മൂന്നാറിന്റെ കിലുക്കാംപെട്ടിയായി യെല്ലപെട്ടി; പുൽമേടുകളിൽ മഞ്ഞ വസന്തം പകർന്ന് കിലുക്കാംപെട്ടി ചെടികൾ പൂത്തുലഞ്ഞു

മൂന്നാർ: മൂന്നാറിലെ ഏറ്റവും മനോഹര ഗ്രാമമേതെന്ന ചോദ്യത്തിന് ഒറ്റ ഉത്തരമേ ഉള്ളൂ, അത് യെല്ലപെട്ടിയാണ്. മഞ്ഞിന്റെ പുതപ്പണിഞ്ഞ്, ഓരോ സമയത്തും വ്യത്യസ്തമായ ദൃശ്യവിസ്മയം സമ്മാനിക്കുന്ന ഈ ഗ്രാമം ഇപ്പോൾ സഞ്ചാരികളുടെ പ്രിയപ്പെട്ട ഇടമായി മാറുകയാണ്. പുൽമേടുകളിൽ മഞ്ഞ വസന്തം പകർന്ന് കിലുക്കാംപെട്ടി ചെടികൾ പൂവിട്ടതോടെ യെല്ലപെട്ടിയുടെ ഭംഗി ഇരട്ടിച്ചിരിക്കുകയാണ്.

വിശാലമായ പുൽമേടിന് നടുവിലൂടെ ഒഴുകുന്ന കൊച്ചരുവിയാണ് യെല്ലപെട്ടിയിലെ പ്രധാന ആകർഷണം. ഈ അരുവിയ്ക്കു ചുറ്റും, പുൽമേട്ടിൽ ആകമാനം 'കിലുക്കാംപെട്ടി' എന്നറിയപ്പെടുന്ന ചെടികൾ മഞ്ഞ പൂക്കളുടെ വിസ്മയമാണ് തീർത്തിരിക്കുന്നത്. മൂന്നാറിൽ നിന്നും 28 കിലോമീറ്റർ അകലെയാണ് യെല്ലപെട്ടി സ്ഥിതി ചെയ്യുന്നത്. കണ്ണൻ ദേവൻ ഹിൽസ് കമ്പനിയുടെ ഉടമസ്ഥതയിലുള്ള സ്ഥലത്താണ് നിലവിൽ ഈ ചെടികൾ പൂവിട്ടുനിൽക്കുന്നത്.

മഞ്ഞ പൂക്കൾ വിരിഞ്ഞുനിൽക്കുന്ന പുൽമേട്ടിലെ കൊച്ചുകുടിലും വെള്ളച്ചാട്ടവും അരുവിയുമെല്ലാം സഞ്ചാരികൾക്ക് തികച്ചും അവിസ്മരണീയമായ അനുഭവമാണ് സമ്മാനിക്കുന്നത്. പ്രകൃതിയുടെ സൗന്ദര്യം പൂർണ്ണതയോടെ ആസ്വദിക്കാൻ എത്തുന്നവരുടെ പ്രധാന സന്ദർശന കേന്ദ്രമായി യെല്ലപെട്ടി മാറിത്തുടങ്ങിയിട്ടുണ്ട്.

Yellapetty, a scenic village near Munnar, has turned into a golden paradise as Kilukkampetti flowers bloom across its vast meadows, offering travelers breathtaking views alongside streams, waterfalls, and mist-covered landscapes.