ലോകം ചുറ്റി സഞ്ചരിക്കുന്ന യാത്രാവിശേഷങ്ങളിലൂടെ മലയാളി പ്രേക്ഷകര്ക്ക് പ്രിയങ്കരിയായി മാറിയ ട്രാവല് വ്ളോഗറാണ് അരുണിമ ബാക്ക്പാക്കര്. അഫ്ഗാനിസ്ഥാനില് നിന്നുള്ള അരുണിമയുടെ പുതിയ യാത്രാനുഭവങ്ങളും കാഴ്ചകളുമാണ് ഇപ്പോള് സമൂഹമാധ്യമങ്ങളില് ചര്ച്ചയാകുന്നത്. അഫ്ഗാന് സ്ത്രീകള് പരമ്പരാഗതമായി ധരിക്കുന്ന 'ചാദരി' ധരിച്ചുകൊണ്ടുള്ള അരുണിമയുടെ പുതിയ വിഡിയോയാണ് ഇപ്പോള് സൈബറിടത്തിന്റെ ശ്രദ്ധ ആകര്ഷിക്കുന്നത്.
ശരീരം മുഴുവന് മൂടിപ്പുതച്ചു നില്ക്കുന്ന ചാദരി ധരിച്ചപ്പോള് തനിക്ക് കണ്ണ് പോലും ശരിയായി കാണാന് കഴിയുന്നില്ലെന്നാണ് അരുണിമ വിഡിയോയില് പറയുന്നത്. ഈ വസ്ത്രം ധരിച്ച് അഫ്ഗാനിസ്ഥാനിലെ സ്ത്രീകള് എങ്ങനെയാണ് നിത്യജീവിതം നയിക്കുന്നതെന്ന് താന് അദ്ഭുതപ്പെടുന്നുവെന്നും അവര് പറയുന്നു. ചാദരി ധരിച്ചു കഴിഞ്ഞാല് പിന്നെ എല്ലാ സ്ത്രീകളും ഒരുപോലെ ഒരു യൂണിഫോം അണിഞ്ഞതുപോലെയാണ് കാണപ്പെടുന്നത്. ഇതിനുള്ളില് നില്ക്കുന്നത് ആരാണെന്ന് പുറത്തുനിന്ന് നോക്കിയാല് തിരിച്ചറിയാന് പോലുമില്ലെന്നും അരുണിമ കൂട്ടിച്ചേര്ക്കുന്നു.
അഫ്ഗാനില് എത്തിയപ്പോള് തന്നെ താലിബാന് അധികൃതര് വസ്ത്രധാരണത്തില് കര്ശന നിയന്ത്രണങ്ങള് ഏര്പ്പെടുത്തിയിരുന്നു. ധരിച്ചിരുന്ന വസ്ത്രം മാറ്റി ശരീരം മുഴുവന് മറയ്ക്കുന്ന വസ്ത്രം ധരിക്കാന് അവര് ആവശ്യപ്പെടുകയായിരുന്നു. താനൊരു വിദേശ യാത്രികയായതുകൊണ്ട് മാത്രമാണ് മുഖം മാത്രം കാണുന്ന രീതിയിലുള്ള വസ്ത്രം ധരിക്കാന് അനുമതി ലഭിച്ചതെന്നും അരുണിമ നേരത്തെ വ്യക്തമാക്കിയിരുന്നു. സ്ത്രീ എന്ന നിലയില് അഫ്ഗാനില് താന് നേരിട്ട ബുദ്ധിമുട്ടുകളെയും അവിടുത്തെ കടുത്ത യാഥാര്ത്ഥ്യങ്ങളെയും കുറിച്ച് അവര് തുറന്നുപറഞ്ഞിരുന്നു.
അഫ്ഗാനിസ്ഥാനില് എത്തിയപ്പോള് പെണ്ണായി ജനിക്കരുതെന്ന് ആദ്യമായി തോന്നിപ്പോയെന്ന അരുണിമയുടെ ഫെയ്സ്ബുക്ക് കുറിപ്പ് വലിയ രീതിയില് ചര്ച്ചയായിരുന്നു. സ്ത്രീകള്ക്ക് ഒറ്റയ്ക്ക് യാത്ര ചെയ്യാനുള്ള സ്വാതന്ത്ര്യം പോലുമില്ലാത്ത അവിടുത്തെ അവസ്ഥ അവര് വിവരിച്ചിരുന്നു. വസ്ത്രധാരണത്തിലും യാത്രാവേളകളിലും അനുഭവപ്പെടുന്ന ഈ നിയന്ത്രണങ്ങള് കാണുമ്പോഴാണ് സ്വാതന്ത്ര്യത്തിന്റെ വില എന്താണെന്ന് മനസ്സിലാവുന്നതെന്നും അഫ്ഗാനില് സ്ത്രീകളുടെ അവസ്ഥ വളരെ ദയനീയമാണെന്നും അരുണിമ പറയുന്നു.
അതേസമയം, അരുണിമയുടെ വിഡിയോയ്ക്ക് താഴെ സമ്മിശ്ര പ്രതികരണങ്ങളാണ് വരുന്നത്. ഇന്ത്യയില് ജനിക്കാന് കഴിഞ്ഞത് എത്ര വലിയ ഭാഗ്യമാണെന്നും അഫ്ഗാന് സ്ത്രീകളുടെ അവസ്ഥ കരളലിയിപ്പിക്കുന്നതാണെന്നും ഒരു വിഭാഗം ആളുകള് കമന്റ് ചെയ്യുമ്പോള്, മറ്റൊരു വിഭാഗം ഇതിനെ വിമര്ശിക്കുന്നുണ്ട്. വ്യൂസും റീച്ചും കിട്ടാന് വേണ്ടി മാത്രം സ്വയം തേടിപ്പോയ സ്ഥലത്തെക്കുറിച്ച് പിന്നീട് എന്തിനാണ് കുറ്റപ്പെടുത്തുന്നത് എന്നും, അതത് രാജ്യങ്ങളുടെ പരമ്പരാഗത രീതികളെ ആ രീതിയില് കാണണമെന്നുമാണ് വിമര്ശകരുടെ വാദം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
