നഖം നോക്കി ആരോഗ്യം അറിയാം; നിറത്തിലും ഘടനയിലും വ്യത്യാസമുണ്ടായാല്‍ ശ്രദ്ധിക്കണം

പലരുടെയും ആത്മവിശ്വാസത്തിന്റെ ഭാ​ഗമാണ് നല്ല ഭം​ഗിയുള്ള നഖങ്ങൾ. നഖങ്ങൾ നീട്ടി വളർത്തി നെയിൽ പോളിഷ് പുരട്ടി നഖങ്ങൾ എപ്പോഴും സുന്ദരമായി സൂക്ഷിക്കാൻ പ്രത്യേകിച്ച് പെൺകുട്ടികൾ ശ്രമിക്കാറുണ്ട്. എന്നാൽ സൗന്ദര്യത്തിന് പുറമെ നഖങ്ങൾ നമ്മളുടെ ആരോ​ഗ്യത്തിന്റെ ജനാലകൾ കൂടിയാണെന്നാണ് ആരോ​ഗ്യ വിദ​ഗ്ധർ വിശേഷിപ്പിക്കുന്നത്. നഖങ്ങളുടെ നിറം, ആകൃതി, ഘടന എന്നിവയിലൂടെ നിങ്ങളുടെ ആരോഗ്യം തിരിച്ചറിയാൻ സാധിക്കും. നഖങ്ങളിലെ നിറവ്യത്യാസം, ഘടനാവ്യത്യാസം എന്നിവ പോഷകക്കുറവിന്‍റെയും ആരോ​ഗ്യപ്രശ്നങ്ങളുടെയും ലക്ഷണങ്ങളാകാം.

ചർമ്മത്തിന്റെ ഭാ​ഗമാണ് നഖങ്ങളും. പ്രോട്ടീൻ കെരാറ്റിൻ പാളികളാൽ നിർമിതമാണ് നഖങ്ങൾ. പുതിയ കോശങ്ങൾ വളരുമ്പോൾ പഴയ കോശങ്ങൾ കഠിനവും ഒതുക്കമുള്ളതുമാകുകയും ഒടുവിൽ വിരൽത്തുമ്പിലേക്ക് നീണ്ടു വളരുകയും ചെയ്യുന്നു. ആരോ​ഗ്യമുള്ള നഖങ്ങൾ പിങ്ക് നിറത്തിൽ ഒരോ ആകൃതിയിലാകും ഉണ്ടാവുക.

നഖങ്ങളിൽ ഉണ്ടാകുന്ന ഈ മാറ്റങ്ങൾ ശ്രദ്ധിക്കുക

• കൊയിലോണിയ (സ്പൂൺ ആകൃതിയിലുള്ള നഖങ്ങൾ): ഇത് പലപ്പോഴും ശരീരത്തിൽ ഇരുമ്പിന്റെ കുറവുമൂലമാണ് സംഭവിക്കുന്നത്. ഇത് വിളർച്ച, ഹീമോക്രോമാറ്റോസിസ്, ല്യൂപ്പസ് എറിത്തമറ്റോസസ് എന്നി ആരോ​ഗ്യ പ്രശ്നങ്ങളുമായി ബന്ധപ്പെട്ടു കിടക്കുന്നു.

• ഒനിക്കോളിസിസ് (നഖം പൊളിഞ്ഞു പോകുന്നു): സോറിയാസിസ്, ഫംഗസ് അണുബാധ (ഒനികോമൈക്കോസിസ്), ഹൈപ്പർതൈറോയിഡിസം എന്നിവയുടെ ലക്ഷണമായി കണക്കാക്കുന്നു.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ക്ലബിംഗ്: ക്രോണിക് ഒബ്‌സ്ട്രക്റ്റീവ് പൾമണറി ഡിസീസ് (സിഒപിഡി), ശ്വാസകോശ അർബുദം, ഹൃദ്രോഗം അല്ലെങ്കിൽ എൻഡോകാർഡിറ്റിസ് പോലുള്ള ഹൃദയ സംബന്ധമായ അസുഖങ്ങളുമായി ബന്ധപ്പെട്ടിരിക്കുന്നു.

ല്യൂക്കോണിച്ചിയ (നഖങ്ങളിലെ വെളുത്ത പാടുകൾ): സിങ്കിന്റെ കുറവോ ഫം​ഗസ് അണുബാധ കാരണമോ ആകാം നഖങ്ങളിൽ വെളുത്ത പാടുകൾ ഉണ്ടാവുന്നത്.

യെല്ലോ നെയിൽ സിൻഡ്രോം: നഖങ്ങൾ മഞ്ഞനിറത്തിലാവുക, നഖങ്ങളുടെ വളർച്ച മന്ദഗതിയിലാവുക, ലിംഫോഡീമ എന്നിവ പലപ്പോഴും ക്രോണിക് ബ്രോങ്കൈറ്റിസ്, സൈനസൈറ്റിസ് തുടങ്ങിയ രോഗങ്ങളുമായി ബന്ധപ്പെട്ടിരിക്കുന്നു.

നഖങ്ങൾ എങ്ങനെ സംരക്ഷിക്കാം

• നഖങ്ങൾ വെട്ടി വൃത്തിയായി സൂക്ഷിക്കുക. ഇത് നഖത്തിനടിയിൽ ബാക്ടീരിയകൾ വളരുന്നത് തടയുന്നു

• വെള്ളവുമായുള്ള ആവർത്തിച്ചുള്ള സമ്പർക്കം നഖങ്ങൾ പിളരുന്നതിന് കാരണമാകും. പാത്രങ്ങളും തുണിയും കഴുകുമ്പോഴും രാസവസ്തുക്കൾ ഉപയോഗിക്കുമ്പോഴും കയ്യുറകൾ ധരിക്കുക.

• പതിവായി മോയ്സ്ചറൈസർ ഉപയോഗിക്കുക. ഹാൻഡ് ലോഷൻ ഉപയോഗിക്കുമ്പോൾ, ലോഷൻ നിങ്ങളുടെ നഖങ്ങളിലും പുറംതൊലിയിലും പുരട്ടുക.

ചെയ്യാൻ പാടില്ലാത്തത്

• ഇടയ്‌ക്കിടയ്‌ക്ക് നഖങ്ങൾ കടിക്കുന്ന ശീലം ഒഴിലാക്കണം. ഇത് ബാക്ടീരിയ അല്ലെങഅകിൽ ഫം​ഗസ് അണുബാധയ്‌ക്ക് കാരണമാകും.

• നഖ സംരക്ഷണ ഉൽപ്പന്നങ്ങൾ ഉപയോ​ഗിക്കുമ്പോൾ ശ്രദ്ധിക്കുക. നെയിൽ പോളിഷ് റിമൂവറിൻ്റെ ഉപയോഗം പരിമിതപ്പെടുത്തുക. നെയിൽ പോളിഷ് റിമൂവർ ഉപയോഗിക്കുമ്പോൾ, അസെറ്റോൺ രഹിത ഫോർമുല തിരഞ്ഞെടുക്കുക.

• പെഡിക്യൂർ ചെയ്യുമ്പോൾ നഖങ്ങൾ പിന്നിലേക്ക് തള്ളുകയോ പുറംതൊലി നീക്കം ചെയ്യുകയോ ചെയ്യരുത്.

• നഖങ്ങളിലേക്കുള്ള ഓക്സിജൻ വിതരണം കുറയ്ക്കുന്നതിനാൽ പുകവലി ഒഴിവാക്കുക

• നീണ്ടകാലം നഖങ്ങളിലെ വ്യത്യാസങ്ങൾ നിലനിന്നാൽ തീർച്ചയായും വൈദ്യസഹായം തേടുക.

• ഇറുകി പാദരക്ഷകൾ ഇടുന്നതും നഖങ്ങൾ നഷ്ടപ്പെടാൻ കാരണമാകും.