13-ാം സീസണിലെ ആദ്യ വിക്കറ്റ് രോഹിത് ശർമ്മയുടേത്, ധോണിയുടെ മാസ്റ്റർമൈൻഡ്

ഐപിൽ ആവേശത്തിന് തുടക്കമിട്ടുകൊണ്ട് 13-ാം സീസണിലെ ആദ്യ മത്സരത്തിൽ നേർക്കുനേർ പോരാടുകയാണ് ചെന്നൈ സൂപ്പർ കിങ്‌സും മുംബൈ ഇന്ത്യൻസും. അബുദാബിയിലെ ഷെയ്ക് സയിദ് സ്റ്റേഡിയത്തിലാണ് മുംബൈ-ചെന്നൈ മത്സരം. ടോസ് നേടിയ ചെന്നൈ ബൗളിങ് തിരഞ്ഞെടുത്തു. നിലവിൽ അഞ്ച്‌ വിക്കറ്റ് നഷ്ടത്തിൽ 124 റൺസാണ് മുംബൈയുടെ സ്കോർ.

ഐപിഎൽ സീസണിലെ ആദ്യ വിക്കറ്റ് മുംബൈ ക്യാപ്റ്റൻ രോഹിത് ശർമയുടേതാണ്. ആദ്യ ബോൾ ബൗണ്ടറി പായിച്ച് രോഹിത് ​ഗംഭീര തുടക്കമിട്ടപ്പോൾ, നാല് ഓവറിൽ വിക്കറ്റൊന്നും നഷ്ടപ്പെടാതെ 45 റൺസ് മുംബൈ സ്കോർബോർഡിൽ ചേർത്തു. അഞ്ചാം ഓവർ എറിയാൻ സ്പിന്നർ പിയുഷ് ചൗളയെ ഏൽപ്പിച്ച ധോണിയുടെ മാസ്റ്റർമൈൻഡ് ഫലംകണ്ടു. പന്ത് മിഡ് ഓഫിലേക്ക് ഉയർത്തിയടിച്ച രോഹിത്തിന്റെ ഇന്നിങ്സ് സാം കറന്റെ കൈകളിൽ അവസാനിച്ചു.

അഞ്ചാം കിരീടം ലക്ഷമിട്ടാണ് മുംബൈയിറങ്ങുന്നതെങ്കിൽ കഴിഞ്ഞ വർഷത്തെ ഫൈനൽ പരാജയത്തിന്റെ മധുരപ്രതികാരവുമായാണ് ചെന്നൈയുടെ വരവ്. കഴിഞ്ഞ സീസണിൽ അവസാന പന്തിൽ ഒരു റണ്ണിന് ചെന്നൈ സൂപ്പർ കിങ്സിനെ തോൽപ്പിച്ചായിരുന്നു മുംബൈയുടെ കിരീട നേട്ടം.