പശ്ചിമഘട്ട പരിസ്ഥിതി ലോല മേഖല കരട് വിജ്ഞാപനത്തിലെ അപാകതകൾ; 6-ന് പാലക്കാട് ഹർത്താൽ പ്രഖ്യാപിച്ച് സംയുക്ത കിസാൻ മോർച്ച

പാലക്കാട്: പശ്ചിമഘട്ട പരിസ്ഥിതി ലോല മേഖല കരട് വിജ്ഞാപനത്തിലെ അപാകതകൾ പരിഹരിക്കണമെന്ന് ആവശ്യപ്പെട്ട് നവംബർ 6-ന് പാലക്കാട് ജില്ലയിലെ ബാധിത മേഖലകളിൽ സംയുക്ത കിസാൻ മോർച്ച ഹർത്താൽ പ്രഖ്യാപിച്ചു. രാവിലെ ആറു മുതൽ വൈകിട്ട് ആറു വരെയാണ് ഹർത്താൽ ആഹ്വാനം ചെയ്തിരിക്കുന്നത്.

ജൂലൈ 27-ന് പുറത്തിറക്കിയ ഏഴാമത് കരട് വിജ്ഞാപനത്തിലും കേരളം നേരത്തെ ഉന്നയിച്ച ആശങ്കകൾ പൂർണ്ണമായും അവഗണിക്കപ്പെട്ടുവെന്നാണ് സംഘടനയുടെ പ്രധാന ആരോപണം. ജനവാസ മേഖലകളും കൃഷിയിടങ്ങളും പൂർണ്ണമായി ഒഴിവാക്കി വനമേഖല മാത്രം സംരക്ഷിക്കുന്ന തരത്തിലുള്ള ശാസ്ത്രീയമായ പഠനവും തിരുത്തലുകളും നടത്തണമെന്ന് സംയുക്ത കിസാൻ മോർച്ച ആവശ്യപ്പെട്ടു.

പുതിയ വിജ്ഞാപനപ്രകാരം പാലക്കാട് ജില്ലയിലെ 13 വില്ലേജുകളാണ് പരിസ്ഥിതി ലോല മേഖലയിൽ ഉൾപ്പെട്ടിട്ടുള്ളത്. ഇതിൽ അട്ടപ്പാടിയും നെല്ലിയാമ്പതിയും പൂർണമായും ഉൾപ്പെടുന്നു. അഗളി, കള്ളമല, കോട്ടത്തറ, പാടവയൽ, പുതൂർ, ഷോളയൂർ, മുതലമട ഒന്ന്, നെല്ലിയാമ്പതി, പാലക്കയം, മലമ്പുഴ ഒന്ന്, പുതുശ്ശേരി ഈസ്റ്റ്, പുതുപ്പരിയാരം, കിഴക്കഞ്ചേരി ഒന്ന് എന്നിവയാണ് ബാധിത പ്രദേശങ്ങളായി പ്രഖ്യാപിച്ചിട്ടുള്ള വില്ലേജുകൾ. അന്തിമ വിജ്ഞാപനം നിലവിൽ വരുന്നതോടെ കൃഷി, ചെറുകിട സംരംഭങ്ങൾ, നിർമ്മാണ പ്രവർത്തനങ്ങൾ എന്നിവയെല്ലാം സ്തംഭിക്കുകയും ജനജീവിതം ദുസ്സഹമാവുകയും ചെയ്യുമെന്നാണ് നാട്ടുകാരുടെ ആശങ്ക.