കൊളംബോ: ഏഷ്യാ കപ്പില്‍ സൂപ്പര്‍ ഫോര്‍ ലക്ഷ്യമിട്ട് ഇന്ത്യ ഇന്ന് നേപ്പാളിനെ നേരിടാനിറങ്ങുന്നു. ചരിത്രത്തിലാദ്യമായാണ് ഇന്ത്യയും നേപ്പാളും ക്രിക്കറ്റില്‍ നേര്‍ക്കുനേര്‍ വരുന്നത്.
പേസ് സൂപ്പര്‍ താരം ജസ്പ്രിത് ബുമ്ര ഇല്ലാതെയാണ് ഇന്ത്യ കളിക്കാനിറങ്ങുന്നത്. വ്യക്തിപരമായ കാരണങ്ങളാല്‍ താരം നാട്ടിലേക്ക് മടങ്ങി. ഇന്ത്യ അടുത്ത ഘട്ടത്തിലേക്ക് കടന്നാല്‍ ബുമ്ര ടീമിനൊപ്പം ചേരും. ബുമ്രയ്ക്ക് പകരം മുഹമ്മദ് ഷമി പ്ലെയിങ് ഇലവനില്‍ വരും. ആദ്യ മത്സരത്തിലെ ടീമില്‍ നിന്നു മറ്റു മാറ്റത്തിനു സാധ്യതയില്ല.
പാകിസ്ഥാനെതിരായ ആദ്യ പോരാട്ടം നടന്ന കാന്‍ഡിയിലെ പല്ലക്കീലില്‍ തന്നെയാണ് ഇന്നത്തെ പോരാട്ടവും. മഴ ഭീഷണി ഇന്നും നിലനില്‍ക്കുന്നുണ്ട്.
ജയിച്ചാലും കനത്ത മഴയില്‍ മത്സരം ഉപേക്ഷിച്ചാലും ഇന്ത്യ സൂപ്പര്‍ ഫോറിലേക്ക് കടക്കും. മത്സരം നടക്കുകയും നേപ്പാള്‍ അട്ടിമറി വിജയം നേടുകയും ചെയ്താല്‍ മാത്രമേ അവര്‍ക്ക് പ്രതീക്ഷയുള്ളു.
ആദ്യ മത്സരത്തില്‍ പോയിന്റ് പങ്കിട്ടതിനാല്‍ ഇന്ത്യക്ക് ഒരു പോയിന്റുണ്ട്. നേപ്പാള്‍ ആദ്യ പോരാട്ടത്തില്‍ പാകിസ്ഥാനോട് പരാജയപ്പെട്ടിരുന്നു. അവര്‍ക്ക് പോയിന്റില്ല. മൂന്ന് പോയിന്റുമായി ഗ്രൂപ്പില്‍ നിന്നു പാകിസ്ഥാന്‍ സൂപ്പര്‍ ഫോര്‍ നേരത്തെ തന്നെ ഉറപ്പിച്ചു.
പാകിസ്ഥാനെതിരെ ഇന്ത്യയുടെ ആദ്യ നാല് മുന്‍നിര ബാറ്റര്‍മാര്‍ക്ക് കാര്യമായി തിളങ്ങാന്‍ സാധിച്ചില്ല. ക്യാപ്റ്റന്‍ രോഹിത് ശര്‍മ, വിരാട് കോഹ്‌ലി, ശുഭ്മാന്‍ ഗില്‍, ശ്രേയസ് അയ്യര്‍ എന്നിവര്‍ ക്ഷണത്തില്‍ പുറത്തായിരുന്നു. ബാറ്റിങ് മികവിലേക്ക് നാല്‍വര്‍ സംഘത്തിനു തിരിച്ചെത്താനുള്ള അവസരമാണ് ഇന്നത്തെ പോരാട്ടം.
നേപ്പാള്‍ സൂപ്പര്‍ സ്പിന്നര്‍ സന്ദീപ് ലമിച്ചാനെ, മറ്റൊരു സ്പിന്നര്‍ ലളിത് രാജ്ബന്‍ഷി എന്നിവരുടെ മികവിലാണ് പ്രതീക്ഷയര്‍പ്പിക്കുന്നത്. ആദ്യ മത്സരത്തില്‍ പാകിസ്ഥാനോട് കനത്ത തോല്‍വി ഏറ്റുവാങ്ങിയതിന്റെ ക്ഷീണം മാറ്റാനും അവര്‍ ശ്രമിച്ചേക്കും.
ഇന്ത്യ സാധ്യതാ ഇലവന്‍: രോഹിത് ശര്‍മ (ക്യാപ്റ്റന്‍), ശുഭ്മാന്‍ ഗില്‍, വിരാട് കോഹ്‌ലി, ശ്രേയസ് അയ്യര്‍, ഇഷാന്‍ കിഷന്‍, ഹര്‍ദിക് പാണ്ഡ്യ, രവീന്ദ്ര ജഡേജ, ശാര്‍ദുല്‍ ഠാക്കൂര്‍, കുല്‍ദീപ് യാദവ്, മുഹമ്മദ് ഷമി, മുഹമ്മദ് സിറാജ്.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
