കൊളസ്ട്രോള്‍ വരുതിയിലാക്കും, ചര്‍മത്തിനും മികച്ചത്; സൂര്യകാന്തി വിത്തുകളെ ഡയറ്റിൽ ചേർക്കാം ഇങ്ങനെ

പോഷകങ്ങളുടെ പവർ ഹൗസ് എന്നാണ് വിത്തുകള്‍ അറിയപ്പെടുന്നത്. എന്നാൽ വളരെ അടുത്തകാലം മുതലാണ് വിത്തുകൾ നമ്മുടെ ഭക്ഷണക്രമത്തിന്റെ പ്രധാന ഭാ​ഗമായി തുടങ്ങിയത്. സൂര്യകാന്തി വിത്തുകൾ, ചിയ വിത്തുകൾ, മത്തങ്ങ‌‌ വിത്തുകൾ, ഫ്ലാക്സ് വിത്തുകൾ തുടങ്ങിയവ സാലഡിലും സൈഡ് ഡിഷിലും ചേർത്ത് പോഷകസമൃദ്ധമാക്കാറുണ്ട്.

ധാരാളം പോഷകങ്ങള്‍ അടങ്ങിയ വിത്താണ് സൂര്യകാന്തി വിത്തുകള്‍. ഇതില്‍ അടങ്ങിയ മോണോ, പോളിഅണ്‍സാച്ചുറേറ്റഡ് കൊഴുപ്പുകള്‍ ഹൃദയാരോഗ്യം സംരംക്ഷിക്കുന്നതില്‍ നല്ല സ്വാധീനം ചെലുത്തും.

സൂര്യകാന്തി വിത്തുകളുടെ ഗുണങ്ങള്‍

പോഷകങ്ങൾ

ധാരാളം ആന്റിഓക്സിഡന്റുകളാൽ സമ്പന്നമാണ് സൂര്യകാന്തി വിത്തുകൾ. ഇവയിൽ അടങ്ങിയ ആന്റിഓക്സിഡന്റുകളും വിറ്റാമിൻ ഇയും കോശങ്ങളുടെ കേടുപാടുകളിൽ നിന്ന് സംരക്ഷിക്കാനും രോ​ഗപ്രതിരോധ പ്രവർത്തനങ്ങൾ പ്രോത്സാഹിപ്പിക്കാനും ചർമത്തിന്റെ ആരോ​ഗ്യം മെച്ചപ്പെടുത്താനും സഹായിക്കുന്നു. കൂടാകെ ഊർജ്ജ ഉപാപചയത്തിന് അത്യന്താപേക്ഷിതമായ ബി 1 (തയാമിൻ), തലച്ചോറിൻ്റെ ആരോഗ്യത്തിനും മാനസികാവസ്ഥ നിയന്ത്രിക്കുന്നതിനും അത്യന്താപേക്ഷിതമായ ബി 6 എന്നിവയുൾപ്പെടെ നല്ല അളവിൽ ബി വിറ്റാമിനുകളും സൂര്യകാന്തി വിത്തുകളിൽ അടങ്ങിയിട്ടുണ്ട്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

കൂടാതെ മുടി വളര്‍ച്ചയ്ക്ക് ആവശ്യുമുള്ള സിങ്ക്, ഒമേഗ 3 ഫാറ്റി ആസിഡുകള്‍ എന്നിവ ഇതില്‍ ധാരാളമായി അടങ്ങിയിട്ടുണ്ട്. കൂടാതെ ഇതിലടങ്ങിയിരിക്കുന്ന സെലിനിയം മാനസികാരോഗ്യം കൈവരിക്കുന്നതിലും വിഷാദം മെച്ചപ്പെടുത്തുന്നതിലും സഹായിക്കുമെന്ന് ആരോഗ്യ വിദഗ്ധര്‍ പറയുന്നു.

ഡയറ്ററി ഫൈബർ

സൂര്യകാന്തി വിത്തുകളില്‍ അടങ്ങിയിരിക്കുന്ന നാരുകള്‍ രക്തത്തിലെ എല്‍ഡിഎല്‍ കൊളസ്‌ട്രോളിന്റെ അളവ് കുറയ്ക്കാന്‍ സഹായിക്കും. സൂര്യകാന്തി വിത്തുകളില്‍ അടങ്ങിയിരിക്കുന്ന നിയാസിന്‍ മൊത്തം കൊളസ്‌ട്രോള്‍ നിലയെ നിയന്ത്രിക്കുന്നു. കൂടാതെ ഹൃദ്രോഗ സാധ്യതയും ഇത് കഴിക്കുന്നത് വഴി കുറയ്ക്കാന്‍ സാധിക്കും. കൂടാതെ നാരുകള്‍ ദഹന ആരോഗ്യത്തെയും മെച്ചപ്പെടുത്തുന്നു. മലവിസർജ്ജനം നിയന്ത്രിക്കാനും മലബന്ധം തടയാനും ആരോഗ്യകരമായ ഗട്ട് മൈക്രോബയോം നിലനിർത്താനും നാരുകൾ സഹായിക്കുന്നു.

സൂര്യകാന്തി വിത്തുകള്‍ സാലഡിനൊപ്പമോ സ്മൂത്തിയിലോ ചേര്‍ത്ത് കഴിക്കുന്നത് രുചികരം മാത്രമല്ല പോഷകസമൃദ്ധവുമാണ്.