വയോധികർക്ക് സാന്ത്വനമായി ജനമൈത്രി പൊലീസിന്റെ 'പ്രശാന്തി': മുഴപ്പിലങ്ങാട് ബീച്ചിലേക്ക് സ്നേഹയാത്രയൊരുക്കി

തലശ്ശേരി: വാർദ്ധക്യത്തിന്റെ ഏകാന്തതയിൽ കഴിയുന്ന മുതിർന്ന പൗരന്മാർക്ക് സ്നേഹത്തിന്റെയും സന്തോഷത്തിന്റെയും പുതിയ അനുഭവം പകർന്ന് ജനമൈത്രി പൊലീസിന്റെ മാതൃകാപരമായ സ്നേഹയാത്ര. കേരള പൊലീസിന്റെ വയോജനക്ഷേമ പദ്ധതിയായ 'പ്രശാന്തി'യുടെ ഭാഗമായി തലശ്ശേരി ജനമൈത്രി പൊലീസാണ് വൃദ്ധസദനങ്ങളിലെ അന്തേവാസികൾക്കായി മുഴപ്പിലങ്ങാട് ഡ്രൈവ് ഇൻ ബീച്ചിലേക്ക് ഉല്ലാസയാത്ര സംഘടിപ്പിച്ചത്. തലശ്ശേരി ജോസ്ഗിരി സമരിറ്റൻ ഹോമിലെയും ധർമ്മടം സ്നേഹക്കൂട്ടിലെയും വയോധികർ കടൽക്കാറ്റേറ്റ് സായാഹ്നം ആസ്വദിക്കാനും പരസ്പരം മനസ്സ് തുറക്കാനുമായി യാത്രയിൽ ഒത്തുചേർന്നു.

മുതിർന്ന പൗരന്മാരുടെ മാനസികോല്ലാസത്തിനും അവരുടെ വൈകാരിക അരക്ഷിതാവസ്ഥകൾ അകറ്റി സമൂഹത്തിന്റെ കരുതൽ ഉറപ്പുവരുത്തുന്നതിനും മുൻഗണന നൽകിയാണ് പൊലീസ് ഈ കൂടിച്ചേരൽ ഒരുക്കിയത്. തലശ്ശേരി എഎസ്പി ഡോ. നന്ദഗോപൻ എം. ഐപിഎസ് പരിപാടികൾക്ക് നേരിട്ട് നേതൃത്വം നൽകി. തലശ്ശേരി എഎസ്പി ഓഫീസിലെയും തലശ്ശേരി, ധർമ്മടം, തലശ്ശേരി കോസ്റ്റൽ പൊലീസ് സ്റ്റേഷനുകളിലെയും പൊലീസ് ഉദ്യോഗസ്ഥരും പിങ്ക് പെട്രോൾ വിഭാഗവും വയോജനങ്ങൾക്ക് സുരക്ഷയും സഹായവുമായി യാത്രയിലുടനീളം ഒപ്പമുണ്ടായിരുന്നു.

തലശ്ശേരി സേക്രഡ് ഹാർട്ട് ഗേൾസ് ഹയർ സെക്കൻഡറി സ്കൂൾ, സെന്റ് ജോസഫ് ഹയർ സെക്കൻഡറി സ്കൂൾ എന്നിവിടങ്ങളിലെ സ്റ്റുഡന്റ് പൊലീസ് കേഡറ്റുകളും (എസ്പിസി) അധ്യാപകരും കെയർടേക്കർമാരും പങ്കുചേർന്നത് യാത്രയെ തലമുറകളുടെ സ്നേഹസംഗമമാക്കി മാറ്റി. മുഴപ്പിലങ്ങാട് കടൽത്തീരത്തെ നടത്തത്തിന് പുറമെ വയോധികരും വിദ്യാർത്ഥികളും ചേർന്ന് അവതരിപ്പിച്ച ലളിതമായ കലാപരിപാടികളും അരങ്ങേറി. തങ്ങൾ സമൂഹത്തിൽ ഒറ്റയ്ക്കല്ലെന്ന വലിയ ആത്മവിശ്വാസവും പ്രതീക്ഷയും മുതിർന്നവരുടെ മനസ്സിൽ നിറച്ച ഈ ഉദ്യമം ജനമൈത്രി പൊലീസിന്റെ കാരുണ്യമുഖത്തിന് മികച്ച മാതൃകയായി.