോഗിക്കാൻ സാധിക്കും.

തേൻ ദീർഘകാലം നിലനിൽക്കുമെങ്കിലും ചില കാര്യങ്ങൾ അവയുടെ ഗുണനിലവാരം കുറയാം

• വെള്ളം കലരുന്നത്

• നനവുള്ള സ്പൂൺ ഉപയോഗിക്കുന്നത്

• കുപ്പി തുറന്നുവെക്കുന്നത്

• അമിത ചൂടിൽ സൂക്ഷിക്കുന്നത്

• വൃത്തിയില്ലാത്ത പാത്രങ്ങളിൽ മാറ്റിവെക്കുന്നത്

ഇത്തരം സാഹചര്യങ്ങളിൽ തേൻ പുളിക്കുകയോ രുചി മാറുകയോ ചെയ്യാം.

തേൻ ക്രിസ്റ്റലായി മാറുന്നത് സാധാരണമാണോ?

ചിലപ്പോൾ തേൻ കട്ടപിടിക്കുകയോ പഞ്ചസാരത്തരികൾ രൂപപ്പെടുകയോ ചെയ്യും. ഇതിനെ ക്രിസ്റ്റലൈസേഷൻ എന്നാണ് പറയുന്നത്. ഇത് തേൻ കേടായതിന്റെ ലക്ഷണമല്ല. കുപ്പി ചെറുചൂടുള്ള വെള്ളത്തിൽ കുറച്ചുനേരം വെച്ചാൽ തേൻ വീണ്ടും ദ്രാവകരൂപത്തിലാകും.

തേൻ സുരക്ഷിതമായി സൂക്ഷിക്കേണ്ട വിധം

വായു കടക്കാത്ത പാത്രത്തിൽ സൂക്ഷിക്കുക

കുപ്പിയുടെ മൂടി എല്ലായ്പ്പോഴും നന്നായി അടച്ചുവെക്കുക. ഇത് ഈർപ്പം അകത്തുകയറുന്നത് തടയും.

തണുത്തതും വരണ്ടതുമായ സ്ഥലത്ത് വെക്കുക

നേരിട്ടുള്ള സൂര്യപ്രകാശം ലഭിക്കാത്ത സ്ഥലമാണ് ഏറ്റവും നല്ലത്. അടുക്കളയിലെ ചൂടേറിയ ഭാഗങ്ങളിൽ നിന്ന് അകറ്റി സൂക്ഷിക്കുക.

നനവില്ലാത്ത സ്പൂൺ ഉപയോഗിക്കുക

വെള്ളമോ മറ്റ് ദ്രാവകങ്ങളോ കലർന്ന സ്പൂൺ ഉപയോഗിച്ചാൽ തേന്റെ ഗുണനിലവാരം കുറയാം.

ഫ്രിഡ്ജിൽ സൂക്ഷിക്കേണ്ടതില്ല

തേൻ ഫ്രിഡ്ജിൽ വെച്ചാൽ വേഗത്തിൽ ക്രിസ്റ്റലായി മാറാം. സാധാരണ മുറിയിലെ താപനിലയിൽ സൂക്ഷിക്കുന്നതാണ് ഉചിതം.

ഗ്ലാസ് പാത്രങ്ങൾ തിരഞ്ഞെടുക്കുക

ഗ്ലാസ് ജാറുകൾ തേൻ സൂക്ഷിക്കാൻ ഏറ്റവും അനുയോജ്യമാണ്. ഭക്ഷ്യയോഗ്യമായ ഉയർന്ന നിലവാരമുള്ള പ്ലാസ്റ്റിക് പാത്രങ്ങളും ഉപയോഗിക്കാം.

തേൻ കേടായെന്ന് എങ്ങനെ തിരിച്ചറിയാം?

• പുളിച്ച മണം

• അസാധാരണമായ രുചി

• നുര ഉയരുന്നത്

• കുപ്പിക്കുള്ളിൽ വാതകം രൂപപ്പെടുന്നത്

• പൂപ്പൽ കാണുന്നത്

ശരിയായ രീതിയിൽ സൂക്ഷിച്ചാൽ തേൻ വളരെക്കാലം കേടാകാതെ നിലനിൽക്കുന്ന അപൂർവ ഭക്ഷണപദാർഥങ്ങളിലൊന്നാണ്. വായു കടക്കാത്ത പാത്രം, ഈർപ്പമില്ലാത്ത സ്പൂൺ, നേരിട്ടുള്ള ചൂടിൽ നിന്ന് സംരക്ഷണം എന്നിവ പാലിച്ചാൽ തേന്റെ രുചിയും ഗുണങ്ങളും ദീർഘകാലം നിലനിർത്താം.