തീയേറ്റര്‍ പീഡനം; വീണ്ടും പ്രതിക്ക് കൂട്ടുനിന്ന് പൊലീസ്; ചുമത്തിയത് പോക്‌സോ ആക്ടിലെ ദുര്‍ബല വകുപ്പുകള്‍ 

ചങ്ങരംകുളം: എടപ്പാള്‍ തീയേറ്റര്‍ പീഡനക്കേസ് പ്രതി മൊയ്തീന്‍കുട്ടിക്കെതിരെ ദുര്‍ബല വകുപ്പുകള്‍ ചുമത്തി പൊലീസ്. പോക്‌സോ 5(എം) വകുപ്പ് ഒഴിവാക്കി. പകരം ദുര്‍ബലമായ 9,10,16 വകുപ്പുകളാണ് ചേര്‍ത്തിരിക്കുന്നത്. ശിശു ക്ഷേമ സമിതി നിര്‍ദേശിച്ച വകുപ്പാണ് ചേര്‍ക്കാതിരുന്നത്. കേസ് ദുര്‍ബലമാകുമെന്ന് ശിശു ക്ഷേമസമിതി വ്യക്തമാക്കി. 

നേരത്തെ ചൈല്‍ഡ് ലൈന്‍ പ്രവര്‍ത്തകര്‍ തെളിവ് സഹിതം പരാതി നല്‍കിയിട്ടും പൊലീസ് നടപടി സ്വീകരിച്ചിരുന്നില്ല. പീഡനത്തിന്റെ ദൃശ്യങ്ങള്‍ മാധ്യമങ്ങള്‍ പുറത്തുവിട്ടതിന് ശേഷമാണ് പൊലീസ് നടപടി സ്വീകരിച്ചത്. ഇത് വിവാദമായതോടെ കേസെടുക്കാതിരുന്ന ചങ്ങരംകുളം എസ്‌ഐയെ സസ്‌പെന്റ് ചെയ്തിരുന്നു. പൊലീസിന് വീഴ്ച പറ്റിയെന്ന് ഡിജിപി സമ്മതിക്കുകയും ചെയ്തിരുന്നു.