അരിഞ്ഞ് കരയേണ്ട, ഇനി 'കരയിക്കാത്ത' സവാള; ഉടൻ വിപണിയിലേക്ക് 

സവാള അരിയുമ്പോൾ കണ്ണെരിയുന്നതും കുടുകുടാ കണ്ണീനീരൊഴുകുന്നതും പലർക്കും അനുഭവമുള്ളതാണ്. എന്നാൽ, ഇതാ ഒരു സന്തോഷവാർത്ത!. കണ്ണുനീര് വീഴ്ത്താത്ത സവാളകൾ എത്തിത്തുടങ്ങുകയാണ്. ഓസ്ട്രേലിയൻ സൂപ്പർമാർക്കറ്റ് ഭീമൻ വൂൾവർത്ത്സ് ആണ് 'കരയിക്കാത്ത' സവാള അവതരിപ്പിക്കുന്നെന്ന് പ്രഖ്യാപിച്ചിട്ടുള്ളത്. 

'ടിയർലെസ് ഒണിയൻ', പേര് സൂചിപ്പിക്കുന്നതുപോലെതന്നെ അരിയുമ്പോൾ നിങ്ങളെ കരയിക്കാത്ത സവാളകളായിരിക്കും ഇവയെന്ന് വൂൾവർത്ത്സ് വാർത്താക്കുറിപ്പിൽ അറിയിച്ചു. ന്യൂ സൗത്ത് വെയിൽസ്, വിക്ടോറിയ, ഓസ്‌ട്രേലിയൻ ക്യാപിറ്റൽ ടെറിട്ടറി എന്നിവിടങ്ങളിലെ കടകളിൽ ആദ്യ ബാച്ച് എത്തുമെന്നാണ് അറിയിച്ചിട്ടുള്ളത്. സവോളയുടെ ഈ പുതിയ വകഭേദത്തിൽ കണ്ണുനീരിനും അസ്വസ്ഥതയ്ക്കും കാരണമാകുന്ന പ്രകൃതിദത്ത രാസവസ്തുക്കളും എൻസൈമുകളും കുറവായിരിക്കും എന്നാണ് കമ്പനി പറയുന്നത്. വിളവെടുപ്പിന് ശേഷം ഇത്തരം സംയുക്തങ്ങളുടെ സാന്നിധ്യം വീണ്ടും കുറയുകയും ചെയ്യും. സാധാരണ സവാളകളിൽ കൂടുതൽ കാലം സൂക്ഷിക്കുന്തോറും ഇവയുടെ അളവ് കൂടുകയാണ് ചെയ്യുന്നത്. 

നിലവിലുള്ള സവാളയുടെ വിവിധ വകഭേദങ്ങളെ വർഷങ്ങളോളം ക്രോസ്-ബ്രീഡിങ് ചെയ്താണ് പുതിയ വെറൈറ്റി വികസിപ്പിച്ചതെന്ന്  വൂൾവർത്ത്സ് പറഞ്ഞു. പുതിയത് നിലവിലുള്ളവയേക്കാൾ രുചിയിലും അൽപം വ്യത്യസ്തമായിരിക്കും, സവാളയുടെ രൂക്ഷമായ മണം ഇവയ്ക്ക് കുറവായിരിക്കും. എന്നാൽ, ഇപ്പോൾ ഉള്ളതിനേക്കാൾ മധുരമുണ്ടാകും പുതിയ വകഭേദത്തിന്. 

ഈ വാര്‍ത്ത കൂടി വായിക്കൂ 

ജോലിയുള്ള ദിവസം പാചകം എളുപ്പമാക്കണോ? വീക്കെന്‍ഡില്‍ ചില സൂത്രപ്പണികളാകാം, ഈ ആറ് ശീലങ്ങള്‍ തുടങ്ങൂ 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ