ദേശീയപാത ടോൾ പിരിവിനെതിരെ പന്നിയങ്കരയിൽ കോൺഗ്രസ് പ്രതിഷേധം; ടോൾ പ്ലാസ ഉപരോധിച്ചു

പാലക്കാട്: റോഡ് അറ്റകുറ്റപ്പണിയുടെ പേരിൽ ദേശീയപാത സ്ഥിരമായി അടച്ചിടുകയും എന്നാൽ ടോൾ പിരിവ് തുടരുകയും ചെയ്യുന്നതിനെതിരെ കോൺഗ്രസ് പ്രവർത്തകരുടെ നേതൃത്വത്തിൽ പന്നിയങ്കര ടോൾ പ്ലാസ ഉപരോധിച്ചു. അറ്റകുറ്റപ്പണികൾ പൂർത്തിയാവുന്നത് വരെ ഇതുവഴിയുള്ള ഗതാഗതത്തിന് ടോൾ പിരിക്കരുതെന്നാണ് സമരക്കാരുടെ പ്രധാന ആവശ്യം. പ്രദേശവാസികൾക്ക് സൗജന്യ യാത്ര അനുവദിക്കാത്തതിനെതിരെയും ശക്തമായ പ്രതിഷേധമാണ് ഉയർന്നത്.

ദേശീയപാതയിലെ വടക്കഞ്ചേരി മേൽപ്പാലത്തിൽ അറ്റകുറ്റപ്പണിയുടെ പേരിൽ ഇതുവരെ 128-ഓളം തവണയാണ് റോഡ് അടച്ചിട്ടിരിക്കുന്നത്. ഈ സമയങ്ങളിൽ സർവീസ് റോഡുകളിലൂടെ ഗതാഗതം തിരിച്ചുവിടുന്നത് പൊതുവേ തിരക്കേറിയ ഈ റൂട്ടിൽ കനത്ത ഗതാഗതക്കുരുക്കിന് കാരണമാകുന്നുണ്ട്. ഇത് പ്രദേശവാസികളുടെ സാധാരണ ജീവിതത്തെയും ബാധിക്കുന്നു. ഈ സാഹചര്യത്തിലാണ് റോഡ് പണി പൂർത്തിയാവുന്നത് വരെ ടോൾ പിരിക്കാൻ അനുവദിക്കില്ലെന്ന് ആവശ്യപ്പെട്ട് കോൺഗ്രസ് പ്രവർത്തകർ ടോൾ പ്ലാസ ഉപരോധിച്ചത്. സമരക്കാരെ പൊലീസ് തടഞ്ഞു.

ജനങ്ങൾക്ക് ടോൾ പ്ലാസയിൽ ഒരു സൗകര്യവും ഒരുക്കാതെ എംപിയും എംഎൽഎയും കേന്ദ്രമന്ത്രി സുരേഷ് ഗോപിയും കരാറുകാരുമായി ഒത്തുകളിച്ച് കൊള്ള നടത്തുകയാണെന്ന് സമരത്തിന് നേതൃത്വം നൽകിയ പാളയം പ്രദീപ് ആരോപിച്ചു. തുടർന്ന് ടോൾ പ്ലാസ അധികൃതരുമായി നടത്തിയ ചർച്ചയിൽ അഭിപ്രായവ്യത്യാസങ്ങൾ ഉണ്ടായെങ്കിലും, ഉന്നത ഉദ്യോഗസ്ഥരുമായി നടത്തിയ ചർച്ചയെ തുടർന്ന് സമരം താൽക്കാലികമായി അവസാനിപ്പിക്കുകയായിരുന്നു. റോഡ് പണി ഉടൻ പൂർത്തിയാക്കുമെന്ന് ടോൾ പ്ലാസ അധികൃതർ സമരക്കാർക്ക് ഉറപ്പുനൽകി.