ഹൃദയമിടിപ്പിൽ ഏറ്റക്കുറച്ചിൽ, രോ​ഗനിർണയം വൈകുന്നത് പക്ഷാഘാതത്തിന് കാരണമാകാം; എന്താണ് ഏട്രിയൽ ഫൈബ്രിലേഷൻ?

ഹൃദയമിടിപ്പിന് ഏറ്റക്കുറച്ചിലും വ്യതിയാനവും സംഭവിക്കുന്ന അവസ്ഥയാണ് ഏട്രിയൽ ഫൈബ്രിലേഷൻ. നിശബ്ദ കൊലയാളി എന്നാണ് ഈ അവസ്ഥയെ ആരോ​ഗ്യവിദ​ഗ്ധർ വിശേഷിപ്പിക്കുന്നത്. ഇത് ഹൃദയത്തിൽ രക്തം കട്ടപിടിക്കുന്നതിന് ഇടയാക്കാം. രോ​ഗനിർണയം വൈകുന്നത് പക്ഷാഘാതം, ഹൃദയസ്തംഭനം പോലുള്ള സങ്കീർണതകളിലേക്ക് നയിക്കാമെന്ന് വിദ​ഗ്ധർ പറയുന്നു.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

രാജ്യത്ത് ഏകദേശം 80 ലക്ഷത്തോളം ആളുകൾ ഏട്രിയൽ ഫൈബ്രിലേഷൻ എന്ന അവസ്ഥയുമായി ജീവിക്കുന്നുവെന്നാണ് ജിബിഡി (Global Burden of Disease) കണക്കുകൾ സൂചിപ്പിക്കുന്നത്. എന്നാൽ ഇതിൽ ഭൂരിഭാ​ഗം ആളുകൾക്കും തങ്ങൾക്ക് ഇത്തരം ഒരു അവസ്ഥയുണ്ടെന്ന് തിരിച്ചറിയാതെ പോകുന്നവെന്നതാണ് ആശങ്കയുണ്ടാക്കുന്ന മറ്റൊരു കാര്യം.

ഏട്രിയൽ ഫൈബ്രിലേഷൻ ബാധിതരുടെ എണ്ണം മുൻപ് ഉണ്ടായിരുന്നതിനെക്കാൾ ക്രമാതീതമായി വർധിച്ചു വരികയാണെന്ന് ഡെന്മാർക്കിലെ ആൽബോർ​ഗ് സർവകലാശാല ​ഗവേഷകർ നടത്തിയ പഠനം പറയുന്നു. പ്രായപൂർത്തിയായവരിൽ നാലിലൊന്നു പേരെ മാത്രമേ ഈ അവസ്ഖ ബാധിക്കുയെന്ന് മുൻധാരണയെ തിരുത്തുന്നതായിരുന്നു പുതിയ പഠനം.

ഏട്രിയൽ ഫൈബ്രിലേഷൻ ഉണ്ടായിട്ടുള്ള അഞ്ചിൽ രണ്ടു പേർക്കും ഹൃദയാരോ​ഗ്യം മോശമാകാമെന്നും അ‍ഞ്ചിൽ ഒരാൾക്ക് പക്ഷാഘാതം സംഭവിക്കാമെന്നും പഠനത്തിൽ ചൂണ്ടിക്കാണിക്കുന്നു. പ്രായം, അമിതവണ്ണം, ഉയർന്ന രക്തസമ്മർദം, പ്രമേഹം എന്നിയൊക്കെ ഏട്രിയൽ ഫൈബ്രിലേഷൻ എന്ന അവസ്ഥയെ ട്രി​ഗർ ചെയ്യാം. സാധാരണ മെഡിക്കൽ ചെക്കപ്പുകളിൽ നിന്ന് ഏട്രിയൽ ഫൈബ്രിലേഷൻ കണ്ടെത്താനാകില്ല.

ഇസിജി, ഹോൾട്ടർ മോണിറ്റർ പരിശോധന തുടങ്ങിയവയിലൂടെ മാത്രമേ കണ്ടെത്താനാകൂ. അതിനാൽ തന്നെ പലപ്പോഴും ഏട്രിയൽ ഫൈബ്രിലേഷൻ തിരിച്ചറിയപ്പെടാതെ പോവുകയും ഗുരുതരാവസ്ഥയിലെത്തുമ്പോൾ മാത്രം രോഗസ്ഥിരീകരണം നടത്തുകയും ചെയ്യാറുണ്ട്.

ഏട്രിയൽ ഫൈബ്രിലേഷൻ ലക്ഷണങ്ങൾ

• അമിതവേഗത്തിലുള്ള ഹൃദയമിടിപ്പ്

• നെഞ്ചുവേദന

• ക്ഷീണം

• വ്യായാമം ചെയ്യാൻ കഴിയാതിരിക്കുക

• ശ്വാസതടസ്സം

• തളർച്ച

ചിലരിൽ ഈ ലക്ഷണങ്ങൾ പ്രകടമായില്ലെന്നും വരാം. ചിലരിൽ ഏതാനും മിനിറ്റുകൾ മുതൽ മണിക്കൂറുകൾ വരെ ലക്ഷണങ്ങളുണ്ടാകാം. ചിലപ്പോൾ ആഴ്ചകളോളം നീണ്ടുനിൽക്കാം.

ഹൃദ​യാരോ​ഗ്യത്തിന് ശീലമാക്കേണ്ട കാര്യങ്ങൾ

• ജങ്ക് ഫുഡ് കഴിവതും ഒഴിവാക്കുക.

• വ്യായാമം ശീലമാക്കാം.

• പുകവലി ഉപേക്ഷിക്കുക.

• ഉപ്പ്, മധുരം എന്നിവ കഴിവതും കുറയ്ക്കുക.

• സമീകൃതമായ ഭക്ഷണം ശീലമാക്കാം, ഇലക്കറികളും പഴവർഗ്ഗങ്ങളും ധാരാളം ഉൾപ്പെടുത്താം.

• അമിതമായ മദ്യപാനം നിർത്തുക, പാൻമസാല, പുകയില എന്നിവയുടെ ഉപയോഗം നിർത്തുക.

• ചൂടാക്കിയ എണ്ണയുടെ ഉപയോഗം നിർത്തുക, എണ്ണ അമിതമായി ഉപയോഗിക്കാതിരിക്കുക.

• എല്ലാ ദിവസവും പറ്റുമെങ്കിൽ ആഴ്ചയിൽ 45-60 മിനിറ്റ് വ്യായാമം ചെയ്യുക

• 20 മിനിറ്റിൽ കൂടുതൽ ഒരു സ്ഥലത്ത് വെറുതെ ഇരിക്കരുത്.

• ബി.പി., ഷുഗർ, കൊളസ്ട്രോൾ തുടങ്ങിയവ ഇടയ്ക്ക് പരിശോധിച്ച് ചികിത്സവേണമെങ്കിൽ സ്വീകരിക്കുക.