ഓണം ഇങ്ങ് എത്തി, ഇലയിൽ 'അവിയൽ' എപ്പോൾ വിളമ്പണം

ഓണം ഇ​ങ്ങ് എത്താറായി..ഓണക്കോടിയും അത്തപ്പൂക്കളവുമൊക്കെയായി ആഘോഷം കളറാക്കാനുള്ള ഒരുക്കത്തിലാണ് ലോകത്തുള്ള മലയാളികളെല്ലാം. തിരുവോണ ദിവസത്തിൽ ഏറ്റവും വിശേഷപ്പെട്ടത് ഓണസദ്യ തന്നെയാണ്. സദ്യയിൽ പല പ്രമാണികളുണ്ടെങ്കിലും പച്ചക്കറികളുടെ വൈവിധ്യം ഇലയിലേക്ക് എത്തിക്കുന്ന ഒരു വിഭവമാണ് അവിയൽ. പുളിയും മസാലയും അമിതമല്ലാത്ത, തേങ്ങയുടെ രുചിയുള്ള അവിയൽ ചോറിനൊപ്പവും മറ്റ് കറികൾക്കൊപ്പവും കഴിക്കാം.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

പച്ചക്കറികൾ, തേങ്ങ, പച്ചമുളക്, ജീരകം, തൈര് എന്നിവ ചേർന്നുള്ള പ്രത്യേക രുചിയാണ് അവിയലിന്റെ മറ്റൊരു പ്രത്യേകത. വനവാസ കാലത്ത് പാണ്ഡവരിലെ ഭീമൻ കിട്ടിയ പച്ചക്കറികളെല്ലാം ഒന്നിച്ചു അരിഞ്ഞ് ചേർത്തുണ്ടാക്കിയ വിഭവമാണ് അവിയൽ എന്ന ഒരു ഐതിഹ്യമുണ്ട്. കാലക്രമേണ അവിയൽ കേരളത്തിന്റെ വിവിധ പ്രദേശങ്ങളിൽ വ്യത്യസ്ത രീതികളിൽ തയ്യാറാക്കപ്പെടാൻ തുടങ്ങി. ഇന്ന് ഓണസദ്യയിലെ ഒഴിച്ചുകൂടാനാകാത്ത വിഭവങ്ങളിലൊന്നാണ് അവിയൽ.

അവിയൽ എപ്പോഴാണ് വിളമ്പുന്നത്?

പരമ്പരാഗത ഓണസദ്യയിൽ വാഴയിലയുടെ ഇടതുവശത്താണ് അവിയൽ സാധാരണയായി വിളമ്പുന്നത്. സദ്യ വിളമ്പുമ്പോൾ ആദ്യം ഇലയിൽ വിവിധ കൂട്ടുകറികളും തോരനും അച്ചാറുകളും മറ്റ് വിഭവങ്ങളും നിരത്തുന്നതിനൊപ്പം അവിയലും വിളമ്പുന്നു. തുടർന്ന് സദ്യയിലെ പ്രധാന വിഭവമായ ചോറിനൊപ്പം അവിയൽ കഴിക്കാറുണ്ട്. പ്രത്യേകിച്ച് പരിപ്പ്, നെയ്യ് എന്നിവയ്ക്കു ശേഷവും സാംബാർ, രസം തുടങ്ങിയവയ്ക്കിടയിലും സദ്യയുടെ വിവിധ ഘട്ടങ്ങളിൽ അവിയൽ ചോറിനൊപ്പം കഴിക്കാം.

വെറുതെ ഒരു കറിയല്ല, ആരോ​ഗ്യ​ഗുണവുമുണ്ട്

പല പച്ചക്കറികളുടെ പോഷകഗുണം ഒരുമിച്ച്

കാരറ്റ്, പയർ, മുരിങ്ങക്കായ, ചേന, കുമ്പളങ്ങ, വെള്ളരിക്ക തുടങ്ങിയ പല പച്ചക്കറികളും അവിയലിൽ ഉപയോഗിക്കാറുണ്ട്. അതിനാൽ ഒരൊറ്റ വിഭവത്തിലൂടെ തന്നെ വിവിധ വിറ്റാമിനുകളും ധാതുക്കളും ലഭിക്കുന്നു.

ധാരാളം ഫൈബർ

പച്ചക്കറികളിലെ ഭക്ഷ്യനാരുകൾ ദഹനത്തിന് സഹായിക്കുകയും മലബന്ധം കുറയ്ക്കാനും കുടലിന്റെ ആരോഗ്യത്തിന് ഗുണകരമാകുകയും ചെയ്യും.

തേങ്ങയിൽ നിന്നുള്ള നല്ല കൊഴുപ്പ്

അവിയലിൽ ചേർക്കുന്ന തേങ്ങയിൽ കൊഴുപ്പും ഊർജവും ലഭിക്കുന്നു. എന്നാൽ തേങ്ങയും എണ്ണയും കൂടുതലായി ഉപയോഗിക്കാതെ മിതമായ അളവിൽ കഴിക്കുന്നതാണ് നല്ലത്.

തൈര് നൽകുന്ന ഗുണം

ചില രീതികളിൽ അവിയലിൽ തൈര് ചേർക്കാറുണ്ട്. തൈരിൽ പ്രോട്ടീനും കാൽസ്യവും ലഭിക്കും. തൈരിലെ ഗുണകരമായ ബാക്ടീരിയകൾ കുടൽ ആരോഗ്യത്തിനും സഹായകമായേക്കാം.

കുറച്ച് എണ്ണയിൽ തയ്യാറാക്കാം

വറുത്തെടുക്കേണ്ട ആവശ്യമില്ലാത്തതിനാൽ മറ്റു ചില സദ്യ വിഭവങ്ങളെ അപേക്ഷിച്ച് അവിയൽ താരതമ്യേന ലളിതമായി തയ്യാറാക്കാം.

ഓണസദ്യയിൽ അവിയൽ ഉൾപ്പെടുത്തുന്നത് പലതരം പച്ചക്കറികൾ ഒരുമിച്ച് ഭക്ഷണത്തിൽ ഉൾപ്പെടുത്താനുള്ള നല്ല മാർഗമാണ്. എന്നാൽ ആരോഗ്യഗുണം നിലനിർത്താൻ തേങ്ങ, ഉപ്പ്, തൈര് എന്നിവയുടെ അളവ് വ്യക്തിയുടെ ഭക്ഷണ ആവശ്യങ്ങൾക്കനുസരിച്ച് മിതമായി ഉപയോഗിക്കുന്നതാണ് ഉചിതം.