ശൈത്യകാല വരവറിയിച്ച് മൂന്നാർ തണുത്തുവിറയ്ക്കുന്നു; പുൽമേടുകളിൽ മഞ്ഞുകണങ്ങൾ

മൂന്നാർ: വിനോദസഞ്ചാരികളുടെ പ്രിയകേന്ദ്രമായ മൂന്നാറിൽ ശൈത്യകാലത്തിന്റെ വരവറിയിച്ച് കഠിനമായ തണുപ്പ് അനുഭവപ്പെട്ടു തുടങ്ങി. ഇത്തവണ പതിവിലും നേരത്തെ ശൈത്യകാലം എത്തുന്നതിന്റെ സൂചന നൽകി പുൽമേടുകളിലും തേയിലച്ചെടികളിലും വെള്ളിത്തരികൾ പോലെ മഞ്ഞുകണങ്ങൾ (Frost) പ്രത്യക്ഷപ്പെട്ടു തുടങ്ങി. കഴിഞ്ഞ ഏതാനും ദിവസങ്ങളായി പ്രദേശത്ത് തണുപ്പ് അതിവേഗം കനക്കുകയാണ്.

കഴിഞ്ഞ ദിവസം മൂന്നാർ ടൗണിലും സമീപപ്രദേശമായ നല്ലതണ്ണിയിലും താപനില ആറ് ഡിഗ്രി സെൽഷ്യസിലേക്ക് താഴ്ന്നു. മാട്ടുപ്പെട്ടി, കുണ്ടള എന്നിവിടങ്ങളിൽ എട്ട് ഡിഗ്രിയാണ് രേഖപ്പെടുത്തിയത്. എന്നാൽ ചെണ്ടുവര, ലക്ഷ്മി തുടങ്ങിയ ഉയർന്ന തോട്ടം മേഖലകളിൽ പുലർച്ചെ താപനില അഞ്ച് ഡിഗ്രി സെൽഷ്യസിനും താഴെ എത്തിയിരുന്നു. പകൽസമയത്ത് 20 മുതൽ 25 ഡിഗ്രി സെൽഷ്യസ് വരെയാണ് അനുഭവപ്പെടുന്നതെങ്കിലും വൈകുന്നേരത്തോടെ ശക്തമായ കോടമഞ്ഞും കുളിർകാറ്റും മലനിരകളെ മൂടുകയാണ്.

പുലർകാലങ്ങളിൽ അനുഭവപ്പെടുന്ന കടുത്ത തണുപ്പും മഞ്ഞുവീഴ്ചയും വരുംദിവസങ്ങളിലും തുടരാനാണ് സാധ്യത. കാലാവസ്ഥാ വ്യതിയാനമില്ലാതെ ഇതേ രീതിയിൽ തുടർന്നാൽ ഒരാഴ്ചയ്ക്കുള്ളിൽ തന്നെ മൂന്നാറിലെ താപനില പൂജ്യത്തിന് താഴേക്ക് എത്താൻ സാധ്യതയുണ്ടെന്നാണ് വിലയിരുത്തൽ. അതിശൈത്യത്തിന്റെ ലക്ഷണങ്ങൾ നേരത്തെ പ്രകടമായതോടെ തണുപ്പും മഞ്ഞുവീഴ്ചയും ആസ്വദിക്കാൻ വരുംദിവസങ്ങളിൽ സഞ്ചാരികളുടെ വലിയ ഒഴുക്ക് മൂന്നാറിലേക്ക് ഉണ്ടാകുമെന്നാണ് ടൂറിസം മേഖലയുടെ പ്രതീക്ഷ.