കൽപ്പറ്റ: ഒരുകാലത്ത് തണുത്ത കാലാവസ്ഥയാൽ സഞ്ചാരികളുടെ പ്രധാന ഇടത്താവളമായിരുന്ന വയനാടൻ മലനിരകളിൽ ചൂട് ക്രമാതീതമായി വർധിക്കുന്നു. താപനിലയിലെ പെട്ടെന്നുള്ള ഉയർച്ചയും മഴയുടെ കാലക്രമത്തിലുണ്ടാകുന്ന താളപ്പിഴകളും കടുത്ത വരൾച്ചയും ജില്ലയുടെ പരിസ്ഥിതി സന്തുലിതാവസ്ഥയ്ക്കും കാർഷിക മേഖലയ്ക്കും കനത്ത വെല്ലുവിളിയാകുന്നു. കൽപ്പറ്റ ആസ്ഥാനമായി പ്രവർത്തിക്കുന്ന ഹ്യൂം സെന്റർ ഫോർ ഇക്കോളജി ആൻഡ് വൈൽഡ് ലൈഫ് ബയോളജി പുറത്തുവിട്ട വിവരങ്ങൾ പ്രകാരം വയനാട്ടിലെ കാലാവസ്ഥയിൽ വലിയ പ്രത്യാഘാതങ്ങളാണ് പ്രകടമാകുന്നത്.
സെപ്റ്റംബർ ഒന്നു മുതൽ 17 വരെയുള്ള കണക്കനുസരിച്ച് ജില്ലയിലെ ശരാശരി ഉയർന്ന താപനില 29.2 ഡിഗ്രി സെൽഷ്യസാണ്. കഴിഞ്ഞ വർഷം (2023) ഇതേ കാലയളവിൽ ഇത് 27.3 ഡിഗ്രി മാത്രമായിരുന്നു. സെപ്റ്റംബർ 11 മുതൽ 17 വരെ തുടർച്ചയായ ഏഴ് ദിവസങ്ങളിൽ ഉയർന്ന താപനില 30 ഡിഗ്രിക്ക് മുകളിലായിരുന്നുവെന്നത് അസാധാരണ സാഹചര്യമാണ്. സെപ്റ്റംബർ 15-ന് 30.7 ഡിഗ്രി രേഖപ്പെടുത്തിയിരുന്നു. ജില്ലയിൽ ഈ വർഷം ഇതുവരെ രേഖപ്പെടുത്തിയ ഏറ്റവും ഉയർന്ന ചൂട് ഏപ്രിൽ 18-ലെ 34.4 ഡിഗ്രിയാണ്.
താപനിലയിലെ മാറ്റം വയനാടിന്റെ വനമേഖലയെയും കാർഷിക ഭദ്രതയെയും കാര്യമായി ഉലയ്ക്കുമെന്ന് ഹ്യൂം സെന്റർ ഡയറക്ടർ സി.കെ. വിഷ്ണുദാസ് ചൂണ്ടിക്കാട്ടുന്നു. ഭൂഗർഭജലനിരപ്പ് താഴുന്നത് ജലസ്രോതസ്സുകൾ വറ്റാനും നെൽകൃഷി ഉൾപ്പെടെയുള്ള പരമ്പരാഗത വിളകളുടെ നാശത്തിനും ഇടയാക്കും. ജില്ലയുടെ സമ്പദ്‌വ്യവസ്ഥയുടെ നട്ടെല്ലായ കാപ്പിക്കൃഷിക്കും ഇത് വലിയ അടിയാകും. ഡിസംബർ മുതൽ ഫെബ്രുവരി വരെയുള്ള മാസങ്ങളിൽ പൂവിടേണ്ട കാപ്പിച്ചെടികൾ സെപ്റ്റംബറിൽത്തന്നെ പൂവിട്ടു തുടങ്ങിയത് കർഷകരെ ആശങ്കയിലാക്കുന്നു. ശക്തമായ എൽ നിനോ പ്രതിഭാസവും ഇതിന് ആക്കം കൂട്ടുന്നുണ്ട്.
2024-ൽ നാടിനെ നടുക്കിയ മുണ്ടക്കൈ-ചൂരൽമല ഉരുൾപൊട്ടൽ ദുരന്തം കാലാവസ്ഥാ വ്യതിയാനത്തോടുള്ള ജില്ലയുടെ പാരിസ്ഥിതിക ദുർബലത വെളിപ്പെടുത്തിയിരുന്നു. അതിതീവ്ര ചൂട്, ശക്തമായ മഴ, ഇടവിട്ടുള്ള കടുത്ത വരൾച്ച എന്നിവ ചേർന്ന അതീവ സങ്കീർണ്ണമായ ഒരു കാലാവസ്ഥാ രീതിയാണ് വരുംകാലത്ത് പ്രകടമാകാൻ പോകുന്നതെന്ന് വിദഗ്ദ്ധർ ഓർമ്മിപ്പിക്കുന്നു.
പകലും രാത്രിയും തമ്മിലുള്ള താപനിലയിലെ പത്ത് ഡിഗ്രിയോളം വരുന്ന വ്യത്യാസം നിർജലീകരണം പോലുള്ള ആരോഗ്യപ്രശ്നങ്ങൾക്കും കാരണമാകുന്നുണ്ട്. കന്നുകാലികളുടെ ഉൽപ്പാദനക്ഷമത കുറയുന്നതിനൊപ്പം വെള്ളവും തണലും തേടി വന്യമൃഗങ്ങൾ പുതിയ സഞ്ചാരപാതകൾ തേടുന്നത് മനുഷ്യ-വന്യജീവി സംഘർഷം വർധിപ്പിക്കാനും ഇടയാക്കും. വനനശീകരണവും തണ്ണീർത്തടങ്ങൾ നികത്തി കോൺക്രീറ്റ് കെട്ടിടങ്ങൾ നിർമ്മിക്കുന്നതും ചൂടിന്റെ കാഠിന്യം വർധിപ്പിക്കുന്ന ഘടകങ്ങളാണ്.
