വിശാഖപട്ടണം: ഇന്ത്യക്കെതിരായ ടി20 പരമ്പരയില്‍ നിന്നു പിന്‍മാറി ഓപ്പണര്‍ ഡേവിഡ് വാര്‍ണര്‍. ലോകകപ്പില്‍ കളിച്ചതിനാലും വരാനിരിക്കുന്ന പാകിസ്ഥാനെതിരായ ടെസ്റ്റ് പരമ്പരയ്ക്ക് തയ്യാറെടുക്കുന്നതിന്റേയും ഭാഗമായാണ് വാര്‍ണര്‍ പിന്‍മാറുന്നതെന്നു ക്രിക്കറ്റ് ഓസ്‌ട്രേലിയ വ്യക്തമാക്കി. ലോകകപ്പില്‍ ഓസ്‌ട്രേലിയക്ക് ആറാം കിരീടം സമ്മാനിക്കുന്നതില്‍ നിര്‍ണായക സാന്നിധ്യമായിരുന്നു വെറ്ററന്‍ ഓപ്പണര്‍. ടൂര്‍ണമെന്റില്‍ 535 റണ്‍സാണ് വാര്‍ണര്‍ അടിച്ചുകൂട്ടിയത്.
മാത്യു വെയ്ഡിന്റെ നേതൃത്വത്തിലുള്ള 15 അംഗ സംഘത്തെയാണ് ഓസീസ് തിരഞ്ഞെടുത്തത്. വാര്‍ണറെ കൂടാതെ ലോകകപ്പ് ടീമിലുണ്ടായിരുന്ന ഏഴ് താരങ്ങള്‍ കൂടി ടീമിലുണ്ട്. സീന്‍ അബ്ബോട്ട്, ഗ്ലെന്‍ മാക്‌സ്‌വെല്‍, ട്രാവിസ് ഹെഡ്ഡ്, ജോഷ് ഇംഗ്ലിസ്, സ്റ്റീവ് സ്മിത്ത്, മാര്‍ക്കസ് സ്‌റ്റോയിനിസ്, ആദം സാംപ എന്നിവരാണ് ലോകകപ്പ് കളിച്ച ടീമിലുണ്ടായിരുന്നത്. ഈ ഏഴ് പേര്‍ ഇന്ത്യയില്‍ തുടരും.
അഞ്ച് മത്സരങ്ങളടങ്ങിയ പരമ്പരയാണ് ഓസ്‌ട്രേലിയ ഇന്ത്യയില്‍ കളിക്കുന്നത്. ഈ മാസം 23 മുതല്‍ പരമ്പര തുടങ്ങും. 23ന് വിശാഖപട്ടണം, 26നു തിരുവനന്തപുരം കാര്യവട്ടം ഗ്രീന്‍ഫീല്‍ഡ് സ്റ്റേഡിയം, 28നു ഗുവാഹത്തി, ഡിസംബര്‍ ഒന്നിന് റായ്പുര്‍, മൂന്നിന് ബംഗളൂരു എന്നിവിടങ്ങളിലാണ് പോരാട്ടം.
120 പന്തില്‍ 137 റണ്‍സെടുത്തു ലോകകപ്പ് ഫൈനലില്‍ ഇന്ത്യന്‍ ഹൃദയം തകര്‍ത്ത ട്രാവിസ് ഹെഡ്ഡിനു മാസങ്ങള്‍ക്കുള്ളില്‍ നടക്കാനിരിക്കുന്ന ടി20 ലോകകപ്പ് പോരാട്ടത്തില്‍ കളിക്കാനുള്ള അവസരമാണ് ഈ പരമ്പര മുന്നില്‍ വയ്ക്കുന്നത്. സമാന സാഹചര്യമാണ് സ്റ്റീവ് സ്മിത്തിനും.
ഇന്നലെ ഇന്ത്യ 15 അംഗ സംഘത്തെ പ്രഖ്യാപിച്ചിരുന്നു. സൂര്യകുമാര്‍ യാദവാണ് ഇന്ത്യയെ നയിക്കുന്നത്. മലയാളി താരം സഞ്ജു സാംസണ്‍, ലെഗ് സ്പിന്നര്‍ യുസ്‌വേന്ദ്ര ചഹല്‍ എന്നിവരെ ടീമിലേക്ക് പരിഗണിച്ചില്ല. ലോകകപ്പില്‍ മികച്ച ഫോമില്‍ കളിച്ച ശ്രേയസ് അയ്യര്‍ ടീമിലുണ്ട്. ഇടവേളയ്ക്ക് ശേഷമാണ് അയ്യര്‍ ടി20 ഫോര്‍മാറ്റില്‍ ഇന്ത്യക്കായി വീണ്ടും കളിക്കുന്നത്. അവസാന രണ്ട് ടി20 പോരാട്ടത്തിനായാണ് അയ്യരെ ഉള്‍പ്പെടുത്തിയത്. ആദ്യ മൂന്ന് പോരാട്ടങ്ങളില്‍ ഋതുരാജ് ഗെയ്ക്വാദ് വൈസ് ക്യാപ്റ്റനാണ്. അവസാന രണ്ട് പോരാട്ടങ്ങളില്‍ ശ്രേയസായിരിക്കും വൈസ് ക്യാപ്റ്റന്‍.
ഓസ്‌ട്രേലിയ ടീം: മാത്യു വെയ്ഡ് (ക്യാപ്റ്റന്‍), ആരോണ്‍ ഹാര്‍ഡി, ജാസന്‍ ബെഹ്‌റന്‍ഡോര്‍ഫ്, ടിം ഡേവിഡ്, നതാന്‍ എല്ലിസ്, സീന്‍ അബ്ബോട്ട്, ഗ്ലെന്‍ മാക്‌സ്‌വെല്‍, ട്രാവിസ് ഹെഡ്ഡ്, ജോഷ് ഇംഗ്ലിസ്, സ്റ്റീവ് സ്മിത്ത്, മാര്‍ക്കസ് സ്‌റ്റോയിനിസ്, ആദം സാംപ, തന്‍വീര്‍ സംഘ, മാറ്റ് ഷോര്‍ട്ട്, കെയ്ന്‍ റിച്ചാര്‍ഡ്‌സന്‍.
ഇന്ത്യന്‍ ടീം: സൂര്യകുമാര്‍ യാദവ് (ക്യാപ്റ്റന്‍), ഋതുരാജ് ഗെയ്ക്വാദ്, ഇഷാന്‍ കിഷന്‍, യശസ്വി ജയ്സ്വാള്‍, തിലക് വര്‍മ, റിങ്കു സിങ്, ജിതേഷ് ശര്‍മ, വാഷിങ്ടന്‍ സുന്ദര്‍, അക്ഷര്‍ പട്ടേല്‍, ശിവം ഡുബെ, രവി ബിഷ്ണോയ്, അര്‍ഷ്ദീപ് സിങ്, പ്രസിദ്ധ് കൃഷ്ണ, അവേശ് ഖാന്‍, മുകേഷ് കുമാര്‍.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
