ക്യൂന്‍സ് ലാന്‍ഡ്: ഫോം കണ്ടെത്താനാവാതെ വലയുകയാണ് ഇന്ത്യന്‍ ബാറ്റര്‍ ഹര്‍മന്‍പ്രീത് കൗര്‍. അതിനിടയില്‍ മൂന്നാം ഏകദിനത്തില്‍ ന്യൂസിലന്‍ഡിന് എതിരെ ഹര്‍മന്‍ പുറത്തായത് വിചിത്രമായ രീതിയില്‍.
ഇന്ത്യന്‍ ഇന്നിങ്‌സിന്റെ 28ാം ഓവറിലാണ് സംഭവം. ഓഫ് ബ്രേക്ക് ബൗളറായ ഫ്രാന്‍സെസ് മക്കേയുടെ ഡെലിവറിയില്‍ ട്രാക്കിന് പുറത്തേക്ക് വന്ന ഹര്‍മന്‍പ്രീത് പന്ത് പുഷ് ചെയ്ത് ഇട്ടു. പന്ത് തിരികെ ബൗളറുടെ നേരെ എത്തി.
എന്നാല്‍ പന്ത് ന്യൂസിലന്‍ഡ് ബൗളര്‍ തിരികെ സ്റ്റംപിന് നേരെ എറിഞ്ഞു. പന്ത് സ്റ്റംപ് തൊടുമ്പോള്‍ ഹര്‍മന്‍ ക്രീസിന് പുറത്തും. ഇന്ത്യ-ന്യൂസിലന്‍ഡ് മത്സരം സംപ്രേഷണം ചെയ്യുന്ന ആമസോണ്‍ പ്രൈം ആണ് ഹര്‍മന്റെ വിക്കറ്റ് വീണ വീഡിയോ സമൂഹമാധ്യമങ്ങളില്‍ പങ്കുവെച്ചത്.
പറയാന്‍ 2017ലെ 171 റണ്‍സ് മാത്രം
സ്‌കോര്‍ ഉയര്‍ത്താന്‍ സാധിക്കാത്തതിനെ തുടര്‍ന്ന് ഹര്‍മന്‍പ്രീതിന്റെ ടീമിലെ സ്ഥാനം തന്നെ ചോദ്യം ചെയ്യപ്പെടുകയാണ്. 2017ലെ ലോകകപ്പില്‍ ഓസ്‌ട്രേലിയക്കെതിരെ 171 റണ്‍സ് കണ്ടെത്തിയതിന് ശേഷം മികച്ച ഇന്നിങ്‌സുകളൊന്നും ഹര്‍മനില്‍ നിന്ന് വന്നിട്ടില്ല എന്നതാണ് വിമര്‍ശനങ്ങള്‍ക്ക് ഇടയാക്കുന്നത്.
ഇന്ത്യക്ക് വേണ്ടി 109 ഏകദിനമാണ് ഇതുവരെ ഹര്‍മന്‍പ്രീത് കളിച്ചത്. നേടിയത് 2588 റണ്‍സ്. 34.0 ആണ് ബാറ്റിങ് ശരാശരി. എന്നാല്‍ ഹര്‍മന്‍പ്രീത് കൗറിന് ഇനി ടീമില്‍ സ്ഥാനം നിലനിര്‍ത്തുക എന്നത് വലിയ വെല്ലുവിളിയാവും.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
