രാജ്‌കോട്ട്: സൗത്ത് ആഫ്രിക്കയ്ക്ക് എതിരായ ട്വന്റി20 പരമ്പരയില്‍ 2-2 ഒപ്പമെത്തി ഇന്ത്യ. രാജ്‌കോട്ടില്‍ നടന്ന നാലാം ട്വന്റി20യില്‍ 82 റണ്‍സിനാണ് ഇന്ത്യയുടെ ജയം. ദിനേശ് കാര്‍ത്തിക്കിന്റെ ബാറ്റിങ്ങും പ്ലേയിങ് ഇലവനിലെ സ്ഥാനം നഷ്ടപ്പെടും എന്ന നിലയില്‍ നില്‍ക്കെ 4 വിക്കറ്റ് വീഴ്ത്തിയ ആവേശ് ഖാനുമാണ് ഇന്ത്യയെ ജയത്തിലേക്ക് എത്തിച്ചത്.
ഇന്ത്യ മുന്‍പില്‍ വെച്ച 170 റണ്‍സ് പിന്തുടര്‍ന്ന സൗത്ത് ആഫ്രിക്കയ്ക്ക് 16.5 ഓവറില്‍ 87 റണ്‍സ് മാത്രമാണ് കണ്ടെത്താനായത്. ബവുമ റിട്ടയേര്‍ഡ് ഹര്‍ട്ടായതും ഡികോക്ക് റണ്‍ഔട്ടായതും സൗത്ത് ആഫ്രിക്കയെ പിന്നോട്ടടിച്ചു. അപകടകാരികളാള പ്രിടോറിയസിനേയും ദുസനേയും ആവേശ് ഖാന്‍ മടക്കി. ദുസനേയും ജസന്‍സെനേയും കേശവ് മഹാരാജിനേയും തന്റെ ഒരോവറിലാണ് ആവേശ് ഖാന്‍ മടക്കിയത്. ക്ലാസെന്‍ ചഹലിന്റെ പന്തില്‍ വിക്കറ്റിന് മുന്‍പില്‍ കുടുങ്ങി മടങ്ങി. ഡേവിഡ് മില്ലറെ ഹര്‍ഷല്‍ പട്ടേലും മടക്കി.
സൗത്ത് ആഫ്രിക്കന്‍ നിരയില്‍ രണ്ടക്കം കടന്നത് മൂന്ന് പേര്‍
20 റണ്‍സ് എടുത്ത ദുസനാണ് സൗത്ത് ആഫ്രിക്കയുടെ ടോപ് സ്‌കോറര്‍. സൗത്ത് ആഫ്രിക്കന്‍ നിരയില്‍ രണ്ടക്കം കടന്നത് മൂന്ന് പേര്‍ മാത്രം. 4 ഓവറില്‍ 18 റണ്‍സ് മാത്രം വഴങ്ങിയാണ് ആവേശ് ഖാന്‍ നാല് വിക്കറ്റ് വീഴ്ത്തിയത്. ചഹല്‍ രണ്ട് വിക്കറ്റും ഹര്‍ഷല്‍ പട്ടേല്‍, അക്ഷര്‍ പട്ടേല്‍ എന്നിവര്‍ ഓരോ വിക്കറ്റ് വീതവും വീഴ്ത്തി.
ആദ്യ രണ്ട് മത്സരവും തോറ്റ് പരമ്പര നഷ്ടമാവും എന്ന നിലയില്‍ നിന്നാണ് ഇന്ത്യ തിരികെ കയറിയത്. ഇതോടെ ഞായറാഴ്ച ബംഗളൂരുവില്‍ നടക്കുന്ന അവസാന ട്വന്റി20യില്‍ ജയിക്കുന്ന ടീം പരമ്പര സ്വന്തമാക്കും. ഡല്‍ഹിയിലും കട്ടക്കിലും നടന്ന ആദ്യ രണ്ട് മത്സരങ്ങളില്‍ സൗത്ത് ആഫ്രിക്കയാണ് ജയിച്ചു കയറിയത്.
ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഇന്ത്യയെ 15 ഓവര്‍ വരെ വരിഞ്ഞ് മുറുക്കാന്‍ സൗത്ത് ആഫ്രിക്കന്‍ ബൗളര്‍മാര്‍ക്ക് കഴിഞ്ഞു. എന്നാല്‍ അവസാന 5 ഓവറില്‍ 73 റണ്‍സ് ആണ് ഇന്ത്യ അടിച്ചെടുത്തത്. 27 പന്തില്‍ നിന്ന് 9 ഫോറും രണ്ട് സിക്‌സും സഹിതം 55 റണ്‍സ് എടുത്ത ദിനേശ് കാര്‍ത്തിക് ആണ് ഇവിടെ ഇന്ത്യയുടെ ഹീറോ ആയത്.
ഈ വാര്‍ത്ത കൂടി വായിക്കാം
സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
