പുകയില പ്രധാന വില്ലൻ; രാജ്യത്ത് യുവാക്കൾക്കിടയിൽ ഹെഡ് ആൻഡ് നെക്ക് കാൻസർ കൂടുന്നു

രാജ്യത്ത് യുവാക്കൾക്കിടയിൽ ഹെഡ് ആൻഡ് നെക്ക് കാൻസർ കേസുകൾ കുത്തനെ വർധിക്കുന്നതായി പഠനം. ഇന്ത്യയിലെ 26 ശതമാനം കാൻസർ രോ​ഗികളും കഴുത്തിലോ തലയിലോ ട്യൂമര്‍ ഉള്ളവരാണെന്ന് ഡൽഹി ആസ്ഥാനമായി പ്രവർത്തിക്കുന്ന കാൻസർ മുക്ത് ഭാരത് ഫൗണ്ടേഷൻ നടത്തിയ പഠനത്തിൽ പറയുന്നു. രാജ്യത്തെ 1869 കാൻസർ രോ​ഗികളെ കേന്ദ്രീകരിച്ചാണ് പഠനം നടത്തിയത്. ഹെഡ് ആൻഡ് നെക്ക് കാൻസറിന്റെ പ്രധാന വില്ലൻ പുകയില ഉപയോ​ഗവും എച്ച്പിവി വൈറസുകളുടെ വ്യാപനവുമാണെന്ന് പഠനത്തിൽ പറയുന്നു.

ഇന്ത്യയിൽ പുതിയ കാൻസർ കേസുകളുടെ എണ്ണം 2040 ആകുമ്പോഴേക്കും 21 ലക്ഷത്തിലെത്തുമെന്നാണ് ​ഗ്ലോബോകാൻ 2020-യുടെ പ്രവചനം. 2020തിലെ കണക്കിനെക്കാൾ 57.5 ശതമാനമാണ് വർധന. ചെവി, മൂക്ക്, വായ, ചുണ്ടുകൾ, നാവ്, തൊണ്ട,കവിൾ, ഉമിനീർ ഗ്രന്ധികൾ തുടങ്ങിയ അവയവങ്ങളെ ബാധിക്കുന്ന അർബദമാണ് ഹെഡ് ആൻഡ് നെക്ക് കാൻസർ എന്ന ഒറ്റ വിഭാ​ഗത്തിൽ ഉൾപ്പെടുത്തുന്നത്. ഇന്ത്യയിൽ പുരുഷന്മാരിൽ ഏറ്റവും സാധാരണയായി കാണപ്പെടുന്ന വായയിൽ അർബുദം ഉള്ള എൺപതു മുതൽ തൊണ്ണൂറു ശതമാനം രോ​ഗികളും ഏതെങ്കിലും തരത്തിൽ പുകയില ഉപയോ​ഗിക്കുന്നവരാണെന്നും പഠനത്തില്‍ പറയുന്നു.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ഹെഡ് ആൻഡ് നെക്ക് കാന്‍സര്‍ ലക്ഷണങ്ങള്‍

രോഗം ബാധിക്കുന്ന അവയവത്തിന് അനുസരിച്ച് രോഗലക്ഷണങ്ങളിൽ മാറ്റം വരാം. നാവിനും, കവിളിലുമുണ്ടാകുന്ന നിറ വ്യത്യാസം, വിട്ടുമാറാത്ത തൊണ്ട വേദന, പുണ്ണ്, ഉണങ്ങാത്ത മുറിവുകൾ, ഭക്ഷണം കഴിക്കുമ്പോൾ തൊണ്ടയിൽ അനുഭവപ്പെടുന്ന തടസം, ശ്വാസ തടസം, ശബ്ദത്തിലുണ്ടാകുന്ന വ്യത്യാസം, മുഴകൾ തുടങ്ങിയവയാണ് പൊതുവേ കാണപ്പെടുന്ന ലക്ഷണങ്ങൾ.

ഹെഡ് ആൻഡ് നെക്ക് കാൻസറിന് കാരണം

ഹെഡ് ആൻഡ് നെക്ക് കാൻസർ മിക്കപ്പോഴും നമ്മൾ ക്ഷണിച്ചു വരുത്തുന്നതാണ്. സിഗരറ്റ്, ബീഡി, വെറ്റില ഉൾപ്പടെയുള്ള പുകയില ഉൽപന്നങ്ങളുടെ ഉപയോഗമാണ് ഇതിന് പ്രധാന കാരണം. കൂടാതെ സ്ഥിരമായ മദ്യപാനവും ഹെഡ് ആൻഡ് നെക്ക് കാൻസറിന് കാരണമാകാം. ഇവ രണ്ടുമല്ലാതെ പൊതുവെ കാണപ്പെടുന്ന മറ്റൊരു കാരണമാണ് മൂർച്ച കൂടിയ പല്ലുകൾ വായിൽ സൃഷ്ടിക്കുന്ന ഉണങ്ങാത്ത മുറിവുകൾ. നീണ്ട കാലം ഉണങ്ങാതെ നിലനിൽക്കുന്ന ഇത്തരം മുറിവുകൾ കാൻസറായി മാറാനുള്ള സാധ്യതയുണ്ട്.

ഹ്യൂമൻ പാപ്പിലോമ (എച്ച്പിവി) എന്ന വൈറസും ഹെഡ് & നെക്ക് കാൻസറിന്റെ ഒരു കാരണമായി കണ്ടെത്തിയിട്ടുണ്ട്. ഓറൽ സെക്സ് വഴി ഈ വൈറസ് ബാധിക്കാനുള്ള സാധ്യത കൂടുതലാണ്. ഹ്യുമൻ പാപ്പിലോമ വെെറസിനെ നേരിടാൻ ഇന്ന് പ്രതിരോധ കുത്തിവെപ്പ് ലഭ്യമാണ്.

ഹെഡ്&നെക്ക് കാൻസറുകൾ ആദ്യഘട്ടത്തിലോ, രണ്ടാംഘട്ടത്തിലോ ആണ് കണ്ടെത്തുന്നതെങ്കിൽ 80 ശതമാനം രോ​ഗികളിലും ചികിത്സിച്ച് ഭേദമാക്കാം. ജീവിതശൈലിയിൽ മാറ്റങ്ങൾ വരുത്തുന്നതിലൂടെ 40 ശതമാനം അർബുദങ്ങളെയും പ്രതിരോധിക്കാമെന്ന് അടുത്തിടെ ലോകാരോ​ഗ്യസംഘടന പുറത്തുവിട്ട റിപ്പോർട്ടിൽ വ്യക്തമാക്കുന്നു. 'പ്രിവൻഷൻ ഈസ് ബെറ്റർ ദാൻ ക്യുവർ' എന്നതാണ് ഹെഡ് ആൻഡ് നെക്ക് കാൻസറുകളെ പ്രതിരോധിക്കാൻ അടിസ്ഥാനപരമായി ചെയ്യേണ്ടത്.