ടിവി കണ്ടു കൊണ്ട് ഭക്ഷണം കഴിക്കുന്ന ശീലമുണ്ടോ? ഭക്ഷണം കൃത്യമായി വായിലേക്ക് പോകുന്നുണ്ടെല്ലോ പിന്നെ, അതിലെന്താണ് ഇത്ര അനാരോഗ്യകരമെന്ന് ചിന്തിക്കാം. എന്നാൽ ഇത്തരത്തിൽ നിസാരമെന്ന് നമ്മൾ കരുതുന്ന പല ശീലങ്ങളും നമ്മുടെ ആരോഗ്യവും ആയുസും കുറയ്ക്കുന്നതാണ്. ടിവി ആസ്വദിച്ച് പാത്രത്തിലെ ഭക്ഷണം മുഴുവന്‍ അകത്താക്കുമ്പോള്‍ ശരീരത്തിന് വേണ്ടതിലും അധികം ഭക്ഷണമായിരിക്കാം നമ്മള്‍ കഴിക്കുന്നത്, വ്യായമം ചെയ്യേണ്ടത് അനിവാര്യമാണെങ്കിലും ഇത് പരിധിവിട്ടാലും അപകടമാണ്. ഇത്തരത്തില്‍ ആരോഗ്യം വീണ്ടെടുക്കാന്‍ ശീലങ്ങളില്‍ വരുത്തേണ്ട ചില മാറ്റങ്ങള്‍ അറിയാം.
വിശപ്പില്ലാതെ ഭക്ഷണം കഴിക്കുന്നത്
കൃത്യസമയത്ത് ഭക്ഷണം കഴിക്കുന്ന ശീലം നല്ലതാണ്. എന്നാല്‍, നേരത്തെ കഴിച്ച ഭക്ഷണം ദഹിക്കുന്നതിന് മുമ്പ് അടുത്തത് കഴിക്കുന്ന അവസ്ഥ ഉണ്ടാകാം. ഇത് ദഹനപ്രക്രിയയെ ബുദ്ധിമുട്ടിലാക്കും. കഴിച്ച ഭക്ഷണം ദഹിച്ചു എന്നുള്ളതിന്റെ സൂചനയാണ് വിശപ്പ്. വിശപ്പ് തോന്നാതെ ഭക്ഷണം കഴിക്കുന്നത് കരളിനെ സമ്മര്‍ദത്തിലാക്കും. അതുകൊണ്ട് വിശക്കുമ്പോള്‍ ഭക്ഷണം കഴിക്കുന്നതാണ് നല്ലത്. എല്ലാ നേരവും ഭക്ഷണം കഴിക്കുന്ന രീതിയില്‍ ഭക്ഷണത്തിന്റെ അളവ് ക്രമീകരിക്കാനും ശ്രദ്ധിക്കണം.
താമസിച്ചുള്ള ഉറക്കം
രാത്രി വൈകി ഉറങ്ങുന്ന ശീലവും നല്ലതല്ല. ഇത് ദഹനപ്രക്രിയയെയും ശരീരം പോഷകങ്ങള്‍ സ്വീകരിക്കുന്നതിനെയുമെല്ലാം പ്രതികൂലമായി ബാധിക്കും. രാത്രി താമസിച്ച് ഉറങ്ങുന്നതിന് പകരം രാവിലെ നേരത്തെ എഴുന്നേറ്റ് ആ സമയം ഫലപ്രദമായി ഉപയോഗിക്കാം. രാത്രി 10 മണിക്കും പുലര്‍ച്ചെ രണ്ട് മണിക്കും ഇടയിലാണ് മെറ്റബോളിസം തീവ്രമായി നടക്കുന്നത്. അതുകൊണ്ട് വൈകുനേരം ഏഴ് മണിയോടെ ഭക്ഷണം കഴിച്ച് ഉറങ്ങാന്‍ തയ്യാറെടുക്കുന്നതാണ് നല്ലത്. താമസിച്ച് ഉറങ്ങുന്നത് നല്ല ഉറക്കം നഷ്ടപ്പെടുത്തും. മാത്രമല്ല മാനസിക ബുദ്ധിമുട്ടുകളും വിറ്റാമിന്‍ കുറവും ദഹനപ്രശ്‌നങ്ങളുമെല്ലാം ഉണ്ടാക്കും.
രാത്രി 9 മണിക്ക് ശേഷമുള്ള ഭക്ഷണം
പല ആരോഗ്യപ്രശ്‌നങ്ങളുടെയും മൂലകാരണങ്ങളില്‍ ഒന്ന് വൈകിയുള്ള ഭക്ഷണം കഴിപ്പാണ്. വൈകി ഭക്ഷണം കഴിക്കുന്നത് മെറ്റബോളിസത്തെ തടസപ്പെടുത്തുകയും ക്രമേണ പ്രമേഹം, ഉയര്‍ന്ന കൊളസ്‌ട്രോള്‍ തുടങ്ങിയ വിട്ടുമാറാത്ത രോഗങ്ങളെ ക്ഷണിച്ചുവരുത്തുകയും ചെയ്യും. അതേസമയം, നേരത്തെ ഭക്ഷണം കഴിക്കുന്നത് പല ജീവിതശൈലി രോഗങ്ങളെയും തടയുകയും മികച്ച ആരോഗ്യം സമ്മാനിക്കുകയും ചെയ്യും.
ഒരു സമയം പല കാര്യങ്ങള്‍ ചെയ്യുന്നത്
ഒന്നിച്ച് പല കാര്യങ്ങള്‍ ചെയ്യുന്നത് നമ്മളെ നിരാശരാക്കാറുണ്ട്. ചിലര്‍ ഇത് അമിതമായി ചെയ്യുന്നതുകൊണ്ടു തന്നെ പല ആരോഗ്യപ്രശ്‌നങ്ങളും ഉണ്ടാകും. ഇത് നിങ്ങളുടെ മാനസികാരോഗ്യത്തെയും പ്രതികൂലമായി ബാധിക്കുന്നതാണ്. ഓരേ സമയം പല കാര്യങ്ങള്‍ ചെയ്യുന്നത് സമ്മര്‍ദം കൂട്ടുകയും രോഗപ്രതിരോധശേഷിയെ ബാധിച്ച് ജീവിതശൈലി രോഗങ്ങള്‍ക്ക് കാരണമാകുകയും ചെയ്യും. ഒരു സമയം ഒരു കാര്യം ചെയ്യുന്നത് ആ പ്രവര്‍ത്തി മികച്ച രീതിയില്‍ ചെയ്തു തീര്‍ക്കാന്‍ സഹായിക്കുകയും നിങ്ങളുടെ സമ്മര്‍ദ്ദം കുറയ്ക്കുകയും ചെയ്യും.
അമിത വ്യായാമം
ആരോഗ്യത്തോടെയിരിക്കാന്‍ ശാരീരിക പ്രവര്‍ത്തനങ്ങളില്‍ ഏര്‍പ്പെടേണ്ടത് അനിവാര്യമാണ്. പക്ഷെ, അതിനര്‍ത്ഥം ശരീരം തരുന്ന സൂചനകളെ അവഗണിച്ച് മുന്നോട്ടുപോകണം എന്നല്ല. ആവശ്യത്തിന് വ്യായാമം ചെയ്തുവേണം മുന്നോട്ടുനീങ്ങാന്‍. ചെയ്യാവുന്നതിനേക്കാള്‍ കൂടുതല്‍ വ്യായാമത്തില്‍ ഏര്‍പ്പെടുന്നത് നിങ്ങളെ തളര്‍ത്തും. ഇത് പല അസുഖങ്ങളും ക്ഷണിച്ചുവരുത്തുകയും ചെയ്യും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
