കൂറ്റൻ പാമ്പിനെ കഴുത്തിൽ ചുറ്റിപ്പിടിച്ചു; പ്രദർശനത്തിനിടെ അപ്രതീക്ഷിതമായി അത് സംഭവിച്ചു, വീഡിയോ  

പാമ്പുകൾ കൈയിലും കഴിത്തിലുമൊക്കെ ചുറ്റിപ്പിണിഞ്ഞിരിക്കുന്ന അമ്പരപ്പിക്കുന്ന വിഡിയോകൾ സമൂഹമാധ്യമങ്ങളിൽ ഏറെ വൈറലാകാറുണ്ട്. ഇത്തരം വിഡിയോകൾ പതിവായി പങ്കുവയ്ക്കുന്ന ഒരാളാണ് ജയ് ബ്രൂവെർ. കലിഫോർണിയയിലെ റെപ്‌ടൈൽ സൂവിന്റെ സ്ഥാപകനാണ് ജയ്. പാമ്പുകളെ ഏറെയിഷ്ടപ്പെടുന്ന ജയ് അവ‌ക്കൊപ്പമുള്ള രസകരമായ വിഡിയോകളാണ് പങ്കുവയ്ക്കാറ്. ഇപ്പോഴിതാ പതിവിൽ നിന്ന് വ്യത്യസ്തമായി കണ്ടവരെല്ലാം ചിരിച്ച ഒരു വിഡിയോയാണ് ശ്രദ്ധനേടുന്നത്. 

മൃഗശാലയിൽ എത്തിയ ആളുകൾക്കായി നടത്തിയ ഒരു പ്രദർശനത്തിനിടെയാണ് സംഭവം. കാണികളെ രസിപ്പിക്കാനായി കൂറ്റൻ പാമ്പിനെ കഴുത്തിലൂടെ ചുറ്റിപ്പിടിച്ചിരിക്കുയായിരുന്നു ജയ്. എന്നാൽ ഇതിനിടയിൽ അപ്രതീക്ഷിതമായി വിസർജിക്കുകയായിരുന്നു. സ്വതസിദ്ധമായ ശൈലിയിൽ ആ രം​ഗം കൈകാര്യം ചെയ്ത ജയ് ഇഴച്ചിലുള്ള ദ്രാവകം പാമ്പിന്റെ യൂറിനാണെന്നും വിശദീകരിച്ചു. പാമ്പുകൾ ഇര വിഴുങ്ങുന്ന ദൃശ്യങ്ങൾ കണ്ടിട്ടുണ്ടെങ്കിലും വിസർജിക്കുന്നത് ഇതാദ്യമായാണ് കാണുന്നതെന്നാണ് കമന്റുകളിൽ ചിലർ പറയുന്നത്. തങ്ങൾക്കിത് പുതിയ അറിവാണെന്ന് പറയുന്നവരും ഏറെയുണ്ട്. 

പാമ്പുകളോടുള്ള ഇഷ്ടം കൊണ്ടാണ് ഇവയ്ക്കായി ഒരു സൂ തന്നെ ജയ് ഒരുക്കിയത്. പാമ്പുകൾ മാത്രമല്ല മറ്റ് ഉരഗവർഗത്തിലുള്ള ജീവികളും ഈ മൃഗശാലയിലുണ്ട്. ഉടുമ്പുകളെയും പാമ്പുകളെയും മുതലകളെയുമൊക്കെ പരിചരിക്കുന്ന വിഡിയോകളും സ്ഥിരമായി ജയ് സമൂഹമാധ്യമങ്ങളിലൂടെ പങ്കുവയ്ക്കാറുണ്ട്.