തിരുവനന്തപുരം: യൂണിവേഴ്സിറ്റി കോളജിലുണ്ടായ സംഘര്ഷത്തില് കുത്തേറ്റ അഖിലിന്റെ ശസ്ത്രക്രിയ പൂർത്തിയായി. ആരോഗ്യനില നിലവിൽ തൃപ്തികരമാണെന്ന് ഡോക്ടർമാർ അറിയിച്ചു. അഖിലിപ്പോൾ തീവ്രപരിചരണ വിഭാഗത്തിൽ ചികിത്സയിലാണ്.
വെള്ളിയാഴ്ച രാവിലെ കോളജില് ഉണ്ടായ സംഘര്ഷത്തിനിടെയാണ് മൂന്നാംവര്ഷ പൊളിറ്റിക്കല് സയന്സ് വിദ്യാര്ത്ഥി അഖിലിന് നെഞ്ചില് കുത്തേറ്റത്. എസ്എഫ്ഐയും വിദ്യാര്ത്ഥികളും തമ്മിലുണ്ടായ ഏറ്റുമുട്ടലാണ് സംഘർഷത്തിൽ കലാശിച്ചത്. ആന്തരിക രക്തസ്രാവമുണ്ടായതിനേത്തുടർന്നാണ് അഖിലിനെ ശസ്ത്രക്രിയക്കു വിധേയനാക്കിയത്.
ആദ്യം താലൂക്ക് ആശുപത്രിയിൽ പ്രവേശിപ്പിച്ച അഖിലിനെ പിന്നീട് വിദഗ്ധ ചികിത്സയ്ക്കായി മെഡിക്കൽ കോളജിലേക്കും മാറ്റുകയായിരുന്നു.
എസ്എഫ്ഐ യൂണിറ്റ് ഓഫീസിന് മുന്പില് പാട്ടുപാടിയതിനെ ചൊല്ലിയുള്ള തര്ക്കം അക്രമത്തില് കലാശിക്കുകയായിരുന്നു. വിദ്യാര്ത്ഥിക്ക് കുത്തേറ്റ സംഭവത്തില് എസ്എഫ്ഐക്കെതിരെ ക്യാമ്പസിലും പുറത്തും പ്രതിഷേധം കനക്കുകയാണ്. വിദ്യാര്ത്ഥികള് എസ്എഫ്ഐക്കെതിരെ മുദ്രാവാക്യം വിളിക്കുകയും കുത്തിയിരുപ്പ് സമരം നടത്തുകയും ചെയ്തു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ