കണ്ണൂർ: ജില്ലയിലെ പൊതുജലാശയങ്ങളിലെ മത്സ്യസമ്പത്ത് വർദ്ധിപ്പിക്കുന്നതിനും ഉൾനാടൻ മത്സ്യബന്ധന മേഖലയെ ആശ്രയിക്കുന്ന തൊഴിലാളികളുടെ ഉപജീവനമാർഗ്ഗം മെച്ചപ്പെടുത്തുന്നതിനുമായി ഫിഷറീസ് വകുപ്പിന്റെ നേതൃത്വത്തിൽ മത്സ്യവിത്ത് നിക്ഷേപ പദ്ധതി നടപ്പിലാക്കി. കണ്ണൂർ ജില്ലാ പഞ്ചായത്തിന്റെ 2026-27 വാർഷിക പദ്ധതിയിൽ ഉൾപ്പെടുത്തി സംഘടിപ്പിച്ച പദ്ധതിയുടെ ഉദ്ഘാടനം പടിയൂർ കല്യാട് ഗ്രാമപഞ്ചായത്തിലെ പൂവ്വം കടവിൽ ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യൻ നിർവ്വഹിച്ചു. ജില്ലാ പഞ്ചായത്ത് സ്റ്റാൻഡിങ് കമ്മിറ്റി ചെയർപേഴ്സൺ ബോബി എണ്ണച്ചേരി ചടങ്ങിൽ അധ്യക്ഷത വഹിച്ചു.
പദ്ധതിയുടെ ഭാഗമായി ആദ്യഘട്ടത്തിൽ ഒരു ലക്ഷം മത്സ്യക്കുഞ്ഞുങ്ങളെയാണ് പൂവ്വം കടവിലെ ജലാശയത്തിൽ നിക്ഷേപിച്ചത്. ജില്ലയിലെ ഉൾനാടൻ ജലാശയങ്ങളെ സംരക്ഷിക്കുന്നതിനൊപ്പം ഗ്രാമീണ മേഖലയിലെ സാധാരണക്കാരായ മത്സ്യത്തൊഴിലാളികളുടെ വരുമാനത്തിലും ജീവിതനിലവാരത്തിലും മികച്ച വളർച്ച ഉണ്ടാക്കുകയാണ് പദ്ധതിയിലൂടെ ലക്ഷ്യമിടുന്നത്. ആകെ പത്ത് ലക്ഷം രൂപ ചെലവഴിച്ചാണ് ജില്ലയിലെ വിവിധ കേന്ദ്രങ്ങളിൽ മത്സ്യവിത്തുകൾ നിക്ഷേപിക്കുന്നത്. ശുദ്ധജല സ്രോതസ്സുകളിൽ കാർപ്പ് ഇനത്തിൽപ്പെട്ട മത്സ്യക്കുഞ്ഞുങ്ങളെയും, ഉപ്പുവെള്ളമുള്ള കായലുകളിലും ജലാശയങ്ങളിലും കരിമീൻ, ചെമ്മീൻ കുഞ്ഞുങ്ങളെയുമാണ് ഇത്തരത്തിൽ ശാസ്ത്രീയമായി നിക്ഷേപിക്കുന്നത്.
ചടങ്ങിൽ ഫിഷറീസ് ഡെപ്യൂട്ടി ഡയറക്ടർ ആർ. ജുഗ്നു പദ്ധതി വിശദീകരണം നടത്തി. പടിയൂർ കല്യാട് ഗ്രാമപഞ്ചായത്ത് പ്രസിഡന്റ് ടി. ശ്രീജ, കണ്ണൂർ ജില്ലാ പഞ്ചായത്ത് സ്റ്റാൻഡിങ് കമ്മിറ്റി ചെയർപേഴ്സൺമാരായ എ. പ്രദീപൻ, പി. രവീന്ദ്രൻ, ത്രിതല പഞ്ചായത്ത് ജനപ്രതിനിധികൾ, ഫിഷറീസ് വകുപ്പ് ഉദ്യോഗസ്ഥർ, പ്രദേശവാസികൾ തുടങ്ങിയവർ ചടങ്ങിൽ പങ്കെടുത്തു. വരും ദിവസങ്ങളിൽ ജില്ലയിലെ കൂടുതൽ ജലാശയങ്ങളിലേക്ക് പദ്ധതി വ്യാപിപ്പിക്കുമെന്ന് അധികൃതർ അറിയിച്ചു.
