സൗരയൂഥത്തിന് പുറത്ത് ഭൂമിയുടെ മൂന്നിരട്ടി വലിപ്പത്തിൽ പുതിയ ഗ്രഹം!  ജീവൻ നിലനിൽക്കാൻ സാധ്യതയെന്ന് നാസ, വിസ്മയ ലോകത്തെ പകർത്തി 'ടെസ്സ്'

സൗരയൂഥത്തിന് പുറത്ത് മൂന്നാമത്തെ ​ഗ്രഹത്തെ കണ്ടെത്തിയതായി നാസ. സൗരയൂഥത്തിന് പുറത്തെ ​ഗ്രഹങ്ങളെ കണ്ടെത്തുന്നതിനായി അയച്ച ട്രാന്‍സിറ്റിങ് എക്‌സോപ്ലാനറ്റ് സര്‍വേ സാറ്റലൈറ്റ് ( ടെസ്സ്) ആണ് പുതിയ ​ഗ്രഹത്തെ കണ്ടെത്തിയത്. 'എച്ച്ഡി 21749ബി ' എന്നാണ് ഈ  ​ഗ്രഹത്തിന് നാസ നൽകിയ പേര്. ടെസ്സ് ഇതുവരേക്കും കണ്ടെത്തിയ  ​ഗ്രഹങ്ങളിൽ ഏറ്റവും വലിയ ഭ്രമണകാലമുള്ളതും ഇതിനാണ്.

 കുള്ളൻ നക്ഷത്രത്തെ ഭ്രമണം ചെയ്തു വരാൻ 36 ദിവസമാണ് എച്ച്ഡി 21749ബി എടുക്കുന്നത്.  ഭൂമിയിൽ നിന്നും 53 പ്രകാശവർഷം അകലെയായാണ് പുതിയ ​ഗ്രഹം വലംവയ്ക്കുന്ന കുള്ളൻ നക്ഷത്രം ഉള്ളത്.  സൂര്യന് സമാനമായ പ്രകാശം വർഷിക്കുന്ന നക്ഷത്രത്തിന് സമീപമായതിനാൽ തന്നെ ഈ കുഞ്ഞൻ ​ഗ്രഹത്തിലെ താപനില വളരെ കൂടുതലാണ് . 149 ഡി​ഗ്രി സെൽഷ്യസ് താപനിലയാണ് ഇവിടുള്ളതെന്നാണ് ടെസ്സിന്റെ കണ്ടെത്തൽ. 

 ഭൂമിയുടെ മൂന്നിരട്ടി വലിപ്പമുണ്ടെന്ന് പ്രതീക്ഷിക്കുന്ന ​ഗ്രഹത്തെ ഉപ നെപ്ട്യൂൺ വിഭാ​ഗത്തിലാണ് നാസ ഉൾപ്പെടുത്തിയിരിക്കുന്നത്. ഇതനുസരിച്ച് ഭൂമിയെക്കാൾ 21 ഇരട്ടി പിണ്ഡവും ​ഗ്രഹത്തിനുള്ളതായി കണക്കാക്കുന്നു. ഇത്രയേറെ ചൂടുണ്ടെങ്കിലും പാറയുടെ സാന്നിധ്യം ജീവൻ നിലനിൽക്കാനുള്ള സാധ്യതകളിലേക്കാണ് വിരൽ ചൂണ്ടുന്നത്. കട്ടിയേറിയ അന്തരീക്ഷവും ജലസാന്ദ്രതയും ഇവിടെ ഉണ്ടെന്നാണ് ടെസ്സ് നൽകുന്ന വിവരങ്ങളെ അപ​ഗ്രഥിച്ച് നാസ പറയുന്നത്.

സൗരയൂഥത്തിന് പുറത്ത് മൂന്ന് ഗ്രഹങ്ങളാണ് ടെസ്സ് ഇതിനകം കണ്ടെത്തിയത്. മറ്റുള്ളവയെ കുറിച്ചുള്ള വിശദമായ പഠനങ്ങള്‍ നാസ നടത്തിവരികയാണ്.