ലാഹോർ: പാകിസ്ഥാൻ സൂപ്പർ ലീഗ് പോരാട്ടങ്ങളിൽ മികച്ച പ്രകടനം നടത്തുന്ന താരങ്ങൾക്കു നൽകുന്ന സമ്മാനങ്ങൾ ഇതിനോടകം പരിഹാസത്തിനു വഴിയൊരുക്കിയിരുന്നു. സമൂഹ മാധ്യമങ്ങളിൽ ട്രോളുകൾ നിറഞ്ഞിട്ടും സമ്മാന വിതരണം മാറ്റമില്ലാതെ തുടരുന്നു. കഴിഞ്ഞ ദിവസം ക്വെറ്റ ക്വാലൻഡേഴ്സിനെതിരായ പോരാട്ടത്തിൽ ടോപ് പെർഫോർമറായി തിരഞ്ഞെടുക്കപ്പെട്ടത് കറാച്ചി കിങ്സ് പേസർ ഹസൻ അലി. താരത്തിനു ഫിറ്റ്നസ് ബാൻഡ് സമ്മാനമായി കിട്ടി. കറാച്ചി കിങ്സിന്റെ ഡ്രസിങ് റൂമിൽ വച്ചു സപ്പോർട്ട് സ്റ്റാഫ് താരത്തിനു സമ്മാനം നൽകുന്നതിന്റെ വിഡിയോ ടീം പുറത്തുവിട്ടു.
മത്സരത്തിൽ നാലോവറിൽ 28 റൺസ് വഴങ്ങി ഹസൻ അലി നാല് വിക്കറ്റെടുത്തു. ബാറ്റിങിനു ഇറങ്ങിയും അലി തിളങ്ങി. താരം 25 പന്തിൽ 27 റൺസെടുത്തു.
മത്സരത്തിൽ പക്ഷേ കറച്ചി കിങ്സ് ദയനീയമായി പരാജയപ്പെട്ടു. ആദ്യം ബാറ്റ് ചെയ്ത ക്വെറ്റ നിശ്ചിത ഓവറിൽ 6 വിക്കറ്റ് നഷ്ടത്തിൽ 201 റൺസെടുത്തു. മറുപടി പറയാനിറങ്ങിയ കിങ്സ് 19.1 ഓവറിൽ 136 റൺസിൽ പുറത്തായി. 65 റൺസ് വിജയമാണ് ക്വെറ്റ ആഘോഷിച്ചത്.
പിഎസ്എൽ തുടങ്ങിയതിനു പിന്നാലെ കറാച്ചി കിങ്സിന്റെ ഇംഗ്ലണ്ട് താരം ടീം വിൻസിനു ഹെയർ ഡ്രയർ സമ്മാനമായി നൽകിയത് വലിയ ട്രോളായി മാറിയിരുന്നു. മുൾട്ടാൻ സുൽത്താനെതിരായ പോരാട്ടത്തിൽ 43 പന്തിൽ 101 റൺസടിച്ചതോടെയാണ് ടോപ് പെർഫോമർമറായി താരം തിരഞ്ഞെടുക്കപ്പെട്ടത്. ഈ പ്രകടനത്തിനായിരുന്നു ഹെയർ ഡ്രയർ സമ്മാനമായി നൽകിയത്.
ഇതു വാങ്ങാൻ പോകുന്നതിനിടെ വിൻസ് തന്നെ അമ്പരക്കുന്നുണ്ട്. ഇതിന്റെ വീഡിയോയും വൈറലായി മാറിയിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക
ടെലഗ്രാം ചാനൽ സബ്സ്ക്രൈബ് ചെയ്യാൻ ക്ലിക്ക് ചെയ്യൂ
