കണ്ണൂർ സ്വദേശിയായ യുവാവ് ഖത്തറിൽ മുങ്ങിമരിച്ചു; വിടവാങ്ങിയത് ഒരു മാസം മുൻപ് ഗൾഫിലെത്തിയ 24-കാരൻ

കണ്ണൂർ: ഗൾഫിൽ ജോലി തേടിയെത്തി ഒരു മാസം പിന്നിടുമ്പോഴേക്കും കണ്ണൂർ സ്വദേശിയായ യുവാവ് ഖത്തറിൽ മുങ്ങിമരിച്ചു. പഴയങ്ങാടി മാട്ടൂൽ മടക്കര സ്വദേശി മുഹമ്മദ് ജാസിർ (24) ആണ് ഖത്തറിൽ വെച്ച് മരണപ്പെട്ടത്. മാട്ടൂൽ ഗ്രാമപഞ്ചായത്ത് എട്ടാം വാർഡ് മെമ്പർ വട്ടക്കണ്ടി ജാസ്മിയുടെയും പൂവങ്കുളത്തിൽ അബ്ദുൽ നസീറിന്റെയും മകനാണ്. കെഎംസിസി അൽ ഇഹ്സാൻ റിപ്രാട്രിയേഷൻ വിങ്ങിന്റെ നേതൃത്വത്തിൽ നിയമപരമായ നടപടിക്രമങ്ങൾ പൂർത്തിയാക്കിയ ശേഷം മൃതദേഹം ദോഹയിൽ ഖബറടക്കും.

ഖത്തറിലെ ഗറാഫയിൽ ഒരു മൊബൈൽ ഷോപ്പിലെ ജീവനക്കാരനായി ജോലി ചെയ്തുവരികയായിരുന്നു ജാസിർ. ഒരു മാസം മുൻപാണ് യുവാവ് തൊഴിൽ ആവശ്യങ്ങൾക്കായി ഖത്തറിലേക്ക് പോയത്. മുങ്ങിമരണവുമായി ബന്ധപ്പെട്ട കൂടുതൽ വിവരങ്ങൾ ലഭ്യമായിട്ടില്ല. സഹോദരങ്ങൾ: ജസീൽ, ജസ്ന.