പാലും തൈരും കഴിക്കില്ല, വർക്ക്ഔട്ട് മുടങ്ങാതിരിക്കാൻ താമസിക്കുന്ന മുറിയിൽ പ്രത്യേകം ജിം സൗകര്യം, രജനീകാന്തിന്റെ ഫിറ്റ്നസ് രഹസ്യം

എഴുപത്തിയഞ്ചാം വയസ്സിലും ആക്ഷൻ രം​ഗങ്ങൾ ഉൾപ്പെടെ തകർത്താടി ആരാധകരുടെ മനം നിറച്ച് സ്റ്റൈൽ മന്നൻ രജനീകാന്ത്. ജയിലർ 2 തിയേറ്ററുകളിൽ വലിയ വിജയം കൊയ്യുമ്പോൾ തലൈവരുടെ ഫിറ്റ്നസ്സ് ആണ് മറ്റൊരു ചർച്ചാവിഷയം. ഊർജവും ശാരീരികക്ഷമതയും ആവശ്യമായ കഥാപാത്രങ്ങളാണ് അദ്ദേഹം ഇപ്പോഴും തിരഞ്ഞെടുക്കുന്നത്. അതിനായി ശരീരത്തെ അദ്ദേഹം ചിട്ടയായ ആരോഗ്യശീലങ്ങളിലൂടെയാണ് കൊണ്ടുപോകുന്നത്.

ജയിലർ 2 താരമായ മിർണ മേനോൻ കഴിഞ്ഞ ദിവസം നൽകിയൊരു അഭിമുഖത്തിൽ രജനീകാന്തിന്റെ ഫിറ്റ്നസ് ശീലങ്ങളെ കുറിച്ച് പങ്കുവച്ചിരുന്നു. രാവിലെ എഴുന്നേറ്റ ശേഷം വർക്ക്ഔട്ട് ചെയ്ത ശേഷമാണ് അദ്ദേഹം ഷൂട്ടിന് എത്തുന്നതെന്ന് മിർണ പറയുന്നു. ചിട്ടയായ ഭക്ഷണക്രമവും വ്യായാമ ശീലങ്ങളുമാണ് അദ്ദേഹം പിന്തുടരുന്നത്.

മാത്രമല്ല, ഷൂട്ടിങ് നടക്കുന്ന പല ലോക്കേഷനിലും ജിം സൗകര്യം ഉണ്ടാകണമെന്നില്ല. പക്ഷെ അദ്ദേഹം വ്യായാമം മുടങ്ങാതിരിക്കാൻ താമസിക്കുന്ന മുറിയിൽ വ്യായാമത്തിനുള്ള സാധനങ്ങളും സൗകര്യങ്ങളും ഒരുക്കുമെന്നും മിർണ പറയുന്നു.

അദ്ദേഹത്തിന് എരിവും എണ്ണയും കൂടുതലുള്ള ഭക്ഷണങ്ങൾ ഇഷ്ടമല്ലെന്ന് സെറ്റിൽ വെച്ച് കേട്ടിട്ടുണ്ട്. പാൽ, തൈര്, വെള്ളയരി, പഞ്ചസാര തുടങ്ങിയ വെളുത്ത ഭക്ഷണങ്ങൾ അദ്ദേഹം പൊതുവെ ഒഴിവാക്കാറുണ്ടെന്നും ലളിതവും ആരോ​ഗ്യകരവുമായ ഭക്ഷണത്തിനാണ് രജനീകാന്ത് മുൻ​ഗണന നൽകുന്നതെന്നും താരം പറഞ്ഞു.

രജനീകാന്തിന്റെ ഫിറ്റ്നസ് ദിനചര്യ

ദിവസം ആരംഭിക്കുന്നത് വ്യായാമത്തോടെ

രാവിലെ വ്യായാമം ചെയ്യുന്നത് രജനികാന്തിൻ്റെ പ്രധാന ശീലങ്ങളിലൊന്നാണ്. സ്ഥിരമായ വ്യായാമം ശരീരത്തിൻ്റെ സഹനശേഷി വർധിപ്പിക്കാനും പേശികളുടെ ശക്തി നിലനിർത്താനും ഹൃദയാരോഗ്യം മെച്ചപ്പെടുത്താനും സഹായിക്കും. പ്രായമായവരിൽ പടികൾ കയറുക, നടക്കുക തുടങ്ങിയ ദൈനംദിന പ്രവർത്തനങ്ങൾ കൂടുതൽ എളുപ്പമാക്കാനും ശാരീരിക പ്രവർത്തനങ്ങൾ സഹായകമാണ്.

നീന്തൽ

ശരീരത്തിലെ വിവിധ പേശികൾക്ക് ഒരേസമയം വ്യായാമം നൽകുന്നതിനൊപ്പം ഹൃദയമിടിപ്പ് വർധിപ്പിക്കാനും ഹൃദയാരോഗ്യം മെച്ചപ്പെടുത്താനും ഇത് സഹായിക്കുന്നു. നീന്തലിൻ്റെ പ്രധാന ഗുണങ്ങളിലൊന്ന് വെള്ളം ശരീരഭാരത്തിന്റെ വലിയൊരു പങ്ക് താങ്ങുന്നു എന്നതാണ്. ഇതുവഴി സന്ധികളിലെ സമ്മർദം കുറയ്ക്കാനാകും. അതിനാൽ പ്രായമായവർക്ക് സജീവമായി തുടരാനുള്ള നല്ലൊരു വ്യായാമമാർഗമായി നീന്തലിനെ പരിഗണിക്കാം.

ട്രെഡ്മില്ല്

രജനികാന്തിന്റെ വ്യായാമക്രമത്തിൽ ട്രെഡ്മില്ലും ഉൾപ്പെടുന്നു. ശരീരത്തിന്റെ സഹനശേഷി വർധിപ്പിക്കാനും പേശികളെ ശക്തിപ്പെടുത്താനും ഹൃദയത്തിന്റെയും ശ്വാസകോശത്തിന്റെയും പ്രവർത്തനം മെച്ചപ്പെടുത്താനും ഇത് സഹായിക്കും. ട്രെഡ്മില്ലിൽ തുടക്കകാർക്ക് സാവധാനത്തിൽ നടക്കാം. ശരീരത്തിന്റെ ക്ഷമത വർധിക്കുന്നതിനനുസരിച്ച് നടത്തത്തിന്റെ ദൈർഘ്യമോ വേഗമോ ക്രമേണ കൂട്ടാം.

ലളിതമായ ഭക്ഷണക്രമം

വ്യായാമത്തിനൊപ്പം കൃത്യവും ലളിതവുമായ ഭക്ഷണക്രമത്തിനും രജനികാന്ത് പ്രാധാന്യം നൽകുന്നു. അധിക പഞ്ചസാരയും ഉപ്പും അനാരോഗ്യകരമായ കൊഴുപ്പുകളും അടങ്ങിയ ഭക്ഷണങ്ങളുടെ ഉപയോഗം നിയന്ത്രിക്കുന്നത് മൊത്തത്തിലുള്ള ആരോഗ്യത്തിന് ഗുണകരമാണ്.

പ്രായം കൂടുമ്പോൾ പേശികളുടെ ശക്തി നിലനിർത്താൻ വ്യായാമം പ്രധാനമാണ്

നീന്തലും ട്രെഡ്മില്ലിലെ വ്യായാമവും ഹൃദയാരോഗ്യത്തിന് ഗുണകരമാണെങ്കിലും പ്രായമായവർക്ക് പേശികളുടെ ശക്തി നിലനിർത്തുന്ന വ്യായാമങ്ങളും ആവശ്യമാണ്. സ്വന്തം ശരീരഭാരം ഉപയോഗിച്ചുള്ള വ്യായാമങ്ങൾ, റെസിസ്റ്റൻസ് ബാൻഡുകൾ, ചെറിയ ഭാരങ്ങൾ ഉപയോഗിച്ചുള്ള പരിശീലനം എന്നിവ ഇതിൽ ഉൾപ്പെടുന്നു.

പേശികളുടെ അളവ് നിലനിർത്താനും എല്ലുകളുടെ ആരോഗ്യം സംരക്ഷിക്കാനും ശരീരത്തിന്റെ സന്തുലിതാവസ്ഥയും ചലനശേഷിയും മെച്ചപ്പെടുത്താനും ഇത്തരം വ്യായാമങ്ങൾ സഹായിക്കും. പ്രായം കൂടുമ്പോൾ പേശികളുടെ ശക്തി കുറയുന്നത് ദൈനംദിന പ്രവർത്തനങ്ങളെയും സ്വതന്ത്രമായി ജീവിക്കാനുള്ള കഴിവിനെയും ബാധിക്കാം. അതിനാൽ പേശികളുടെ കരുത്ത് നിലനിർത്തുന്നത് പ്രധാനമാണ്.