ലണ്ടന്: അന്താരാഷ്ട്ര ക്രിക്കറ്റില് നിന്നു വിരമിച്ചതിനു പിന്നാലെ ദക്ഷിണാഫ്രിക്കന് വെറ്ററന് ബാറ്റര് ഡീന് എല്ഗാര് കൗണ്ടി ക്രിക്കറ്റിലേക്ക്. ഇംഗ്ലീഷ് കൗണ്ടി ടീം എസക്സുമായി താരം കരാറിലെത്തി. കൗണ്ടി സീസണ് തുടങ്ങാനിരിക്കെയാണ് താരം എസക്സുമായി കരാറിലെത്തിയത്. മൂന്ന് വര്ഷത്തെ കരാറിലാണ് താരം ടീമിലേക്ക് വരുന്നത്.
ഈയടുത്ത് സമാപിച്ച ഇന്ത്യക്കെതിരായ രണ്ട് മത്സരങ്ങളടങ്ങിയ ടെസ്റ്റ് പരമ്പരയോടെയാണ് താരം വിരമിക്കല് പ്രഖ്യാപിച്ചത്. ആദ്യ മത്സരത്തില് കിടയറ്റ സെഞ്ച്വറിയുമായി പ്രോട്ടീസിനെ വിജയത്തിലേക്ക് നയിക്കാന് എല്ഗാറിനു സാധിച്ചിരുന്നു. 185 റണ്സാണ് താരം കണ്ടെത്തിയത്. എന്നാല് രണ്ടാം ടെസ്റ്റില് ടീം തോറ്റു. പരമ്പര സമനിലയില് അവസാനിപ്പിച്ചാണ് അവസാന മത്സരത്തില് ക്യാപ്റ്റനായി ടീമിനെ നയിച്ച എല്ഗാര് അന്താരാഷ്ട്ര ക്രിക്കറ്റിനു വിരാമമിട്ടത്.
എസക്സിലെത്തുന്നതോടെ 36കാരനായ താരം ക്രിക്കറ്റ് കരിയറില് പുതിയ അധ്യയമാണ് തുറക്കുന്നത്.
2012ലാണ് എല്ഗാര് അന്താരാഷ്ട്ര ക്രിക്കറ്റില് അരങ്ങേറിയത്. ടെസ്റ്റ് മത്സരങ്ങളായിരുന്നു താരത്തിന്റെ പ്രധാന മേഖല. 12 വര്ഷം നീണ്ട കരിയറില് 86 ടെസ്റ്റുകള് കളിച്ചു. 5347 റണ്സ് നേടി. 14 സെഞ്ച്വറികളും 23 അര്ധ സെഞ്ച്വറികളും ഉള്പ്പെടുന്നതാണ് ടെസ്റ്റ് കരിയര്.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ