തൃശൂര്: നിയമവിരുദ്ധമായി കടലില് ഉല്ലാസയാത്ര നടത്തിയ സ്പീഡ് ബോട്ട് ഫിഷറീസ് മറൈന് എന്ഫോഴ്സ്മെന്റ് സംഘം പിടിച്ചെടുത്തു. മുനമ്പത്ത് നിന്ന് കടലില് ഉല്ലാസയാത്ര നടത്തിയ എറണാകുളം ചേന്ദമംഗലം കരിപ്പായി കടവ് സ്വദേശി മേഷ് എന്നയാളുടെ ഉടമസ്ഥതയിലുള്ള മനാമി എന്ന പേരുള്ള സ്പീഡ് ബോട്ട് ആണ് പിടിച്ചെടുത്തത്. യാതൊരു വിധ അനുമതിപത്രമോ രേഖകളോ ഇല്ലാതെയാണ് സ്പീഡ് ബോട്ട് കടലില് ഉല്ലാസയാത്ര നടത്തിയത് എന്ന് കണ്ടെത്തിയതിന്റെ അടിസ്ഥാനത്തിലാണ് നടപടി. സ്പീഡ് ബോട്ട് കൊടുങ്ങല്ലൂര് പോര്ട്ട് ഓഫീസര്ക്ക് കൈമാറി.
അഴീക്കോട് അഴിമുഖത്തിന് വടക്ക് പടിഞ്ഞാറ് ഭാഗത്തു വെച്ച് സുരക്ഷാ സംവിധാനങ്ങളില്ലാതെ അമിത വേഗതയിലും ആശ്രദ്ധമായും കടലിലൂടെ ഉല്ലാസ ബോട്ട് ഓടിക്കുന്നത് ഫിഷറീസ് മറൈന് എന്ഫോഴ്സ്മെന്റ് പട്രോള് ബോട്ട് സംഘത്തിന്റെ ശ്രദ്ധയില്പ്പെടുകയായിരുന്നു. തുടര്ന്ന് ബോട്ട് തടഞ്ഞുനിര്ത്തി പരിശോധിച്ചപ്പോള് അഴീക്കോട് പോര്ട്ട് കണ്സര്വേറ്ററുടെ അനുമതിയോ, അഴീക്കോട് കോസ്റ്റല് പൊലീസ് സ്റ്റേഷന്റെ അറിവോ സമ്മതപത്രമോ ഇല്ലാതെയാണ് യാത്ര നടത്തിയതെന്ന് കണ്ടെത്തി.
ഉള്നാടന് ജലാശയങ്ങളില് മാത്രം ഉപയോഗിക്കാവുന്ന സ്പീഡ് ബോട്ടിന് പരിശോധനയില് വേണ്ടത്ര രേഖകള് ഇല്ലെന്ന് കണ്ടെത്തിയതിന്റെ അടിസ്ഥാനത്തിലായിരുന്നു നടപടി. ഉല്ലാസ ബോട്ട് മത്സ്യബന്ധന യാനമല്ലാത്തതിനാല് പിടിച്ചെടുത്ത ശേഷം കൊടുങ്ങല്ലൂര് പോര്ട്ട് കണ്സര്വേറ്റര്ക്ക് റിപ്പോര്ട്ട് നല്കി. പോര്ട്ട് കണ്സര്വേറ്റര് ബോട്ട് പരിശോധിച്ച് പിഴ ഈടാക്കും.
ഓപ്പറേഷന് സജാഗിന്റെ ഭാഗമായി സുരക്ഷാ പരിശോധനകള് ശക്തമാക്കുന്നതിന്റെ ഭാഗമായി ഫിഷറീസ് അസിസ്റ്റന്റ് ഡയറക്ടര് ഡോ. സി സീമയുടെ നേതൃത്വത്തില് രൂപീകരിച്ച പ്രത്യേക സംഘമാണ് സ്പീഡ്ബോട്ട് പിടിച്ചെടുത്തത്. സംഘത്തില് മറൈന് എന്ഫോഴ്സ്മെന്റ് ആന്റ് വിജിലന്സ് വിങ്ങിലെ ഉദ്യോഗസ്ഥരായ വി എന് പ്രശാന്ത് കുമാര്, വി എം ഷൈബു, ഇ ആര് ഷിനില്കുമാര്, സീ റെസ്ക്യൂ ഗാര്ഡ്മാരായ ഷെഫീക്ക്, സിജീഷ്, ബോട്ട് സ്രാങ്ക് സന്തോഷ് മുനമ്പം, എന്ജിന് ഡ്രൈവര് റോക്കി എന്നിവര് ഉണ്ടായിരുന്നു. വരുംദിവസങ്ങളില് പരിശോധന ശക്തമാക്കുമെന്നും ആധാര് അടക്കമുള്ള രേഖകള് പരിശോധിക്കുമെന്നും ഫിഷറീസ് ഡെപ്യൂട്ടി ഡയറക്ടര് ആബ്ദുള്മജീദ് പോത്തന്നൂരാന് അറിയിച്ചു
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
