വെല്ലിങ്ടണ്‍: ന്യൂസിലന്‍ഡ് ഓപ്പണര്‍ ചാഡ് ബൗസിന് റെക്കോര്‍ഡ്. ലിസ്റ്റ് എ ക്രിക്കറ്റ് മത്സരത്തില്‍ ഏറ്റവും വേഗമേറിയ ഡബിള്‍ സെഞ്ച്വറി നേടിയാണ് ചാഡ് ബൗസ് റെക്കോര്‍ഡ് ബുക്കില്‍ ഇടംപിടിച്ചത്.വെറും 103 പന്തിലാണ് ഇരട്ട ശതകം കുറിച്ചത്. ഇന്ത്യയുടെ നാരായണ്‍ ജഗദീശന്റെയും ഓസ്ട്രേലിയയുടെ ട്രാവിസ് ഹെഡിന്റെയും റെക്കോര്‍ഡുകളാണ് തകര്‍ത്തത്.
ഫോര്‍ഡ് ട്രോഫിയില്‍ ഒട്ടാഗോയ്ക്കെതിരെ കാന്റര്‍ബറിക്ക് വേണ്ടി കളിക്കുന്നതിനിടെയാണ് ചാഡ് ബൗസിന്റെ വെടിക്കെട്ട് ബാറ്റിങ്. ദക്ഷിണാഫ്രിക്കയില്‍ ജനിച്ച ന്യൂസിലന്‍ഡ് ബാറ്റര്‍ 50 ഓവര്‍ ഫോര്‍മാറ്റിലെ ഏറ്റവും വേഗമേറിയ ഇരട്ട സെഞ്ച്വറി നേട്ടമാണ് കൈവരിച്ചത്. ഒടുവില്‍ 110 പന്തില്‍ 205 റണ്‍സെടുത്ത് ബൗസ് പുറത്തായി. 114 പന്തില്‍ ജഗദീശനും ഹെഡും കുറിച്ച ഇരട്ട സെഞ്ച്വറി നേട്ടമാണ് പഴങ്കഥയായത്.
2021-22 മാര്‍ഷ് കപ്പില്‍ ക്വീന്‍സ്ലന്‍ഡിനെതിരെ സൗത്ത് ഓസ്ട്രേലിയയ്ക്കായാണ് ഹെഡ് ഇരട്ട സെഞ്ച്വറി നേട്ടം കൈവരിച്ചത്. 2022 ലെ വിജയ് ഹസാരെ ട്രോഫിയില്‍ അരുണാചല്‍ പ്രദേശിനെതിരെ 277 റണ്‍സ് അടിച്ചുകൂട്ടിയാണ് തമിഴ്നാടിന്റെ ജഗദീശന്‍ റെക്കോര്‍ഡ് ബുക്കില്‍ ഇടംനേടിയത്.
ന്യൂസിലന്‍ഡിന്റെ ശ്രീലങ്കന്‍ പര്യടനത്തിലെ ഏകദിന, ടി20 മത്സരങ്ങളില്‍ നിന്ന് പുറത്തായതിന് തൊട്ടുപിന്നാലെയാണ് ബൗസ് റെക്കോര്‍ഡ് സൃഷ്ടിച്ചത്. 53 പന്തിലാണ് ബൗസ് സെഞ്ച്വറി അടിച്ചത്. എന്നാല്‍ റോസ് ടെയ്ലറുടെ റെക്കോഡിനൊപ്പം (49 പന്തില്‍ സെഞ്ച്വറി) എത്താന്‍ ബൗസിന് സാധിച്ചില്ല. 26 പന്തിലാണ് ബൗസ് അര്‍ധസെഞ്ച്വറി തികച്ചത്.
ക്രൈസ്റ്റ്ചര്‍ച്ചിലെ ഹാഗ്ലി ഓവലില്‍ നടന്ന മത്സരത്തില്‍ കാന്റര്‍ബറിയെ 9 വിക്കറ്റിന് 343 എന്ന കൂറ്റന്‍ സ്‌കോറാണ് കണ്ടെത്തിയത്. തന്റെ 100-ാം ലിസ്റ്റ് എ മത്സരത്തില്‍ ബൗസ് 27 ഫോറുകളും ഏഴ് സിക്സുകളുമാണ് പറത്തിയത്. പിന്നീട് കാന്റര്‍ബറി ഒട്ടാഗോയെ 103 റണ്‍സിന് പുറത്താക്കി 240 റണ്‍സിന്റെ കൂറ്റന്‍ വിജയം നേടി. ദക്ഷിണാഫ്രിക്കയിലെ ബെനോനിയിലാണ് ബൗസ് ജനിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
