ഗ്യാനേഷ് കുമാറിന്റെ പ്രതീകാത്മക ശവമഞ്ചവുമായി കോൺഗ്രസ് പ്രതിഷേധം; ചിതാഭസ്മം മൂത്രപ്പുരയിൽ നിമജ്ജനം ചെയ്തു

പാലക്കാട്: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ പാലക്കാട് നഗരത്തിൽ കോൺഗ്രസിന്റെ വേറിട്ട പ്രതിഷേധം. പാലക്കാട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ ഗ്യാനേഷ് കുമാറിന്റെ പ്രതീകാത്മക ശവമഞ്ചവുമേന്തി നഗരത്തിൽ പ്രതിഷേധ മാർച്ച് സംഘടിപ്പിച്ചു.തുടർന്ന് സ്റ്റേഡിയം ബസ് സ്റ്റാൻഡിന് സമീപം പ്രതീകാത്മകമായി ശവസംസ്കാരം നടത്തുകയും ചിതാഭസ്മം ബസ് സ്റ്റാൻഡിലെ മൂത്രപ്പുരയിൽ നിമജ്ജനം ചെയ്യുകയും ചെയ്തു. പുണ്യനദികളിൽ നിമജ്ജനം ചെയ്താൽ നദികൾ പോലും മലിനമാകുമെന്നതിനാലാണ് ചിതാഭസ്മം മൂത്രപ്പുരയിൽ ഒഴുക്കിയതെന്ന് പ്രതിഷേധത്തിൽ പങ്കെടുത്ത നേതാക്കൾ വ്യക്തമാക്കി.

പ്രതിഷേധയോഗം ഡിസിസി ജനറൽ സെക്രട്ടറി കെ. ഭവദാസ് ഉദ്ഘാടനം ചെയ്തു. തെരഞ്ഞെടുപ്പ് സംവിധാനങ്ങളുടെ നിഷ്പക്ഷത തകർക്കുന്ന സമീപനമാണ് കമ്മീഷന്റെ ഭാഗത്തുനിന്നുണ്ടാകുന്നതെന്ന് അദ്ദേഹം ആരോപിച്ചു. ബ്ലോക്ക് കോൺഗ്രസ് പ്രസിഡന്റ് സി.വി. സതീഷ് അധ്യക്ഷത വഹിച്ച ചടങ്ങിൽ നിരവധി കോൺഗ്രസ് പ്രവർത്തകരും പ്രാദേശിക നേതാക്കളും പങ്കെടുത്തു.