നാവിൽ രുചി ഉണർത്തും വിഷു വിഭവങ്ങൾ, വിഷു പുഴുക്ക് റെസിപ്പി

മണ്ണു മനസ്സും ഒന്നിക്കുന്ന സമൃദ്ധിയുടെ ഉത്സവമാണ് വിഷു. ഓട്ടുരുളിൽ തൊടിയിൽ നിന്ന് വിളവെടുത്ത പഴങ്ങളും പച്ചക്കറികളും കണിക്കൊന്നയുടെ മഞ്ഞപ്പട്ടും കണിവെള്ളരിയുടെ ഐശ്വര്യവും കണ്ണിന് കുളിർമയേകുമ്പോള്‌‍ നാവിന് ​ഗൃഹാതുരത്വം ഉണർത്തുന്ന നിരവധി വിഭവങ്ങളും വിഷുവിന് ഉണ്ടാകും.

വിഷുകഞ്ഞിക്കും വിഷുക്കട്ടയ്ക്കും പുറമെ മലയാളികൾക്ക് ഒഴിച്ചുകൂടാനാവാത്ത മറ്റൊരു വിഭവമാണ് വിഷു പുഴുക്ക്. വിളവെടുത്ത കിഴങ്ങുകളും പച്ചക്കറികളും ഒന്നിച്ചു പാകം ചെയ്യുന്ന പോഷകസമൃദ്ധമായ വിഭവമാണ് ഇത്. കാലങ്ങളായി വിഷുപ്പുലരിയിൽ തയ്യാറാക്കാറുള്ള ഈ പുഴുക്ക് കേരളീയ കാർഷിക സംസ്കൃതിയുടെ വലിയൊരു പ്രതീകം കൂടിയാണ്.

ഇടിച്ചക്ക, മത്തൻ, വൻപയർ, വാഴക്കായ എന്നിങ്ങനെ വൈവിധ്യമാർന്ന ചേരുവകൾ ചേർത്താണ് ഈ വിഭവം തയ്യാറാക്കുന്നത്. ഇതിൽ ചേർക്കുന്ന നാളികേരത്തിന്റെയും പച്ച വെളിച്ചെണ്ണയുടെയും മണം ഓരോ മലയാളിയുടെയും ഉള്ളിൽ പഴയകാല വിഷുസ്മരണകൾ ഉണർത്തും.

ചേരുവകൾ

• ഇടിച്ചക്ക -പകുതി കഷ്ണം

• മത്തന്‍ (പഴുത്തത്) -ഒരു കഷ്ണം

• വന്‍പയര്‍ -1/4 കപ്പ്

• വാഴയ്ക്ക -ഒരു എണ്ണം

• അമരയ്ക്ക -അഞ്ച് എണ്ണം

• മുളകുപൊടി -ഒരു സ്പൂണ്‍

• മഞ്ഞള്‍പ്പൊടി -ഒരു സ്പൂണ്‍

• ഉപ്പ് -ആവശ്യത്തിന്

• വെളിച്ചെണ്ണ -ആവശ്യത്തിന്

• മസാലക്ക് ആവശ്യമായ ചേരുവകള്‍:

• പച്ചമുളക് -രണ്ട്

• നാളികേരം -ഒരു മുറി

• കറിവേപ്പില -കുറച്ച്‌ (ഇവ മൂന്നു നന്നായി അരച്ചെടുക്കുക)

തയ്യാറാക്കുന്ന വിധം

• ഇടിചക്ക, നന്നായി പഴുത്ത മത്തൻ, വാഴക്കായ, അമരയ്ക്ക എന്നിവ വൃത്തിയായി കഴുകി ചെറിയ കഷ്ണങ്ങളാക്കിയെടുക്കാം.

• വെള്ളത്തിൽ കുതിർത്തെടുത്ത വൻപയർ വേവിച്ചെടുക്കാം.

• മറ്റൊരു പാത്രത്തിൽ ഇടിചക്ക, വാഴക്കായ എന്നിവ വേവിക്കാം.

• ഇവ പകുതി വെന്തു കഴിയുമ്പോൾ അമരയ്ക്ക, മത്തൻ എന്നിവ ചേർക്കാം.

• പച്ചക്കറികൾ വേവിച്ചതിലേയ്ക്ക് വൻപയറും, എരിവിനനുസരിച്ച് മുളകുപൊടി, മഞ്ഞൾപ്പൊടി, ആവശ്യത്തിന് ഉപ്പ് എന്നിവ ചേർത്തിളക്കാം.

• ഇതേ സമയം രണ്ട് പച്ചമുളകിലേയ്ക്ക് അര മുറി തേങ്ങ ചിരകിയതും ഒരുപിടി കറിവേപ്പിലയും ചേർത്ത് അരച്ചെടുക്കാം.

• ഈ അരപ്പ് വെന്തപച്ചക്കറിയിൽ ചേർത്ത് അടച്ചു വച്ച് തിളപ്പിക്കാം.

• വെന്ത് വെള്ളം വറ്റി വരുമ്പോൾ അടുപ്പണച്ച് മുകളിൽ വെളിച്ചെണ്ണയും കറിവേപ്പിലയും ചേർത്ത് അടുപ്പിൽ നിന്നും മാറ്റാം.