കോഴിക്കോട്: സ്‌കൂള്‍ വിദ്യാര്‍ത്ഥികളുടെ ശ്രമഫലമായി മനോഹരമാക്കിയ പാളയം ബസ് സ്റ്റാന്റില്‍ പോര്‍ക്ക് ഫെസ്റ്റിന്റെ നോട്ടീസുകളൊട്ടിച്ച് വൃത്തികേടാക്കി. വൃത്തികേടാക്കിയവര്‍തന്നെ അത് വൃത്തിയാക്കുമെന്നാണ് കരുതുന്നതെന്ന് പദ്ധതിയ്ക്ക് നേതൃത്വം നല്‍കിയ മുന്‍ കളക്ടര്‍ പ്രശാന്ത് നായര്‍ ഫെയ്‌സ്ബുക്കില്‍ കുറിക്കുന്നു.
പാളയം ബസ് സ്റ്റാന്റ് കുറേക്കാലമായി വൃത്തികേടായിക്കിടക്കുകയായിരുന്നു. മണിച്ചിത്രത്തൂണ്‍ എന്ന പദ്ധതിയിലൂടെ അന്ന് കോഴിക്കോട് കളക്ടറായിരുന്ന പ്രശാന്ത് നായരുടെ നേതൃത്വത്തില്‍ സ്‌കൂള്‍ കുട്ടികള്‍ ചേര്‍ന്ന് ഒഴിവു കിട്ടുമ്പോഴൊക്കെയാണ് പാളയം ബസ് സ്റ്റാന്റ് മനോഹരമാക്കിയെടുത്തത്.
അതിനുശേഷം ആ വഴി പോകുന്നവരൊക്കെ മണിച്ചിത്രത്തൂണുകളെ ആസ്വദിക്കുകയും ഭംഗിയായിത്തന്നെ പരിപാലിക്കാന്‍ ശ്രദ്ധിക്കുകയും ചെയ്തു. നോട്ടീസുകളൊന്നും ഒട്ടിച്ചിരുന്നില്ല. ഇതിനിടയിലാണ് കഴിഞ്ഞദിവസം പോര്‍ക്ക് ഫെസ്റ്റിന്റെ നോട്ടീസ് ശ്രീരാമസേനയുടെ പേരില്‍ ഇവിചടെ വ്യാപകമായി ഒട്ടിച്ചത്. കുട്ടികള്‍ മിനക്കെട്ട് വൃത്തിയാക്കിയ ഈ സ്റ്റാന്റിനെ വീണ്ടും വൃത്തികേടാക്കാനുള്ള ശ്രമമാണിതെന്ന് പരക്കെ ആക്ഷേപമുയര്‍ന്നിരിക്കുകയാണ്.
ഇത് അറിഞ്ഞവേളയിലാണ് കളക്ടര്‍ബ്രോ പ്രശാന്ത് നായര്‍ വൃത്തികേടാക്കിയവര്‍തന്നെ വൃത്തിയാക്കുമെന്ന പ്രതീക്ഷ പങ്കുവെച്ചത്. വൃത്തിയാക്കുമോ ഇല്ലയോ എന്ന് നാളേക്കറിയാം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
