'അന്ന് കാറും നൂറ്റൊന്നു പവനും കാണിക്ക വച്ച് വന്നതല്ല', ഇന്ന് ഭയപ്പാട് തോന്നുന്നു: ഷാജു ശ്രീധർ 

സ്ത്രീധനത്തിന്റെ പേരിൽ പെൺകുട്ടികൾ പീഡിപ്പിക്കപ്പെടുന്ന വാർത്തകൾ കേൾക്കുമ്പോൾ ഭയപ്പാട് തോന്നുന്നെന്ന് നടൻ ഷാജു ശ്രീധർ.  താനും ഭാര്യ ചാന്ദ്നിയും ഒന്നിച്ച് ജീവിക്കാൻ തീരുമാനിച്ചത് പണത്തിന്റെ പേരിലല്ല മറിച്ച് മനസിന്റെ ചേർച്ചയിലാണെന്നും താരം ഫേസ്ബുക്കിൽ കുറിച്ചു. സ്ത്രീധനത്തിന്റെ പേരിൽ കൊല്ലത്ത് വിസ്മയ എന്ന പെൺകുട്ടി മരിച്ച പശ്ചാതലത്തിലാണ് നടന്റെ കുറിപ്പ്. 

‘അന്ന് കാറും നൂറ്റൊന്നു പവനും കാണിക്ക വച്ച് വന്നതല്ല...ഇനിയുള്ള കാലം ഒരേ മനസ്സോടെ ജീവിക്കണമെന്ന് തീരുമാനിച്ചും ആഗ്രഹിച്ചും ഇറങ്ങിത്തിരിച്ചവർ..പക്ഷേ ഇന്ന് വാർത്തകൾ കേൾക്കുമ്പോൾ ഭയപ്പാട് തോന്നുന്ന രണ്ടു പെണ്മക്കളുടെ മാതാപിതാക്കളാണ് ഞങ്ങളും...’, ഷാജു കുറിച്ചു.

ഷാജുവിന്റെ ഭാര്യ ചാന്ദ്നി മുൻകാല നടിയാണ്. നന്ദനയും നീലാഞ്ജനയുമാണ് ഇവരുടെ മക്കൾ. അയ്യപ്പനും കോശിയും സിനിമയിൽ പൃഥ്വിരാജ് അവതരിപ്പിച്ച കോശിയുടെ മകളായി എത്തിയത് നീലാഞ്ജന ആണ്. നായികയായി അരങ്ങേറാനുള്ള ഒരുക്കത്തിലാണ് നന്ദനയും.  STD X-E 99 BATCH എന്ന ചിത്രത്തിലൂടെയാണ് നന്ദന ക്യാമറയ്ക്ക് മുന്നിലെത്തുന്നത്.