മെസി മികച്ച താരം; എട്ടാം തവണയും 'ഫിഫ ദ ബെസ്റ്റ്' പുരസ്കാരം

ലണ്ടൻ: കഴിഞ്ഞ വർഷത്തെ മികച്ച ഫുട്ബോൾ താരത്തിനുള്ള 'ഫിഫ ദ ബെസ്റ്റ്' പുരസ്കാരം അർജന്റീന നായകനും ഇതി​ഹാസ താരവുമായ ലയണൽ മെസിക്ക്. മാഞ്ചസ്റ്റർ സിറ്റിയുടെ നോർവെ സൂപ്പർ താരം എർലിങ് ഹാളണ്ട്, പിഎസ്ജിയുടെ ഫ്രഞ്ച് താരം കിലിയൻ എംബാപ്പെ എന്നിവരെ പിന്തള്ളിയാണ് മെസിയുടെ നേട്ടം. 

ബാഴ്സലോണയുടെ സ്പാനിഷ് താരം അയ്റ്റാന ബോൺമറ്റിയാണ് മികച്ച വനിതാ താരം. പെപ് ​ഗെർഡിയോള മികച്ച പുരുഷ പരിശീലകനുള്ള പുരസ്കാരം നേടി. ഇം​ഗ്ലണ്ട് ദേശീയ വനിതാ ടീം പരിശീലക സെറീന വെയ്​ഗ്മാനാണ് മികച്ച വനിതാ കോച്ച്.

ഇത് എട്ടാം തവണയാണ് മെസി പുരസ്കാരത്തിനു അർ​ഹനാകുന്നത്. ഇത്തവണത്തെ ബാല്ലൺ ഡി ഓർ പുരസ്കാരത്തിനു പിന്നാലെയാണ് മെസിയുടെ മറ്റൊരു നേട്ടം. 2022 ഡിസംബർ 19 മുതൽ 2023 ഓ​ഗസ്റ്റ് 20 വരെയുള്ള കാലയളവിലെ പ്രകടനമാണ് പുരസ്കാരത്തിനായി പരി​ഗണിച്ചത്. 

മികച്ച ​ഗോളിനുള്ള പുഷ്കാസ് അവാർഡ് ​ബ്രസീൽ താരം ​ഗുലി​ഹെർമ മഡ്രൂ​ഗ സ്വന്തമാക്കി. മാഞ്ചസ്റ്റർ സിറ്റിയുടെ ബ്രസീൽ ​ഗോൾ കീപ്പർ എഡേഴ്സനാണ് മികച്ച പുരുഷ ​ഗോൾ കീപ്പർ. മാഞ്ചസ്റ്റർ യുനൈറ്റഡ‍ിന്റെ ഇം​ഗ്ലീഷ് താരം മേരി ഇയേർപ്സാണ് മികച്ച വനിതാ ​ഗോൾ കീപ്പർ. മികച്ച ആരാധകനുള്ള പുരസ്കാരം മി​ഗ്വേൽ ഇൻ​ഗ്വസും ഫയർപ്ലേ പുരസ്കാരം ബ്രസീൽ പുരുഷ ദേശീയ ടീമും സ്വന്തമാക്കി. ഇതിഹാസ ബ്രസീൽ വനിതാ താരം മാർത്തയ്ക്ക് പ്രത്യേക പുരസ്കാരം. 

ഫിഫ പുരുഷ ഇലവൻ: തിബോട്ട് കോട്ട്വ, കെയ്ൽ വാക്കർ, ജോൺ സ്റ്റോൺസ്, റൂബൻ ഡയസ്, ബെർണാർ‍ഡോ സിൽവ, കെവിൻ ഡി ബ്രുയ്നെ, ജൂഡ് ബെല്ലിങ്ഹാം, ലയണൽ മെസി, എർലിങ് ​ഹാളണ്ട്, വിനിഷ്യസ് ജൂനിയർ, കിലിയൻ എംബാപ്പെ. 

ഫിഫ വനിതാ ഇലവൻ: മേരി ഇയേർപ്സ്, ലൂസ് ബ്രോൺസ്, അലക്സ് ​ഗ്രീൻവു‍ഡ്, ഓൾ​ഗ കർമോണ, എല്ല ടൂണെ, അയ്റ്റാന ബോൺമറ്റി, കെയ്റ വാൽഷ്, ലോറൻ ജെയിംസ്, സാം കെർ, അലക്സ് മോർ​ഗൻ, അലസിയ റുസ്സോ. 

ഈ വാര്‍ത്ത കൂടി വായിക്കൂ

'ഇത്ര ചെറുപ്രായത്തിലെ എന്തു മാനസിക പ്രശ്‌നമാണുള്ളത്'; ഇഷാന്‍ കിഷനെതിരെ  പാക് മുന്‍ താരം

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ