'കൂടെക്കൂടെ മധുരം കഴിക്കാനുള്ള തോന്നൽ'; 5 കാരണങ്ങൾ

കുട്ടിക്കാലം മുതൽ മിഠായി പൊതിയായും പായസമായും പലഹാരങ്ങളായുമൊക്കെ മധുരം നമുക്കൊരു ശീലമാണ്. ഈ ശീലം നമുക്ക് മധുരത്തോടുള്ള ആസക്തി വർധിപ്പിക്കാം. മധുരത്തോളുടെ നമ്മുടെ ആസക്തി പ്രമേഹം മാത്രമല്ല, ഫാറ്റി ലിവർ, ഹൃ​ദ്രോ​ഗങ്ങൾ തുടങ്ങി നിരവധി ആരോ​ഗ്യപ്രശ്നങ്ങളിലേക്ക് നയിക്കും. മധുരത്തോട് ഇത്തരത്തിൽ ആസക്തി ഉണ്ടാകാൻ നിരവധി കാരണങ്ങളുണ്ട്. എന്തൊക്കെയാണ് ഇതിൽ പ്രധാനമെന്ന് നോക്കാം.

മധുരം കഴിക്കുമ്പോള്‍ ശരീരത്തില്‍ ഡോപ്പമിന്‍, സെറോടോണിന്‍ പോലുള്ള ന്യൂറോട്രാന്‍സ്‌മിറ്ററുകള്‍ ഉൽപാദിപ്പിക്കപ്പെടുന്നു. ഫീൽ ​ഗുഡ് ഹോര്‍മോണുകള്‍ എന്നറിയപ്പെടുന്ന ഇവയുടെ ഉത്‌പാദനം നമ്മുടെ മാനസികാവസ്ഥ മെച്ചപ്പെടുത്തുകയും സന്തോഷം തോന്നിപ്പിക്കുകയും ചെയ്യുന്നു. അതിനാൽ തന്നെ വീണ്ടും വീണ്ടും ഈ സന്തോഷം ലഭിക്കാനായി ശരീരം മധുരം തേടിക്കൊണ്ടിരിക്കും. സെറോടോണിന്‍ തോത്‌ കുറയ്‌ക്കുന്ന സാഹചര്യങ്ങളായ വിഷാദരോഗം, മൂഡ്‌ പ്രശ്‌നങ്ങള്‍, ആര്‍ത്തവവിരാമം, ആര്‍ത്തവത്തിന്‌ മുന്‍പ്‌ ബുദ്ധിമുട്ടുകളുണ്ടാക്കുന്ന പ്രീ മെന്‍സ്‌ട്രുവല്‍ സിന്‍ഡ്രോം, നിരന്തരമായ മദ്യപാനം എന്നിവയെല്ലാം മധുരത്തോടുള്ള കൊതി വര്‍ധിപ്പിക്കും.

ആവശ്യത്തിന്‌ ഉറക്കമില്ലാത്ത അവസ്ഥ വിശപ്പും സംതൃപ്‌തിയും നല്‍കുന്ന ഹോര്‍മോണുകളായ ഗ്രെലിനെയും ലെപ്‌റ്റിനെയും ബാധിക്കുകയും ഇത് മധുരത്തോടുള്ള ആസക്തി വർധിക്കാൻ കാരണമാവുകയും ചെയ്യാം. മധുരം കഴിക്കുന്നത് ഗ്രെലിന്റെ അളവ് വർധിപ്പിക്കുമെന്ന് പഠനങ്ങൾ സൂചിപ്പിക്കുന്നു.

വിവിധ ദഹനനാളത്തിൻ്റെ പ്രശ്നങ്ങൾ, കുടൽ വീക്കം, കുടലിൻ്റെ മോശം ആരോഗ്യം എന്നിവയും മധുരത്തോടുള്ള ആസക്തിക്ക് കാരണമാകാം. രോഗകാരികളായ കുടൽ ബാക്ടീരിയകളെ മധുരം പോഷിപ്പിക്കുന്നു. ഇത് പലതരത്തിലുള്ള ആരോ​ഗ്യപ്രശ്നങ്ങളിലേക്ക് നയിക്കാം.

പ്രധാനമായും ബി വിറ്റാമിനുകളുടെ അഭാവം ഇത്തരത്തിൽ മധുരത്തോട് ആസക്തി ഉണ്ടാക്കും. ബി 1 (തയാമിൻ), ബി 2 (റൈബോഫ്ലേവിൻ), ബി 3 (നിയാസിൻ), ബി12, അല്ലെങ്കിൽ ബി 5 (പാൻ്റോതെനിക് ആസിഡ്) എന്നിവയുടെ കുറവ് മധുരത്തോട് ആസക്തി ഉണ്ടാക്കും. ഊർജ്ജം നിലനിർത്താൻ ബി വിറ്റാമിനുകൾ സഹായിക്കും.

പ്രമേഹ രോഗികളില്‍ രക്തത്തിലെ പഞ്ചസാരയുടെ അളവ്‌ കൂടുതലായി താഴേക്ക്‌ പോകുന്നത്‌ മധുരത്തോടുള്ള അമിതമായ ആസക്തി സൃഷ്ടിക്കും. മധുരം കഴിക്കുമ്പോള്‍ ഇത്‌ വന്‍തോതില്‍ വര്‍ധിക്കുന്നത്‌ വലിയ വ്യതിയാനങ്ങള്‍ പഞ്ചസാരയുടെ തോതില്‍ ഉണ്ടാക്കാം. ഈ വ്യതിയാനങ്ങള്‍ ശരീരഭാരം വര്‍ധിപ്പിക്കുന്നതിലേക്ക് നയിക്കാം.