ശരീരത്തിൽ സിങ്ക് കുറഞ്ഞാൽ കുടൽ പ്രശ്നമാക്കും; ശ്രദ്ധിക്കേണ്ട കാര്യങ്ങൾ

കുടലിന്റെ സുപ്രധാന സെൻസർ പ്രോട്ടീനും സിങ്കുമായി ബന്ധമുണ്ടെന്ന് പുതിയ പഠനം. നെച്ചർ കമ്മ്യൂണിക്കേഷൻസിൽ പ്രസിദ്ധീകരിച്ച പഠനത്തിലാണ് ഇക്കാര്യം പറയുന്നത്. സിങ്കിന്റെയും ഏരിയൽ ഹൈഡ്രോകാർ ബൺ റിസപ്റ്റർ (എഎച്ച്ആർ) എന്ന സെൻസറിന്റെയും പങ്കിനെ കേന്ദ്രീകരിച്ചായിരുന്നു പഠനം. സിങ്ക് അടങ്ങിയ ഭക്ഷണം കഴിക്കുന്നതിലൂടെ ഇൻഫ്‌ളമേറ്ററി ബവൽ ഡിസീസ് പോലുള്ള കുടലിനെ ബാധിക്കുന്ന പ്രശ്‌നങ്ങൾ ലഘൂകരിക്കാമെന്നും പഠനത്തിൽ കണ്ടെത്തി. 

അതേസമയം സിങ്കിന്റെ അളവ് കൂടിയാലോ കുറഞ്ഞാലോ അത് നമ്മുടെ കുടലിന്റെ ആരോഗ്യത്തെ ബാധിക്കും. സിങ്കിന്റെ അളവിൽ വ്യത്യാസം വരുന്നത് കുടലിൽ മൈക്രോബുകളുടെ തോതിന് മാറ്റം വരുത്താം. ഇത് വയറിളക്കത്തിനും വയറുവീക്കത്തിനും കാരണമാകാം. സിങ്ക് അടങ്ങിയ ഭക്ഷണങ്ങൾ ഡയറ്റിൽ ഉൾപ്പെടുത്തേണ്ടത് പ്രധാനമാണ്. 

സിങ്ക് അടങ്ങിയ ഭക്ഷണങ്ങൾ

പോർക്ക്, ബീഫ്, മട്ടൻ തുടങ്ങിയ മാംസാഹാരങ്ങൾ. 100 ഗ്രാം ബീഫിൽ 4.79 മില്ലിഗ്രാം സിങ്ക് അടങ്ങിയിട്ടുണ്ട്. ഇത് പ്രതിദിനം പുരുഷന്മാർക്ക് വേണ്ടതിന്റെ 44 ശതമാനവും സ്ത്രീകൾക്ക് വേണ്ടതിന്റെ 60 ശതമാനവുമാണ്. ചെമ്മീൻ, ചിപ്പി. ചെറിയ കക്ക തുടങ്ങിയവയും സിങ്കിന്റെ കലവറയാണ്. 

ചെറുപയർ, പയർ, ബീൻസ് തുടങ്ങിയ പയർവർഗങ്ങളിലും ഗണ്യമായ അളവിൽ സിങ്ക് അടങ്ങിയിരിക്കുന്നു. ഇത് വേവിച്ചും മുളപ്പിച്ചും കഴിക്കുന്നത് നല്ലതാണ്. കശുവണ്ടി, ബദാം, മത്തങ്ങ വിത്തുകൾ, വാൾനട്ട് തുടങ്ങിയവയിലും സിങ്ക് അടങ്ങിയിട്ടുണ്ട്. ധാരാളം ഫൈബറും വിറ്റാമിനുകളും അടങ്ങിയ നട്‌സ് കഴിക്കുന്നത് ക്യാൻസർ, ഹൃദ്രോഗം എന്നിവയുൾപ്പെടെയുള്ള ചില രോഗങ്ങൾക്കുള്ള അപകടസാധ്യത ഘടകങ്ങൾ കുറയ്ക്കാനും സഹായിക്കും. 

പ്രോട്ടീനുകളും സിങ്കും മറ്റ് വിറ്റാമിനുകളും അടങ്ങിയ മുട്ടയും പാലും കഴിക്കുന്നതും പതിവാക്കാം. ചീസ്, ഗോതമ്പ്, അരി, ഓട്‌സ് തുടങ്ങിയവയിലും ധാരളം സിങ്ക് അടങ്ങിയിട്ടുണ്ട്. പച്ചക്കറിയിലും പഴ വർഗങ്ങളിലും സിങ്ക് അടങ്ങിയിട്ടുണ്ട്. ഡാർക്ക് ചോക്ലേറ്റ് കഴിക്കുന്നതും ശരീരത്തിൽ സിങ്കിന്റെ അളവ് കൂട്ടാൻ സഹായിക്കും.

ഈ വാര്‍ത്ത കൂടി വായിക്കൂ 

പുറത്തു മാത്രമല്ല വീടിനകവും പ്രശ്‌നം; കരുതിയില്ലെങ്കിൽ അപകടം, ഇന്ന് ലോക ശ്വാസകോശാരോഗ്യ ദിനം

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ