'ബ്ല്യൂട്ടി പാർലറിൽ പോകാനൊന്നും നേരമില്ലായിരുന്നു, അന്ന് ചർമം സംരക്ഷിച്ചത് ​ഗ്ലിസറിൻ'; ചില്ലറയല്ല നടി ഷീലയുടെ ഈ ബ്ല്യൂട്ട് ടിപ്പ്

ഇന്ന് ചർമസംരക്ഷണത്തിനായി വിലകൂടിയ പല ഉൽപന്നങ്ങളും വിപണിയിലുണ്ട്. ഏഴു മുതൽ പത്ത് ഘട്ടങ്ങളിലായി ചർമസംരക്ഷണദിനചര്യ പുരോ​ഗമിക്കുമ്പോൾ വർഷങ്ങൾക്ക് മുൻപ് ബ്ല്യൂട്ടി പാർലറിൽ പോലും പോകാതെ ഒരൊറ്റ പ്രോഡക്ട് കൊണ്ട് ചർമം തിളക്കിയ മാജിക് പഴയ നടി ഷീല പലപ്പോഴും അഭിമുഖങ്ങളിൽ പങ്കുവെച്ചിച്ചുണ്ട്. ആ മാജിക് വേറൊന്നുമല്ല, ​ഗ്ലിസറിൻ ആണ്. ​ഗ്ലിസറിനൊപ്പം വെളിച്ചെണ്ണ അല്ലെങ്കിൽ കറ്റാർവാഴയുടെ ജെല്ല് ചേർത്ത് മുഖത്തും കൈകളിലും പുരട്ടും. ഇത് മാത്രം മതി ചർമത്തിന് സ്വാഭാവിക തിളക്കം കിട്ടാനെന്നും ഷീല പറയുന്നു.

ഗ്ലിസറിനും സ്കിൻ കെയറും

ചർമസംരക്ഷത്തിൽ ഉപയോ​ഗിക്കുന്ന ഏറ്റവും ഫലപ്രദമായ സ്വാഭാവികവുമായ ഘടകങ്ങളിൽ ഒന്നാണ് ​ഗ്ലിസറിൻ. മോയിസ്ചറൈസറുകളിലും, ഫേയ്സ് ക്രീമുകളിലും സോപ്പിലുമൊക്കെ ​ഗ്ലിസറിൻ ചേർക്കാറുണ്ട്. ഇത് ചർമത്തിന് ഈർപ്പം നൽകുകയും ഒരു സംരക്ഷണ കവചമായി നിലനിൽക്കുകയും ചെയ്യുന്നു.

എന്താണ് ​ഗ്ലിസറിൻ

മണമില്ലാത്ത, ക്ലിയർ ആയ ഒരു സിറപ്പ് സ്വഭാവമുള്ള ദ്രാവകമാണ് ​ഗ്ലിസറിൻ. ഇത് സസ്യങ്ങളുടെ എണ്ണയിൽ നിന്നോ (vegetable glycerin), മൃ​ഗ കൊഴുപ്പിൽ നിന്നോ അല്ലെങ്കിൽ സിന്തറ്റിക് രീതിയിലോ നിർമിക്കാം. ​ഗ്ലിസറിൻ ഒരു ഹ്യൂമെക്ടന്റ് ആണ്. അതായത്, വായുവിൽ നിന്നോ ചർമത്തിന്റെ ആഴത്തിൽ നിന്നോ ഈർപ്പം ആകർഷിച്ച് ച‍ർമത്തിന്റെ മേൽപ്പാളിയിൽ നിലനിർത്തുന്നു.

ചർമത്തിന് ഗ്ലിസറിൻ നൽകുന്ന പ്രധാന ഗുണങ്ങൾ

ശക്തമായ മോയിസ്ചറൈസർ

​ഗ്ലിസറിൻ ചർമത്തിന് ഈർപ്പം നൽകാനും അത് ലോക്ക് ചെയ്യാനും സഹായിക്കുന്നു. ഇത് ചർമത്തെ ദിവസം മുഴുവൻ മൃദുവും ഈർപ്പമുള്ളതുമാക്കുന്നു.

വരണ്ട ചർമത്തിന് മികച്ചത്

വരണ്ട ചർമമുള്ളവർക്ക് ​ഗ്ലിസറിൻ ഉപയോ​ഗം ​ഗുണകരമാണ്. തൊലിപ്പുറത്തുണ്ടാകുന്ന അസ്വസ്ഥതകൾ, പൊട്ടൽ എന്നിവ കുറയ്ക്കാൻ ഇത് സഹായിക്കുന്നു.

ചർമത്തിന് സംരക്ഷണ കവചം

ചർമത്തിനൊരു സംരക്ഷണ കവചമില്ലെങ്കിൽ പൊടി, മലിനീകരണം പോലുള്ളവ എളുപ്പത്തിൽ ചർമത്തിൽ പ്രവേശിക്കാം. ​ഗ്ലിസറിൻ പുരട്ടുന്നതിലൂടെ ചർമത്തിന് ഒരു ശക്തമായ സംരക്ഷണ കവചം ഉണ്ടാകുന്നു.

ആന്റി-ഏജിങ് മാജിക്‌

മാത്രമല്ല, ചർമത്തിലെ വാർധക്യ ലക്ഷണങ്ങൾ തടയാനും ​ഗ്ലിസറിൻ നല്ലതാണ്. ചർമത്തിലെ ഈർപ്പം നിലനിർത്തുന്നതിലൂടെ മുഖത്തെ ചുളിവുകൾ കുറയുകയും ചർമം കൂടുതൽ യുവത്വമുള്ളതായി കാണപ്പെടുകയും ചെയ്യും.

സെൻസിറ്റീവ് ചർമമുള്ളവർക്ക്‌‌

കഠിനമായ കെമിക്കലുകൾ ഇല്ലാത്തതിനാൽ സെൻസിറ്റീവ് ചർമമുള്ളവർക്കും ഇത് സുരക്ഷിതമായി ഉപയോ​ഗിക്കാം.

ഗ്ലിസറിൻ എങ്ങനെ ഉപയോഗിക്കണം

​ഗ്ലിസറിൻ നേരിട്ട് ഉപയോ​ഗിക്കുന്നതിന് പകരം നേർപ്പിച്ച് ഉപയോ​ഗിക്കുന്നത് അവയുടെ സ്റ്റിക്കിയായ സ്വഭാവം കുറയ്ക്കാൻ സഹായിക്കും. ​ഗ്ലിസറിനിലേക്ക് വെള്ളം കലർത്തി (1:3 എന്ന കണക്കിൽ) ഫേസ് ടോണർ ആയി ഉപയോ​ഗിക്കാം.

ചർമത്തിന് സ്വാഭാവിക തിളക്കം കിട്ടുന്നതിന് ​ഗ്ലിസറിനൊപ്പം റോസ് വാട്ടർ ഉപയോ​ഗിക്കുന്നത് നല്ലതാണ്. അതുപോലെ ​ഗ്ലിസറിനിൽ കറ്റാർവാഴ ജെല്ല് ചേർക്കുന്നത് ചർമത്തിന് നല്ലതാണ്.

​എന്നാൽ ​ഗ്ലിസറിൽ അമിത അളവിൽ ഉപയോ​ഗിക്കുന്നതും ഒഴിവാക്കണം. ഇതിന് ഒരു സ്റ്റിക്കി സ്വാഭാവമുള്ളതിനാൽ അളവിൽ കൂടുന്നത്, പൊടി പോലുള്ളവ പറ്റിപ്പിടിക്കാൻ കാരണമാകും. അതുപോലെ എണ്ണമയമുള്ള ചർമക്കാർ, വളരെ കുറച്ചു മാത്രം ഉപയോ​ഗിക്കുക. അലർജി ഉണ്ടോയെന്ന് അറിയാൻ പാച്ച് ടെസ്റ്റ് ചെയ്യുന്നത് നല്ലതാണ്.

ഫേയ് ടോണർ വീട്ടിൽ തയ്യാറാക്കാം

ഒരു ടേബിൾ സ്പൂൺ ​ഗ്ലിസറിൻ, 3 ടേബിൾ സ്പൂൺ റോസ് വാട്ടർ (1:3) എന്നിവ മിക്സ് ചെയ്ത് സ്പ്രേ ബോട്ടിലിൽ സൂക്ഷിച്ച് ദിവസവും ഫേസ് ടോണർ ആയി ഉപയോഗിക്കാം. വളരെ ചെലവു കുറഞ്ഞ ചർമസംരക്ഷണ മാർ​ഗമാണ് ​ഗ്ലിസറിൻ, ശരിയായ രീതിയിൽ ഉപയോ​ഗിച്ചാൽ ഇത് ചർമത്തിന് ദീർഘകാല ഈർപ്പം, മൃദുത്വം, ആരോ​ഗ്യകരമായ തിളക്കം എന്നിവ നിലനിർത്താൻ സാധിക്കും.